Rætt við fyrrverandi leikmenn Skallagríms í körfubolta, um leikmanninn Danny Shouse sem skoraði 100 stig í einum og sama leiknum gegn þeim í desember 1979 – og hvernig þeirra upplifun var af leiknum

Nýverið fóru af stað þættir á Stöð 2 Sport, þar sem fjallað er um bandaríska körfuboltaleikmenn sem hafa komið til Íslands. Þættirnir heita Kaninn en í fyrsta þættinum var mikil umfjöllun um leikmanninn Danny Shouse og hans feril hér á Íslandi. Árið var 1979 en þá var nýbyrjað að stunda íþróttir í þá nýbyggðu íþróttahúsi í Borgarnesi. Körfuboltaleikur var spilaður í tveimur hálfleikjum, tvisvar sinnum 20 mínútur og engin þriggja stiga lína var komin til sögunnar. Leikur Skallagríms gegn Ármanni fór fram laugardaginn 1. desember klukkan 14.00. Dómarar í leiknum voru úr Stykkishólmi; þeir Davíð Sveinsson og Bjartmar Bjarnason. Tímavörður var Björn Axelsson og ritari Gestur Sigurðsson.

*Skallagrímsleikmenn að þjappa sér saman. Ljósm. hóg.*

Liðsmenn Skallagríms

Í lið Skallagríms árið 1979 var mættur nýr spilandi þjálfari, Decarsta Webster, en hann hafði spilað með liði KR fyrri hluta tímabils en var nú kominn í Borgarnes. Webster hafði spilað með einum frægasta leikmanni sögunnar í háskóla, sjálfum Larry Bird en þeir voru saman í Indiana State frá 1976-78. Webster spilaði sem miðherji enda var hann 2,10 cm hár en var þá 24 ára gamall. Ásamt Webster var byrjunarliðið þannig að Bergsveinn Símonarson, þá 34 ára, var öflugasti varnarmaður liðsins. Gunnar Jónsson 19 ára, leikstjórnandi bar boltann upp fyrir liðið, Bragi Jónsson 28 ára var kraftframherji liðsins og Ingvi Árnason 31 árs var skot framherji. Á varamannabekk voru þeir Ari Björnsson 19 ára, Magnús Óttarsson 17 ára, Trausti Jóhannsson 28 ára, Þór Daníelsson 17 ára og Pétur Sverrisson 20 ára.

*Frétt úr Morgunblaðinu, 4. desember 1979.*

Skipulagið fyrir leik

„Hann nefndi við okkur fyrir leikinn að enginn nema þá kannski Bergsveinn ætti möguleika á að stoppa Shouse, þannig að við ættum að einbeita okkur á að stoppa alla hina í liðinu. En þegar líða fór á leikinn fórum við að prufa alls konar varnarafbrigði,“ nefnir Ingvi Árnason. Danny Shouse náði að skora fyrstu 16 stig Ármanns í leiknum og fóru því leikmenn Skallagríms að reyna ýmis afbrigði af varnarleik. „Við prófuðum að setja mig og Braga Jónsson á hann til dæmis en Bragi átti að vera fyrir framan Shouse til að verjast skot tilraunum hans og ég var síðan tilbúinn að taka á móti honum ef hann keyrði framhjá Braga en hann var ekki hávaxinn,“ nefnir Ingvi en Shouse var 1,78 cm á hæð. „Ég og Bragi vorum búnir að króa hann af út í hægra horni, alveg út á hliðarlínu. Hann tiplaði á hliðarlínunum en hann endaði á því að hoppa upp og út af vellinum en snéri sér við í loftinu og skaut boltanum. Og það fór auðvitað ofan í körfuna,“ segir Ingvi og bætir því við. „Þessi maður var undur.“

Ég byrjaði að berjast við hann

Bergsveinn Símonarson byrjaði leikinn að verjast Shouse. „Það gekk ekki neitt að stoppa hann, við prófuðum að setja fleiri bakverði til að verjast gegn honum en það var lítið sem hægt var að gera. Hann tók upp á því að skjóta þegar hann var nýkominn yfir miðju og það er lítið hægt að gera til að stoppa það. En þegar það voru tveir á honum þá skaut hann bara yfir okkur. Hann hoppaði það hátt upp,“ segir Bergsveinn og hlær í gegnum símann en Bergsveinn var staddur í Spánarveldi þegar blaðamaður heyrði í honum.

*Gunnar Jónsson í keppnistreyju frá 1979, skoraði 14 stig í leiknum.*

Gunnar Jónsson náði að skora góðar körfur í fyrri hálfleik fyrir Skallagrím. „Webster og Bragi náðu nokkrum varnarfráköstum og ég var fljótur að leggja af stað í sókn. Náði þá nokkrum góðum körfum og hitti ágætlega úr stökkskotum. En varnarlega var ég ekki að passa upp á Shouse, ég var að dekka leikmenn sem voru ekki nálægt boltanum sem var mjög skrýtið. Þeir fengu aldrei boltann og var það mjög sérstakt,“ segir Gunnar.

Skallagrímur jafnaði metin í 49-49 þegar lítið var eftir af fyrri hálfleik en Shouse skoraði 13 stig í röð á meðan Skallagrímur skoraði eingöngu eitt stig og staðan í leikhlé því 50-62.

Við misstum hann alltaf

Magnús Óttarsson var 17 ára gamall þegar hann var settur inn á völlinn til að reyna að stöðva Danny Shouse. „Ég var fljótur og með mikinn stökkkraft á þessum tíma og þetta var mjög niðurlægjandi, því ég var nýbyrjaður í meistaraflokki og var þetta eitt af mínum fyrstu verkefnum. Að reyna að verjast þessu leikmanni. Hann var gríðarlega snöggur og komst leikandi framhjá okkur bakvörðum en svo tók á móti honum 2,10 cm hár Webster en þá stökk Shouse upp. Í minningunni stökk hann örugglega einn metra upp og einn metra aftur á bak, þannig að það var ekki möguleiki á að verja skotið hans,“ segir Maggi og bætir við:

„Hann fór oftast til vinstri og reyndum við að loka á hann en við misstum hann alltaf. En síðan spilaði Shouse enga vörn þegar líða tók á leikinn. Hann var þá bara að spara sig fyrir sóknarleikinn en í seinni hálfleik tók hann upp á því að setjast á miðjan völlinn til að hvíla sig, þegar vítaskot voru tekin eða þegar leikurinn var stoppaður,“ segir Maggi en hann á ekkert nema gott eitt að segja um Danny Shouse. „Eftir leikinn kom hann og þakkaði fyrir leikinn og var mjög almennilegur. Svo hitti ég hann á körfuboltauppgjöri ári síðar en þá var hann nýbúin að vinna Íslandsmeistaratitil með Njarðvík og þá kom það mér á óvart að hann tók sér tíma til að tala við 18 ára gamlan Borgnesing, innan um allar goðsagnirnar sem voru á þessu uppgjöri,“ segir Magnús.

Hann skaut okkur í kaf

Bragi Jónsson segir að þessi leikur hafi verið eins og lyginni líkast. „Hann skaut okkur í kaf í þessum leik, alveg sama hvaðan hann skaut. En við náðum að spila ágætis sóknarleik í leiknum. Ég og Gunnar náðum vel saman á þessum tíma og oft náði ég varnarfrákasti en þá var Gunnar lagður af stað í sókn og ég henti boltanum á hann. Hann náði að grípa flest alla bolta sem ég henti á hann,“ segir Bragi.

Skallagrímur náði að minnka muninn í 77-80 um miðbik seinni hálfleiks en þá tók Danny Shouse við sér. Hann skoraði 12 stig í röð og breytti stöðunni í 77-92 og áttu leikmenn Skallagríms ekki mörg svör eftir þessi áhlaup Shouse.

Maður hljóp eins og andskotinn út um allt

Ari Björnsson var einn af þeim sem reyndu að verjast Shouse. „Ég man að við áttum að reyna að stoppa hann. Svenni var mjög góður varnarmaður en svo var prófað að henda öðrum leikmönnum á hann. Ég hljóp eins og andskotinn út um allan völlinn að reyna að stoppa hann en það var lítið sem ég gat gert. Hann var eldfljótur, með mikinn sprengikraft og hann stal oft boltanum af okkur og skoraði í hraðaupphlaupum,“ nefnir Ari.

Leikurinn endaði 109-118 Ármanni í vil, þar sem Shouse skoraði 100 stig en næst stigahæsti leikmaður Ármanns var með 6 stig. „Ég man að ég fór að vorkenna stráka greyjunum sem voru með honum í liði, því hann var alltaf með boltann. Þeir voru heppnir að koma við boltann ef þeir náðu einhverju frákasti,“ segir Ari og hlær.

Þór Daníelsson var einn úr bakvarðasveit Skallagríms sem reyndi að stoppa Shouse. „Ég held að hann hafi klikkað úr tveimur skotum í leiknum og það var þegar hann var aleinn,“ segir Þór og heldur áfram: „Þetta var einn furðulegasti leikur sem ég hef verið hluti af en við Webster vorum saman með 62 stig í leiknum og það er gaman að segja frá því,“ nefnir Þór og hlær hátt. Webster endaði með 60 stig en Þór skoraði 2 stig í leiknum.

Bragi Jónsson skoraði 16 stig í leiknum, Gunnar Jónsson skoraði 14 stig, Ingvi Árnason skoraði 9 stig, Pétur Sverrison 6 stig og Magnús Óttarson 2 stig.

*Bragi Jónsson í leik með Skallagrími. Ljósm. hóg.*

Enginn átti möguleika á að stoppa hann

Rætt við fyrrverandi leikmenn Skallagríms í körfubolta, um leikmanninn Danny Shouse sem skoraði 100 stig í einum og sama leiknum gegn þeim í desember 1979 - og hvernig þeirra upplifun var af leiknum

Rætt við fyrrverandi leikmenn Skallagríms í körfubolta, um leikmanninn Danny Shouse sem skoraði 100 stig í einum og sama leiknum gegn þeim í desember 1979 - og hvernig þeirra upplifun var af leiknum