Á fundi hafnarstjórnar sveitarfélagsins Stykkishólms mánudaginn 2. desember gerði hafnarstjóri grein fyrir framtíðaráformum um uppbyggingu hafnarmannvirkja í Stykkishólmi. Meðal annars liggur fyrir að stækka þurfi ferjubryggju og laga hafskipsbryggju. Einnig þarf að endurbæta stólpa undir hafskipsbryggju og skipta um stálþil á Skipavíkurbryggju.

Hafnarstjórn óskaði eftir fundi með fulltrúum Vegagerðarinnar í tengslum við framtíðaráform um uppbyggingu hafnarmannvirkja í Stykkishólmi, stöðu þeirra og fyrirhugaðra framkvæmda. Hafnarstjórn lagði þunga áherslu á að byggður verði hafnarstígur í samræmi við samþykkta umferðaröryggisáætlun sveitarfélagsins sem bendir á nauðsyn þessara framkvæmda, m.a. til að stýra umferð gangandi vegfarenda og skapa nauðsynlegt umferðaröryggi. Í þessu sambandi vísaði hafnarstjórn jafnframt til fyrirliggjandi ályktunar 43. hafnarsambandsþings um öryggi og aðgengi að höfnum og fyrri ályktana hafnarstjórnar og bæjarstjórnar Stykkishólms vegna þessa.

Þá voru á fundinum rædd málefni Breiðafjarðarferjunnar Baldurs og þar lagði hafnarstjórn þunga áherslu á mikilvægi ferjusiglinga um Breiðafjörð. Í því sambandi mikilvægi þess að framtíðarlausn í ferjusiglingum um Breiðafjörð, sem felst í því að ríkið hanni og smíði nýja ferju sem hönnuð verður með tilliti til orkuskipta framtíðarinnar og nýst gæti sem varaskip fyrir Herjólf, endurspeglist í fjármálaáætlunum og fimm ára samgönguáætlun. Án samþykktra áforma og heimilda í áætlunum ríkisins, þ.m.t. viðeigandi fjárheimilda, er Vegagerðinni ekki tryggður sá rammi og sú stefnumörkun sem nauðsynleg er til þess að stofnunin geti hafið undirbúning að hönnun og smíði nýrrar ferju ásamt nauðsynlegum breytingar á hafnarmannvirkjum.

Að endingu lagði hafnarstjórn áherslu á mikilvægi þess að bæta við öryggismyndavélum í Stykkishólmshöfn og einnig að sækja auknar tekjur með því að fjölga komum skemmtiferðaskipa til Stykkishólms en einungis þrjú skip hafa boðað komu sína á næsta ári.

Málefni ferjunnar Baldurs tekin fyrir á hafnarfundi