Á þrettándanum 6. janúar næstkomandi verður tilkynnt um val á íþróttamanneskju Akraness árið 2024. Nú hefur verið opnað fyrir kosningu í þjónustugátt Akraneskaupstaðar og verður hún opin frá 27. desember til og með 2. janúar. Alls eru 15 manns tilnefnd að þessu sinni og eru hér í stafrófsröð:

Vélhjólaíþróttafélag Akraness

Aníta Hauksdóttir

Aníta Hauksdóttir er margfaldur meistari í sinni grein samanlagt er hún tífaldur meistari og valin akstursíþróttakona í fimmta sinn á ferlinum, er sönn fyrirmynd allra í motorsportinu. Hún keppti einnig í einni erfiðustu keppni í heimi; Roof of Africa í Lesotho, kláraði þar í heildarkeppni með bronsverðlaunum og í 3. sæti í kvk flokki. Hún er alltaf fyrst á staðinn í allt sjálfboðaliðastarf. Hefur alltaf verið harðdugleg að æfa allar hliðar sportsins. Stefnir ávallt á toppinn, alveg sama hvaða áföll dynja á, þá gefst hún aldrei upp. Aníta er alltaf með bros á vör og er sannur liðsfélagi.

Hnefaleikafélag Akraness

Björn Jónatan Björnsson

Björn Jónatan hefur afrekað margt í hnefaleikum þrátt fyrir ungan aldur, bara á árinu sem er að líða hefur hann m.a. orðið sá fyrsti í sögu Akraness til þess að hljóta Gullmerki Hnefaleikasambands Íslands í Diplomahnefaleikum, orðið bikarmeistari bæði á vorönn og haustönn, unnið Íslandsmeistaramótið þar sem hann var hársbreidd frá því að vera valinn besti boxari mótsins, unnið tvö erlend mót og á öðru þeirra var hann valinn besti u-17 boxarinn. Jónatan er mjög agaður, metnaðarfullur, gríðarlega hjálpsamur og alltaf reiðubúinn til að aðstoða æfingafélaga sína auk þess sem hann hefur tekið virkan þátt í þjálfun yngri hópa hnefaleikafélagsins.

Badminton

Drífa Harðardóttir

Drífa er okkar fremsta badmintonkona á Íslandi, hún hefur alla tíð spilað fyrir ÍA á Íslandi en hún býr og æfir í Danmörku. Drífa leggur áherslu á tvíliða- og tvenndarleik og spilar þær greinar með liði sínu í deildakeppni í Danmörku og einnig hér heima. Hún kom aftur inn í íslenska landsliðið árið 2024 og hefur staðið sig frábærlega. Hún hefur orðið Íslandsmeistari 15 sinnum, sex sinnum í tvíliðaleik og níu sinnum í tvenndarleik.

Drífa er eina konan sem hefur orðið Íslandsmeistari í meistaraflokki fyrir ÍA, hún er einnig sá badmintonspilari frá Íslandi sem hefur oftast orðið Heimsmeistari eldri spilara, 5 sinnum. Drífa kemur reglulega til Íslands og kemur alltaf á æfingar hjá ÍA. Hún hvetur krakkana áfram og leiðbeinir þeim. Hún er góð fyrirmynd fyrir badmintonkrakka, innan vallar sem utan.

Sundfélag Akraness

Einar Margeir Ágústsson

Einar er þrefaldur Íslandsmeistari í fullorðinsflokki. Hann á 12 Akranesmet í fullorðinsflokki og 13 í unglingaflokki. Einar á þriðja hraðasta tíma Íslands frá upphafi í 50m skriðsundi, 100m fjórsundi og 200m bringusundi. Þá er Einar í A-landsliði Íslands og tók þátt í stórum alþjóðlegum mótum. Á Evrópumeistaramótinu náði Einar hæst 24. sæti í 50m bringusundi en keppti líka í 50m skriðsundi og 100m bringusundi þar sem hann bæti tímana sína. Einar náði lágmörkum inn á heimsmeistaramótið þar sem hann stóð sig mjög vel og varð í 20. sæti í 100m fjórsundi og 27. sæti í 200m bringusundi. Einar synti einnig í boðsundi fyrir hönd Íslands. Boðsundssveitin setti Íslandsmet og varð í 19. sæti í 4x100m fjórsundi blandaðra kynja. Einar hefur keppt og synt mjög vel á árinu 2024 og því vel að tilnefningu kominn.

Kraftlyftingafélag Akraness

Einar Örn Guðnason

Einar á að baki glæsilegan feril innan kraftlyftinga sem spannar 15 ár í íþróttinni. Hann hefur landað 32 Íslands- og bikarmeistaratitlum í sínum þyngdarflokkum síðan 2011 að ótöldum stigabikurum. Hann hefur sett 77 Íslandsmet í heildina, yfir þrjá þyngdarflokka, sem hafa þó einhver verið slegin í dag. Núna er þó komið að tímamótum hjá Einari þar sem hann hefur ákveðið að ljúka sínum keppnisferli eftir þetta ár.

Einar hefur verið aðal driffjöðrin hjá Kraftlyftingafélagi Akraness frá stofnun þess árið 2009 og er okkar reynslumesti kraftlyftingamaður. Hann hefur helgað sig íþróttinni í 15 ár og setið í stjórn og sinnt formennsku félagsins til fjölda ára.

Pílufélag Akraness

Gunnar Hafsteinn Ólafsson

Gunnar er borinn og barnfæddur Skagamaður og gengur undir nafninu Gunni Hó. Hann byrjaði að kasta pílu fyrir um fjórum árum og hefur á þeim tíma náð nokkuð góðum árangri. T.d. fyrsta sæti í tvímenningi á Íslandsmóti félagsliða í desember 2023. Í byrjun árs 2024 var hann valinn í úrtakshóp íslenska landsliðsins í pílukasti. Á Íslandsmótinu í 501 náði hann inn í 16 manna úrslit. Í vor tryggði hans sér þátttöku í úrvaldeildinni þar sem 16 bestu pílukastarar landsins keppa og allt var sýnt í beinni útsendingu á Stöð2 sport.

Keilufélag Akraness

Ísak Birkir Sævarsson

Ísak Birkir skellti í sinn þriðja 300 leik, sem er fullkominn leikur, í janúar og eru fáir keilarar hérlendis sem geta státað sig af því. Ísak spilaði í beinni útsendingu á Stöð 2 sport í úrslitum á Íslandsmeistaramóti einstaklinga þar sem hann lenti í öðru sæti. Ísak fluttist búferlum til Svíþjóðar á árinu þar sem hann spilar með Höganäs BC en nýtir hvert tækifæri til að spila fyrir hönd ÍA þegar hann getur. Þess má geta að sænska deildin er gríðarsterk og á Ísak fullt erindi þangað. Ísak var valinn til að keppa fyrir hönd u21 Íslands í Suður-Kóreu í júlí en Ísak varð tvítugur á árinu. Þar kom hann sér í 16 manna úrslit þar sem hann endaði í 9. sæti. Íslandsmeistaramót í tvímenningi fór fram í nóvember og gerði Ísak sér lítið fyrir og vann mótið ásamt vini sínum Mikael Aroni. Ísak hefur sýnt það og sannað að ástundun skilar árangri. Hann er frábær fyrirmynd og erum við í Keilufélagi Akraness stolt af því að tilnefna Ísak annað árið í röð, enda á hann það fyllilega skilið.

Karatefélag Akraness

Jacob Daniel Margrateuson

Jacob er góð fyrirmynd fyrir aðra iðkendur í félaginu. Hann leggur mikinn metnað í íþróttina og keppnir. Hann varð í öðru sæti á Íslandsmeistaramóti unglinga í flokki 14 ára. Þá varð hann í 5. sæti í flokki 14 ára pilta á Grand Prix móti 1. Einnig vann hann innanfélagsmót KAK. Jacob er mjög efnilegur í Karate bæði í kata og kumite. Jacob meiddist í haust en hefur lagt mikla vinnu í það að koma sterkur til baka eftir meiðslin og það verður spennandi að sjá hann blómstra í íþróttinni á næstu árum.

Hestamannafélagið Dreyri

Jakob Svavar Sigurðsson

Jakob Svavar þarf ekki að kynna fyrir Skagamönnum, hann er magverðlaunaður knapi sem keppir ávalt undir merkjum ÍA. Jakob Svavar er landsmótssigurvergari í töltkeppni árið 2024, þar sem hann sigraði örugglega og hlaut hann glæsieinkunn 9,39 og er þetta í fyrsta sinn sem Jakob Svavar sigrar í töltkeppni á Landsmóti. Nú á hann bara A-flokk eftir og eins og hann segir sjálfur; „þegar því er lokið verður knapa ferilskráin fullkominn.“

Knattspyrnufélag ÍA Knattspyrnukona KFÍA

Madison Brooke Schwatzenberger

Madison Brooke var lykilleikmaður hjá liði ÍA í Lengjudeild kvenna í sumar. Madison stimplaði sig inn sem einn öflugasti leikmaður deildarinnar. Madison var valin besti leikmaður liðsins á lokahófi félagsins í október. Hún er kraftmikill og sterkur varnarsinnaður miðjumaður með góða tæknilega getu.

Fimleikafélag ÍA

Mattías Bjarmi Ómarsson

Mattías Bjarmi Ómarsson er 16 ára fimleikamaður sem hefur æft með Fimleikafélagi ÍA frá því hann var barn. Hann fór á síðasta tímabili að láni til Aftureldingar og æfði með blönduðu liði 1. flokks þar en er kominn aftur heim og æfir í dag með blönduðu liði meistaraflokks ÍA í efstu deild.

Mattías Bjarmi er fyrsti iðkandi Fimleikafélags ÍA til þess að komast alla leið í lokahóp í landsliðsvali Fimleikasambands Íslands fyrir Evrópumót. En hann var valinn í drengjalandslið Íslands (U18) í hópfimleikum í upphafi árs og keppti með liðinu á Evrópumótinu í Baku í Azerbajian, í október. Liðið komst í gegnum undanúrslit og hafnaði í 4. sæti á Evrópumótinu sem er besti árangur drengjalandsliðs Íslands til þessa. Mattías var lykilmaður liðsins í gólfæfingum en þar þykir hann bera af. Mattías er frábær liðsmaður, jákvæður og metnaðargjarn. Hann leggur sig ávalt allan fram en það hefur skilað honum þeim árangri sem hann hefur uppskorið á árinu. Umfram allt þetta er Mattías frábær fyrirmynd fyrir yngri drengi í fimleikum en þeir hafa aldrei verið fleiri á Akranesi en nú. Mattías er fimleikamaður ársins hjá Fimleikafélagi ÍA og má með sanni segja að hann sé vel að valinu kominn.

Knattspyrnufélagið Kári

Sigurjón Logi Bergþórsson

Sigurjón Logi er kraftmikill og áræðinn leikmaður sem leggur sig alltaf 100% fram í bæði æfingum og leikjum og frábær leiðtogi í liði Kára. Sigurjón sem var fyrirliði Kára í sumar fór einnig fyrir markaskorun liðsins þar sem hann skoraði 12 mörk í 20 leikjum í 3. deildinni og endaði fimmti markahæsti leikmaður deildarinnar. Sigurjón var að lokum valinn í lið ársins í 3. deildinni af öllum miðlum.

Körfuknattleiksfélag Akraness

Srdjan Stojanovic

Srdjan Stojanovic er frábær körfuboltaleikmaður og einn besti leikmaður 1. deildar á Íslandi enda þekktur fyrir að vera gríðarlega örugg skytta á vellinum. Srdjan skoraði yfir 21 stig að meðaltali fyrir ÍA á síðasta tímabili og er reynslumesti leikmaður liðsins, hann átti líka stóran þátt í að koma ÍA í úrslitakeppni á árinu í fyrsta sinn síðan 2016. Srdjan er góður liðsfélagi og mikil fyrirmynd fyrir yngri iðkendur félagsins og var það mikil lukka fyrir körfuknattleiksfélagið þegar hann ákvað að koma á Akranes og leika körfubolta.

Golfklúbburinn Leynir

Tristan Freyr Traustason

Tristan Freyr Traustason átti flott tímabil þetta árið, hann var oftar en ekki að berjast um topp sætin á unglingamótaröð GSÍ og sýndi í flestum mótum að hann ætti heima í efstu sætunum. Tristan var eini kylfingur GL til að ná niðurskurði á Íslandsmótinu í golfi. Tristan sýndi á liðnu ári að hann er góð fyrirmynd fyrir yngri kylfinga í kringum hann bæði á æfingum, auka æfingum og framkomu sinni innan sem utan vallar.

Knattspyrnufélag ÍA – knattspyrnumaður KFÍA

Viktor Jónsson

Viktor Jónsson var að klára sitt sjötta tímabil með ÍA og sprakk algjörlega út á liðnu tímabili með liðinu. Viktor var valinn besti leikmaður Knattspyrnufélags ÍA karla á lokahófi liðsins í oktbóer – liðið hafnaði í 5. sæti eftir að hafa komið upp í deild þeirra bestu sem nýliðar fyrir tímabilið. Hann skoraði 18 mörk og var markahæsti leikmaður deildarkeppninnar í sumar.

Fimmtán tilnefndir til Íþróttamanneskju Akraness 2024