ÍA tók á móti Selfossi á föstudaginn í 1. deild karla í körfubolta. Heimamenn voru fyrir leikinn með sjö sigra og þrjú töp á meðan Selfoss var með tvo sigra og átta töp.

Gestirnir frá Selfossi skoruðu fyrstu körfu leiksins en heimamenn tóku því næst öll völd á vellinum. ÍA spilaði fastan varnarleik sem skilaði þeim stolnum boltum og auðveldum körfum og voru að hitta vel fyrir utan þriggja stiga línuna. Aron Elvar Dagsson kom með mikinn kraft af varamannabekk ÍA og kom heimamönnum í 24-10 þegar lítið var eftir af fyrsta leikhluta. Allir þeir leikmenn sem komu við sögu í liði ÍA í leikhlutanum lögðu eitthvað af mörkum fyrir liðið og var ÍA með þægilega forystu eftir fyrsta leikhlutann, 30-18.

Gestirnir frá Selfossi náðu að herða á sínum varnarleik og með skemmtilegum tilþrifum náðu þeir að minnka fljótlega muninn í 35-29. En heimamenn tóku þá góða rispu og náðu að klára fyrri hálfleikinn með 23-13 áhlaupi og var staðan því í hálfleik, 58-42 fyrir ÍA.

Aftur byrjuðu gestirnir frá Selfossi vel í byrjun þriðja leikhluta og náðu þeir að minnka munninn í 62-55. Innkoma Arons Elvars af varamannabekk ÍA, auk þess sem liðsmenn Selfoss réðu lítið við Victor Bafutto undir körfunni, gerði það að verkum að ÍA var með góða forystu fyrir lokaleikhlutann, 85-69.

Selfyssingar náðu að minnka muninn í lokaleikhlutanum í 98-91 og virtist allt stefna í spennandi lokamínútur. ÍA herti á varnarleik sínum og setti sóknarleik liðsins í hendurnar á sínum reyndustu leikmönnum og vann ÍA góðan heimasigur á Selfossi, lokatölur 111-99.

Kinyon Hodges var stigahæstur í liði ÍA með 24 stig en Aron Elvar Dagsson skoraði 23 stig. Victor Bafutto var með góða tvennu, skoraði 15 stig og var með 17 fráköst.

ÍA fer því í jólafrí með átta sigra og þrjú töp og er sem stendur ásamt Hamri í 3.-4. sæti deildarinnar.

Gott gengi ÍA heldur áfram í körfunni