Á vef Kennarasambands Íslands var sett tilkynning í gær þess efnis að niðurstaða atkvæðagreiðslna um boðun verkfalls í tíu leikskólum í landinu liggur nú fyrir. Aðgerðirnar voru samþykktar með yfirgnæfandi meirihluta atkvæða. Verkföll eru boðuð þriðjudaginn 10. desember næstkomandi í tíu leikskólum hafi samningar ekki náðst. „Þetta eru leikskólarnir Hulduheimar á Akureyri, Höfðaberg í Mosfellsbæ, Lundaból í Garðabæ, Lyngheimar í Reykjavík, Lyngholt á Reyðarfirði, Óskaland í Hveragerði, Rauðhóll í Reykjavík, Stakkaborg í Reykjavík, Teigasel á Akranesi og Leikskóli Snæfellsbæjar.“ Fram kemur að atkvæðagreiðsla hafi staðið yfir dagana 21.-22. nóvember. Félagsfólk KÍ, sem vinnur í fyrrgreindum leikskólum, samþykkti verkfallið með nær öllum greiddum atkvæðum. Kjörsókn var mjög góð, á bilinu 94% til 100%. Verkföllin eru ótímabundin.