Rætt við Stefán Vagn Stefánsson oddvita Framsóknarflokks í NV kjördæmi

Skessuhorn hefur undanfarnar vikur rætt við oddvita allra þeirra framboða sem bjóða fram í Norðvesturkjördæmi í þingkosningunum um næstu helgi. Það er ekki tilviljun að síðastur í röðinni er Stefán Vagn Stefánsson, oddviti Framsóknarflokks. Stefán hefur undanfarin þrjú ár setið á þingi, verið fyrsti þingmaður Norðvesturkjördæmis. Þennan tíma hefur hann setið í fjárlaganefnd Alþingis, fyrst sem formaður en nú varaformaður. Eftir að upp úr stjórnarsamstarfi Sjálfstæðisflokks, Framsóknarflokks og Vinstri hreyfingarinnar slitnaði tók við starfsstjórn tveggja fyrrgreindu flokkanna. Menn komu sér saman um að einu lögin sem þingið afgreiddi á starfsstjórnartímanum yrðu sjálf fjárlögin. Það væri ekki forsvaranlegt að eiga það eftir að setja ramma um fjárhag ríkisins næsta ár áður en gengið yrði til kosninga. Í því ljósi hefur Stefán Vagn setið fastur á þingi í nefndarstörfum þar til á mánudaginn í síðustu viku, þegar hann loksins slapp út, eins og hann orðar það sjálfur, til að taka þátt í framboðsslagnum með félögum sínum. Stefán kom við á skrifstofu Skessuhorns síðasta föstudagsmorgun.

Fjárlaganefnd góður skóli

Fyrst er Stefán Vagn spurður hvernig reynsla hans væri af þingstörfum undanfarin þrjú ár. „Það er mikill skóli að setjast á þing. Raunar tekur það hálft annað ár að kynnast því gangverki sem er í kerfinu. Þrátt fyrir að áður hafði ég verið í sveitarstjórnarmálum í Skagafirði í 12 ár og kynnst þingmönnum sem sveitarstjórnarmaður, þá er löggjöfin og kerfið í kringum rekstur ríkisins allt annað. En þessi aðlögun gekk vel. Ég hef allan þingtíma minn setið í fjárlaganefnd sem er einkar góður skóli því í gegnum nefndarsetu er snerting við alla geira hins opinbera; ráðuneytin, stofnanir og almennt gefur nefndarvinnan góða efnahagslega yfirsýn. Auðvitað hefur gengið á ýmsu, en á flestum sviðum hefur okkur verið að ganga ágætlega.“

Fátt sem hróflar við Sundabraut

Stefán Vagn segir að margt hafi gengið vel í Norðvesturkjördæmi. „Samgöngumálin innan kjördæmisins eru hins vegar ekki á ásættanlegu róli. Norðvesturland og Vesturland hafa setið eftir í þeim efnum og það er nú almennt viðurkennt. Okkur tókst engu að síður að festa í fjárlög í síðustu viku ákveðnar framkvæmdir sem geta farið af stað eða haldið áfram á næsta ári, þrátt fyrir að samgönguáætlun sem slík sé ekki frágengin. Það verður farið af stað með tvær brýr í Gufudalssveit og Dynjandisheiðin verður kláruð. Þá eru hafnarframkvæmdir framundan á flestum útgerðarstöðum. Í gegnum tengivegapott tókst að tryggja þriggja milljarða króna innspýtingu og sá peningur mun nýtast vel til að jafna fjárveitingar til þeirra svæða sem setið hafa eftir í samgönguáætlun. Þá er gleðilegt að Sundabraut er á áætlun árið 2026 og ekkert sem á að geta hróflað við henni. Vissulega er biðstaða með að hægt verði að ljúka tvöföldun vegarins um Kjalarnes og er það miður,“ segir Stefán Vagn.

Alls staðar brenna sömu málin á fólki

En hvað stendur upp úr eftir þessi þrjú ár? „Það hefur verið virkilega gaman að fara um, hitta og kynnast mörgu fólki. Heimsækja fyrirtæki og stofnanir og finna þann mikla kraft sem er í fólki. Vissulega eru hagsmunir áþreifanlega mjög ólíkir eftir því hvar þú ert staddur í kjördæminu. En alls staðar brenna ákveðin mál á öllum, svo sem heilbrigðismál, samgöngur og atvinnumál. Þau mál eru sem rauður þráður hvar sem maður kemur. Þá er staða landbúnaðar mjög bágborin og það er verk að vinna að bæta þar úr á næsta kjörtímabili. Sauðfjárræktin á mest undir högg að sækja en það er sömuleiðis erfitt í nautakjötsframleiðslu og mjólkurbúskap.“

Ætlum að verða stærst

Aðspurður um markmið flokks hans í næstu kosningum segir hann það vera að halda að lágmarki tveimur þingmönnum inni í kjördæminu. Kjördæmið missir eins og kunnugt er einn kjördæmakjörinn þingmann til Kragans. „Það er líklegt að sá flokkur sem fær flest atkvæði upp úr kjörkössunum á laugardaginn eigi möguleika á tveimur kjördæmakjörnum þingmönnum. Um jöfnunarsætið er útilokað að spá. Okkar markmið er því ótvírætt að verða stærsti flokkur kjördæmisins,“ segir Stefán Vagn, fyrsti þingmaðurinn sem stefnir á að halda þeim titli.

Uppskerum í fjórða leikhluta

Stefán Vagn segir þessa kosningabaráttu hafa verið stutta og snarpa. „Ég hef frá barnæsku kynnst því hvernig það er að standa í kosningabaráttu. Var fimm ára farinn að bera út bæklinga fyrir föður minn sem var á þingi á þeim tíma. Ég get því alveg viðurkennt að það var nánast „absúrd“ staða að vera fastur á Alþingi fyrstu vikur þessarar kosningabaráttu, gat raunar einungis séð í gegnum Facebook hvað var að gerast, en sat fastur á nefndafundum í fjárlaganefnd fram á nótt dag eftir dag. Félagar mínir stóðu sig hins vegar vel. En á mánudaginn í síðustu viku losnaði ég svo út þegar þriðju umræðu um fjárlögin lauk. Nú er lokaspretturinn í gangi og virkilega stíft plan sem við keyrum eftir. Svo ég grípi til líkindamáls úr körfuboltanum þá hefur þriðji leikhluti oft verið erfiður, en svo getur maður haft það í fjórða leikhluta. Ég er bjartsýnn á að Framsókn uppskeri ríkulega í fjórða leikhluta að þessu sinni.“

Jafna aðstöðuna

Oddviti Framsóknarflokks segist áfram brenna fyrir þeim málum sem þarf að koma í betri farveg í Norðvesturkjördæmi. „Þetta er dæmigert landsbyggðarkjördæmi þar sem til umræðu eru byggðamál, atvinnumál, húsnæðismál, raforkumál, heilbrigðismál og baráttan fyrir jöfnum tækifærum fólks. Ennþá eru ýmis mál sem þarf að leysa, hvort sem við lítum til heilbrigðisþjónustunnar, farsímasambands, samgangna eða annarra réttlætismála. Ég er fylgjandi því að við eigum að virkja skattkerfið til jöfnunar tækifæra og aðstöðu fólks, ekki ólíkt og gert er í Noregi. Þar liggur það fyrir að þjónustan minnkar eftir því sem þú ferð lengra frá Osló, hvort sem litið er til heilbrigðisþjónustu eða annars. Við því bregðast Norðmenn með því að lækka skatta fyrirtækja og einstaklinga til að dreifbýlli svæði geti laðað til sín fólk og fyrirtæki. Með því að fyrirtæki sjái til dæmis skattalegt hagræði í að setja sig niður fjær höfuðborginni, því meira eykur þú líkurnar á að þau velji að gera það. Í það minnsta er það hlutverk okkar þingmanna á landsbyggðinni að jafna tækifærin og við eigum að gera allt sem í okkar valdi stendur til að halda landinu í byggð. Fyrir því brennur Framsóknarflokkurinn, fyrir því brenn ég,“ segir Stefán Vagn Stefánsson að endingu.

Nauðsynlegt að jafna tækifærin og aðstöðu fólks

Rætt við Stefán Vagn Stefánsson oddvita Framsóknarflokks í NV kjördæmi

Rætt við Stefán Vagn Stefánsson oddvita Framsóknarflokks í NV kjördæmi