Rætt við Eld Smára Kristinsson oddvita Lýðræðisflokksins í NV kjördæmi

Lýðræðisflokkurinn býður nú í fyrsta skipti fram í öllum kjördæmum. Lista flokksins í Norðvesturkjördæmi leiðir Eldur Smári Kristinsson. Hann er fæddur á Sauðárkróki 13. nóvember 1979. „Foreldrar mínir eru Edda Lilja Hjaltadóttir frá Keflavík og Kristinn Jónas Björnsson frá Nýjabæ á Hofsósi. Ég er giftur Stuart Grahame Deville sem er fæddur 14. júlí 1972 í Lower Hutt á Nýja-Sjálandi. Við giftumst í Ráðhúsinu í Kaupmannahöfn 13. apríl 2019. Við erum barnslausir, en miklir dýravinir,“ segir Eldur Smári. „Í dag starfa ég aðallega við skrif og held fyrirlestra um samfélagsleg málefni sem eru mér hugleikin. Ég er félagsþjálfi, en starfaði lítið sem slíkur þar sem örlögin fóru með mig á braut sölumennsku. Ég starfaði lengst af hjá alþjóðlegum stórfyrirtækjum í Bretlandi eins og Air France KLM, Eastman Kodak og síðast sem sölustjóri Norðurlandanna hjá Kimberly Clark Professional sem fólk kannski þekkir best undir vörumerkinu Kleenex eða Andrex.“

Vill að rödd venjulegs fólks heyrist

En varðandi pólitíkina; hvað heillaði við hana og á Eldur fyrirmynd í stjórnmálum? „Ég er í grunnin ekki neinn stjórnmálamaður. Ég er í raun samfélagsrýnir. Það er á þeim grunni sem ég voga mér að stíga inn á þetta pólitíska svið. Það er mín sýn að atvinnustjórnmálamenn hafa brugðist skyldum sínum og borið langt af leið. Ástæður þess eru eflaust margvíslegar, en breytt fjölmiðlaumhverfi, samfélagsmiðlar og aukinn hraði upplýsingaflæðis spila þar stórt hlutverk. Sífellt færri stjórnmálamenn þora að segja hvað þeir eru að hugsa, en segja frekar það sem þeir telja vera leyfilegt að segja hverju sinni. Of margir hafa t.d. þróað með sér raunveruleikahræðslu þar sem nánast enginn þeirra vill t.d. svara hversu mörg kyn mannfólks eru eða hvað kona sé. Þeir þora ekki að tala fyrir meira aðhaldi og ábyrgari stefnu í útlendingamálum. Þeir eru einnig orðnir of gjarnir á að tala máli erlendra hagsmuna og afla sem líta okkar vegna auðlindanna sem við erum svo lánsöm að eiga. Ég vil því að rödd venjulegs fólks fái að heyrast inni á Alþingi. Ég er algjörlega óbundinn og geng ekki erinda neins nema fólksins sem teystir mér og til mín leitar.“

Eldur talar þannig fyrir að við eflum tengslin við raunveruleikann á ný í öllu okkar daglega amstri. „Menntakerfið þarf að styrkjast og við verðum að leita til baka í grunninn þar sem við getum ekki sætt okkur við að helmingur drengja og þriðjungur stúlkna geti ekki lesið sér til gagns við lok grunnskóla. Einnig þurfum við að hætta að halda umdeildum kenningum hugmyndafræðinga um t.d. kyn og kynþáttahyggju að börnum sem að um staðreyndir séu að ræða. Börn hafa aldrei verið eins vansæl og þurft að glíma við andlegar raskanir. Við þurfum að ráðast á rót þess vanda. Hann er að finna í menntakerfinu að stórum huta.“

Minnka þarf hið sívaxandi bákn

Hvers vegna á fólk að kjósa þinn flokk? „Ég vona að fólk kjósi okkur vegna þess að við erum venjulegt fólk sem viljum vel. Við erum stoltir Íslendingar og ætlum aldrei að skammast okkar fyrir það. Við viljum búa í frjálsu, fullvalda íslensku ríki þar sem við stjórnum okkur sjálf. Við viljum endurvekja í fólki að frelsi fylgir alltaf ábyrgð. Að réttindum fylgja einnig skyldur. Við viljum taka til í ríkisrekstrinum; minnka hið sívaxandi bákn sem er íþyngjandi fyrir alla. Við viljum verja okkar fjármunum til innviðauppbyggingar og velsældar á Íslandi. Við viljum draga stórlega úr útgjöldum sem verða vegna óábyrgrar stefnu í málefnum hælisleitenda og gríðarlegri aukningu í alvarlegum glæpum og fjölda erlendra og innlendra glæpagengja. Við þurfum að ná stjórn á landamærunum okkar, og jafnvel endurskoða alþjóðasamninga líkt og Schengen og EES. Við ætlum að breyta lögum um Seðlabanka Íslands þannig að bankanum verður óheimilt að ákvarða stýrivexti hærri en 4% þannig að byrðar verðbólguskota skiptist jafnt á lánveitendur og lántakendur, ólíkt því sem gengur og gerist í dag. Við munum einnig taka húsnæðisliðinn út úr vísitölu neysluverðs sem mun lækka verðbólguna – eða öllu heldur gefa réttari mynd af henni. Þetta mun t.d. lækka greiðslubyrgði á íbúðaláni upp á 84 milljónir úr 600.000 kr á mánuði í 200.000.“

Gríðarleg sóknarfæri

Hvaða þrjú mál vilt þú setja á oddinn fyrir íbúa Norðvesturkjördæmi? „Eins og með alla landsmenn þá brenna efnahagsmálin mest á fólki. Hátt vaxtastig og okurstarfsemi fjármálageirans. Kjördæmið okkar er engin undantekning. En ef ég fæ að svara þessari spurningu, fyrir utan allt þetta sameiginlega sem á við um landið allt, þá eru samgöngumálin, nýliðun í bæði landbúnaði og sjávarútvegi ekki síst og bætt staðbundin heilbrigðisþjónusta. Þetta eru lykilatriðin fyrir því að samfélögin um allt kjördæmið nái að blómstra. Sóknarfærin eru gríðarleg!“

Hvað sérðu sem stærstu áskorunina fyrir NV-kjördæmið og hvernig viltu bregðast við henni? „Staðan í samgöngumálunum á Vestfjörðum er algjör þjóðarskömm. Við verðum að láta borgarlínuna hreinlega víkja fyrir Vestfjarðalínunni. Það skapast gríðarleg verðmæti á Vestfjörðum, og þau munu bara aukast við betri samgöngum. Það er ekki síst jafnréttismál að samgöngur í kjördæminu okkar séu til fyrirmyndar.“

„Við viljum búa í frjálsu, fullvalda íslensku ríki“

Rætt við Eld Smára Kristinsson oddvita Lýðræðisflokksins í NV kjördæmi

Rætt við Eld Smára Kristinsson oddvita Lýðræðisflokksins í NV kjördæmi