Síðastliðinn sunnudag fékk Björgunarsveitin Brák í Borgarnesi góða heimsókn af Suðurnesjum. Hópur, sem naut aðstoðar félaga úr Brák fyrir tíu árum síðan, kom til að minnast félaga og eiginmanns sem lést á Langavatnsdal 16. nóvember 2014. Þeir Gísli Már Marinósson, Einar Birgir Bjarkason, Þórhallur Ingason og Hjörtur Máni Þórhallsson fóru þennan dag til rjúpnaveiða á Langavatnsdal. Gísli Már skilaði sér ekki þegar halda átti heim. Þegar félagar hans fóru að leita hans fundu þeir hann látinn en hann hafði fengið hjartaáfall á göngunni.  Lögregla og björgunarsveit voru kölluð til og sóttu félagar úr Brák líkið og fluttu það til byggða eftir að hafa reynt endurlífgun, en án árangurs. 

Veiðifélagar Gísla úr þessari örlagaríku ferð ásamt ekkju hans, Erlu Ásgrímsdóttur, komu nú í heimsókn í hús Brákar að Fitjum í Borgarnesi til að minnast þess að tíu ár voru í haust liðin frá þessum atburði. Notuðu þau tækifærið og færðu Brák nokkur skóhorn sem sveitin getur selt sér til fjáröflunar en þau eru smíðisgripir Þórhalls. Einn björgunarmanna sem tók þátt í að koma Gísla Má til byggða, Jakob Guðmundsson, ásamt öðrum fulltrúum Brákar tóku á móti gestunum og sýndu þeim aðstöðuna í húsi sveitarinnar.  Að lokum var þeim boðið upp á kaffi og vöfflur áður en þau héldu heim.