Á morgun, laugardaginn 28. desember, verða ákveðin tímamót, en þá eiga þrír bræður í Borgarnesi samtals 100 ára brúðkaupsafmæli. Þetta eru þeir Sigurður, Bjarni og Unnsteinn Þorsteinssynir.

*Ung og ástfangin, Sigurður og Steinunn. Brúðkaupsmynd af þeim er líklega ekki til.*

Allt hófst þetta þegar Sigurður giftist Steinunni Pálsdóttur frá Álftártungu 28. desember 1974, en ásamt þeim voru einnig gefin saman Ásgerður Pálsdóttir, systir Steinunnar, og Sturla Stefánsson frá Hítarneskoti. Athöfnin fór fram í stofunni á prestssetrinu á Borg og var það sr. Leó Júlíusson sóknarprestur sem gaf þau saman. Þrátt fyrir vetrarkulda og ófærð dreif fólk víða að til veislu eftir athöfnina sem haldin var á æskuheimili systranna í Álftártungu.

Næstur í röðinni var Bjarni sem gekk að eiga Guðrúnu Kristjánsdóttur frá Hrísdal 28. desember 1984 í stofunni á heimili þeirra að Gunnlaugsgötu 14 í Borgarnesi. Var það sýslumaðurinn í Borgarnesi, Rúnar Guðjónsson, sem sá um athöfnina. Að sjálfsögðu var boðið upp á veitingar eftir athöfn og eins og tíu árum áður setti ófærð og vetrarkuldi strik í reikninginn en flestir gesta létu það ekki stoppa sig.

Víkur þá sögunni til 21. aldarinnar þegar yngsti bróðirinn, hann Unnsteinn, gifti sig Guðbjörgu Guðjónsdóttur frá Rauðanesi, einnig 28. desember en árið var 2014. Var það sr. Þorbjörn Hlynur Árnason sóknarprestur á Borg sem gaf þau turtildúfurnar saman í stofunni á æskuheimili þeirra bræðra Böðvarsgötu 9 í Borgarnesi. Að þessu sinni var veðrið heldur skaplegra en hjá eldri bræðrum Unnsteins og fór veislan fram með mestu ágætum.

En ef bræðurnir eru spurðir hvers vegna þessi dagur varð fyrir valinu, er svarið einfalt. Unnsteinn valdi daginn því Bjarni og Sigurður giftu sig báðir þennan dag, Bjarni valdi daginn því Sigurður gifti sig þennan dag en svo er það Sigurður sem var nú bara ekki viss hvers vegna hann og Steinka völdu þennan dag í upphafi. Líklega hefur það bara þótt hagstætt að halda veislu á þessum tíma ársins til að nýta mataraðföng frá jólahátíðinni. Skýringin gæti verið sú rétt eins og hvað annað. En hver sem ástæðan var þá hafa öll hjónaböndin haldið og vel það þó á ýmsu hafi gengið í lífinu. Bræðurnir þrír hafa alltaf fylgst að og haldið í hefðirnar í mörgu. Til gamans má nefna að þeir störfuðu allir í björgunarsveit saman til lengri tíma, fóru allir í slökkviliðið og unnu þar saman, unnu hjá Kaupfélagi Borgfirðinga og eignuðust allir tvö börn hver með sínum konum og það alltaf í pörum; ýmist tvo drengi eða tvær stúlkur. Samanlagt telja afkomendur þeirra bræðra rúmlega 20 – börn, barnabörn, stjúpbörn og stjúpbarnabörn.

Í tilefni að Gull-, Rúbín- og Tinbrúðkaupi þeirra bræðra ætla þeir að bjóða eiginkonum sínum út að borða – ekki þó í jólaafganga!

*Bræðurnir við fermingu Unnsteins 1979.*

Bræður fagna hundrað ára brúðkaupsafmæli