Drög að niðurröðun leikja í Bestu deild karla, Lengjudeild kvenna og 2. deild karla, hefur verið birt á vef Knattspyrnusambands Íslands.

Opnunarleikur Bestu deildar karla verður laugardaginn 5. apríl en þar mæta Íslandsmeistarar Breiðabliks nýliðum Aftureldingar á Kópavogsvelli. Skagamenn eiga fyrsta leik á útivelli gegn Fram sunnudaginn 6. apríl og fyrsti heimaleikur ÍA verður í þriðju umferð á móti Vestra. Í síðustu umferðinni spilar ÍA við Aftureldingu sunnudaginn 14. september og helgina eftir hefst úrslitakeppni efri og neðri hluta sem lýkur laugardaginn 25. október.

Skagakonur hefja leik í Lengjudeildinni laugardaginn 3. maí þegar þær mæta Fylki í Árbænum og fá síðan Aftureldingu í heimsókn fimmtudaginn 8. maí. Í síðustu umferðinni sem fram fer fimmtudaginn 4. september mætir ÍA liði KR á Elkem vellinum.

Víkingur Ólafsvík og Kári leika í 2. deild í sumar og hefst deildin laugardaginn 3. maí. Þá mætir Víkingur liði Víðis á útivelli á meðan Kári tekur á móti Þrótti Vogum í Akraneshöllinni. Síðasta umferðin verður leikin laugardaginn 13. september þar sem Kári mætir Haukum heima og Víkingur liði Dalvíkur/Reynis nyrðra.

Lengjubikar karla í A deild hefst laugardaginn 8. febrúar og þar mæta Skagamenn Vestra í Akraneshöllinni í riðli 1 þar sem eru einnig lið Fjölnis, Grindavíkur, Vals og Þróttar R. Riðlinum lýkur í byrjun mars og undanúrslit verða miðvikudaginn 12. mars.

Lengjubikar kvenna í B deild hefst laugardaginn 8. febrúar þegar ÍA mætir KR í Akraneshöllinni og þar eru einnig Afturelding, Grindavík/Njarðvík, Grótta, Haukar, HK og ÍBV. Leikin er einföld umferð og síðasti leikur ÍA er laugardaginn 5. apríl gegn ÍBV heima.

Undirbúningstímabil Víkings Ólafsvíkur og Kára hefst um miðjan febrúar en Víkingur og Kári spila í Lengjubikarnum í B deild. Víkingur á fyrsta leik gegn Ými föstudaginn 14. febrúar og þessi lið eru í riðli 2 með Augnablik, Árborg, Víði og Ægi. Kári er í riðli 3 og hefja leik á móti Árbæ föstudaginn 14. febrúar og með þeim í riðli eru einnig Grótta, Haukar, ÍH og Sindri.

Skallagrímur er í riðli 2 í C deild og eiga fyrsta leik í Lengjubikarnum laugardaginn 1. mars þegar þeir mæta Vængjum Júpiters í Akraneshöllinni en hin liðin eru Smári, Uppsveitir og Úlfarnir. Skallagrímur spilar í 5. deild næsta sumar og niðurröðun hennar verður birt um miðjan janúar á vef KSÍ.

Skagamenn mæta Fram í fyrsta leik í Bestu deildinni