Síðdegis í gær komu kennarar á Akranesi og í Hvalfjarðarsveit saman til baráttufundar í Fjölbrautaskóla Vesturlands. Vildu þeir með fundinum sýna samstöðu og þétta hópinn í kjarabaráttu sinni. Eins og kunnugt er hefur hvorki gengið né rekið í viðræðum Kennarasambandsins við fulltrúa ríkis og sveitarfélaga. Verkfallsaðgerðir hafa staðið í nokkrum skólum frá því í lok október og fyrirséð að þær aðgerðir munu aukast ef ekki nást samningar. Í grunninn eru kennarar að fara fram á sambærileg laun og aðrar stéttir með sambærilega langt háskólanám. Vilja þeir að ríkið efni loforð sitt frá árinu 2016 um að jafna laun, en þá voru lífeyrisréttindi færð í sama horf og aðrar stéttir, en loforð um að lagfæra launaþáttinn hefur ekki verið efnt.