Vestlendingar eiga þess nú kost að nýta sinn lýðræðislega rétt eins og aðrir landsmenn til að móta stjórn landsins og kjörstaðir verða opnir fram á kvöld. Vesturland tilheyrir Norðvesturkjördæmi sem er víðfeðmt og að einhverju leyti svæði ólíkra hagsmuna og áherslna. Það nær allt frá Skagafirði suður að Hvalfirði að Vestfjörðum með töldum og innan þess eru eftirtalin sveitarfélög: Akraneskaupstaður, Hvalfjarðarsveit, Skorradalshreppur, Borgarbyggð, Eyja- og Miklaholtshreppur, Snæfellsbær, Grundarfjarðarbær, Helgafellssveit, Stykkishólmsbær, Dalabyggð, Reykhólahreppur, Vesturbyggð, Tálknafjarðarhreppur, Bolungarvíkurkaupstaður, Ísafjarðarbær, Súðavíkurhreppur, Árneshreppur, Kaldrananeshreppur, Strandabyggð, Húnaþing vestra, Húnavatnshreppur, Blönduósbær, Skagabyggð, Sveitarfélagið Skagaströnd, Sveitarfélagið Skagafjörður og Akrahreppur.

Kjörstaði og opnunartíma má sjá með því að smella hér. Þjóðskrá er með símavakt á milli kl. 9 og 22 í dag þar sem meðal annars verða veittar upplýsingar um skráningu á kjörskrá. Símanúmerið er 515-5300. Einnig má hafa samband með tölvupósti á kosningar@skra.is.

Veður: Norðan og norðaustan 13-20 m/s í dag, hvassast á Suðausturlandi. Snjókoma á austanverðu landinu og él norðvestantil. Auk þess má búast við skafrenningi og lélegum aksturskilyrðum fyrir norðan og austan. Gular viðvaranir vegna hríðar hafa verið gefnar út fyrir norðan og austan. Færð getur spillst og vegum verið lokað með stuttum fyrirvara. Hvessir suðaustanil í kvöld, en dregur úr ofankomu í nótt. Norðlæg átt 10-18 á morgun, hvassast austast á landinu. Él um norðan og austanvert landið og skafrenningur austast framan af degi.

Ljósmynd (mm): oddvitar framboðanna í Norðvesturkjördæmi. F.v: Stefán Vagn Stefánsson Framsóknarflokki, Ugla Stefanía Kristjönudóttir Jónsdóttir Pírötum, María Rut Kristinsdóttir Viðreisn, Guðmundur Hrafn Arngrímsson Sósíalistaflokki, Eyjólfur Ármannsson Flokki fólksins, Ingibjörg Davíðsdóttir Miðflokki, Arna Lára Jónsdóttir Samfylkingu, Álfhildur Leifsdóttir Vinstri grænum, Ólafur Adolfsson Sjálfstæðisflokki og Eldur Smári Kristinsson frá Lýðræðisflokki.

Kosið til Alþingis í dag