medium

large

thumbnail

1536x1536

2048x2048

small

custom-size

Frambjóðendur í NV kjördæmi hittust í pallborði í gærkvöldi

Eldgos hófst á tólfta tímanum í gærkvöldi

Höfuðáhersla á að samgönguinnviðir í kjördæminu stuðli að bættu umferðaöryggi“

„Við viljum búa í frjálsu, fullvalda íslensku ríki“

Málin rædd á skólafundi

Framboðsfundur í beinni hér í kvöld kl. 18:10

core/heading

<h2>Rætt við Eyjólf Ármannsson oddvita lista Flokks fólksins</h2>

core/paragraph

Undarfarnar vikur hefur Skessuhorn birt viðtöl við þá oddvita framboða sem bjóða fram í NV kjördæmi. Rætt er stuttlega við Eyjólf Ármannsson oddvita Flokks fólksins en hann hefur síðastliðið kjörtímabil setið á Alþingi. Eyjólfur er fæddur í Vestmannaeyjum, sonur hjónanna Guðjóns Ármanns Eyjólfssonar frá Vestmannaeyjum og fv. skólastjóra Stýrimannskólans í Reykjavík og Aniku Jónu Ragnarsdóttur, húsmóður og sjúkraliða. Hann er þriðji í röð fjögurra systkina. „Um gosnóttina flutti fjölskyldan frá Eyjum til Reykjavíkur þegar ég var þriggja og hálfs árs og ólst ég þar upp frá þeim tíma. Sem barn og unglingur var ég mjög mikið í sveit á Hrafnabjörgum í Lokinhamradal, milli Arnarfjarðar og Dýrafjarðar á Vestfjörðum, en móðurfjölskylda mín kemur þaðan. Býlið er enn í eigu fjölskyldunnar og dvel ég þar eins mikið og ég get á hverju ári,“ segir Eyjólfur.

Ekki að refsa fólki fyrir að vilja vinna

En hver eru helstu stefnumál Flokks fólksins á landsvísu annars vegar og hér í NV kjördæmi hins vegar? „Flokkur fólksins ætlar að útrýma fátækt á Íslandi og því óréttlæti sem því fylgir. Við ætlum að tryggja að allir fái að lifa mannsæmandi lífi og þá sérstaklega lágtekjufólk, öryrkjar og aldraðir. Við viljum að hætt verði að skattleggja fátækt og skattleysismörk verði hækkuð í 450.000 krónur á mánuði hjá þeim sem hafa lágar tekjur með „fallandi persónuafslætti.“ Það á að afnema skerðingar ellilífeyris vegna atvinnutekna hið fyrsta og það á aldrei að refsa fólki fyrir að vilja vinna. Það er okkar mat að hækka á sérstakt frítekjumark lífeyristekna í 100.000 kr. á mánuði og veita öryrkjum heimild til að prófa sig áfram á vinnumarkaði í tvö ár án skerðinga. Það er stjórnarskrárvarið atvinnufrelsi í landinu og það nær líka til öryrkja og aldraðra. Við berjumst fyrir því að starfsgetumat öryrkja, sem ríkisstjórnin lögfesti með nýju frumvarpi vorið 2023 og mun að óbreyttu taka gildi næsta haust, verði fellt úr gildi. Enginn metur getu fólks til að taka þátt í lífinu og veita sér sjálfsbjörg.“

Lagfæra ónýtt byggðakvótakerfi

Eyjólfur segir að FF berjist fyrir því að íbúar sjávarbyggða fái að njóta aukins réttar til að nýta sjávarauðlindina með jákvæðum áhrifum fyrir sjávarplássin. „Krafan okkar snýst um frjálsar handfæraveiðar smábáta og aukna línuívilnun. Tryggja þarf 48 strandveiðidaga á sumri, bæta við sóknardögum um vor og haust og þá viljum við afnema grásleppukvótann. Við þurfum að lagfæra ónýtt byggðakvótakerfi og bjarga brothættum sjávarbyggðum. Verðleggja á fisk samkvæmt markaðsverði og tryggja þarf samræmda vigtun sjávarafla á hafnarvog.“

Þjóðhagslega hagkvæmasta framkvæmdin

Önnur baráttumál Flokks fólksins sem snúa að kjördæminu segir Eyjólfur vera að gera þurfi átak í samgöngumálum kjördæmisins og greiða upp innviðaskuldina margnefndu við Norðvesturkjördæmi. „Nýja Sundabraut þarf að setja í algeran forgang en ég óttast að framkvæmdir muni ekki hefjast árið 2026 líkt og samningur ríkis og Reykjavíkurborgar kveður á um. Þetta er þjóðhagslega hagkvæmasta vegaframkvæmd á Íslandi og mun gjörbylta samgöngum í landinu; upp á Akranes, til Vesturlands og við norðvesturhluta landsins. Sundabraut myndi t.d. auka aðgengi ferðamanna að Vesturlandi. Einnig þarf átak í jarðgangnagerð og við ættum með réttu að vera að grafa tvenn jarðgöng á hverjum tíma. Við höfum ekki verið að grafa jarðgöng síðan gerð Dýrafjarðarganga var lokið árið 2020. Annað sem mætti nefna er að tryggja þarf afhendingaröryggi rafmagns með endurnýjun flutningskerfis og umhverfisvænum virkjanakostum í kjördæminu og hringtengingu til Vestfjarða og Snæfellsness. Raforka er undirstaða öflugs atvinnulífs. Tryggja þarf traustan lagaramma um fiskeldi og standa þarf vörð um búskyldubúið í hefðbundnum landbúnaði.“

Fjölbreytt kjördæmi

Nú hefur þú setið á þingi í tæplega eitt kjörtímabil. Hvað stendur upp úr eftir þann tíma, ekki síst varðandi kjördæmið? „Fyrir mig persónulega hefur þetta verið ánægjulegur tími. Starfið á Alþingi á vel við mig og breið starfsreynsla heima og erlendis og menntun nýtist vel en ég er menntaður lögfræðingur og las hagfræði í námi mínu í Bandaríkjunum. Ég hef verið varaformaður fjárlaganefndar og allsherjar- og menntamálanefndar, sem eru þungar nefndir og skýrir kannski eitthvað að ég var ræðukóngur á 154. löggjafarþinginu. Það sem stendur upp úr er hversu stefnulaus ríkisstjórnin hefur verið í mikilvægum málum eins og hælisleitendamálum og því að koma niður verðbólgunni.“

Varðandi kjördæmið þá segist Eyjólfur hafa hef ég fundið vel hve miklir möguleikar eru þar til atvinnuuppbyggingar á flestum sviðum. „Fjölbreytt og skemmtilegt kjördæmi. Tækifærin eru víða; í sjávarútvegi, landbúnaði, ferðaþjónustu og tækni. Kerecis á Ísafirði er þar gott dæmi. Ég held að mikil tækifæri séu í vinnslu þangs og þara en Norðmenn líta á það sem næsta útflutningsævintýri hjá sér. Svona mætti lengi telja. Ég tel að framtíð landsbyggðarinnar sé björt. Til þess að svo megi verða þarf uppbyggingu innviða, jöfn búsetuskilyrði og tryggja skilyrði til verðmætasköpunar. Þannig berjumst við líka gegn fátækt sem er forgangsmál Flokks fólksins.“

Stjórn á landamærum

Eyjólfur segir að málefni hælisleitenda hafi verið gjörsamlega stjórnlaus. „Við höfum verið að taka við margfalt, sjö til átta sinnum, fleiri umsóknum um alþjóðlega vernd en hin Norðurlöndin og árið 2022 vorum við í þriðja sæti yfir hlutfallslega flestar umsóknir. Þrjú lönd í Evrópu tóku á móti flestum umsóknum frá Vensúela, en það voru Þýskaland, Spánn og litla Ísland. Umsóknum hefur fækkað sl. mánuði en áfram er talið að umsækjendur um alþjóðlega vernd verði eftir sem áður mun fleiri en á árum áður og verði á bilinu 2.500-3.500. Þetta er samkvæmt upplýsingum frá stjórnvöldum. Þetta felur í sér gríðarlegt álag á inniviði okkar, skóla og fleira, kemur í veg fyrir fullnægjandi inngildingu og kostar ríkissjóð gríðarlegar fjárhæðir, eða tugi milljarða. Við verðum að ná stjórn á landamærum okkar.“

Eyjólfur nefnir annað mál sem stendur upp úr og segir það snúa að stefnuleysi ríkisstjórnarinnar í baráttunni gegn verðbólgunni. „Þar er um algert aðgerðaleysi að ræða og ríkisfjármálunum ekki beitt í þeirri baráttu. Við erum með 9% stýrivexti, hæstu vexti á Vesturlöndum. Í upphafi haustþings var verðbólgan án húsnæðisliðarins um 3,6%. Hún hefur eitthvað lækkað en ekkert er gert til að taka á húsnæðivandanum sem er einn helsti drifkraftur hennar. Íbúafjölgun á Íslandi hefur verið um 15% frá árinu 2017. Vegna náttúruhamfara hurfu um 1.200 íbúðir í Grindavík af húsnæðismarkaði. Gríðarleg fjölgun hælisleitenda sl. ár hefur aukið eftirspurn eftir húsnæði. Umsóknir þeirra hér á landi hafa verið hlutfallslega margfalt fleiri en á hinum Norðurlöndunum og í þriðja sæti yfir hlutfallslega flestar umsóknir í Evrópu. Það er rétt sem segir í fjárlagafrumvarpinu að stærsta áskorun samfélagsins í húsnæðismálum á næstu árum snýr að því að tryggja nægt framboð á húsnæði. Hér er átt við húsnæði fyrir lág- og millitekjufólk og fyrstu kaupendur, ekki lúxusíbúðir fyrir efnafólk á rándýrum lóðum í miðborg Reykjavíkur. Verðbólgan mælist nú 6%, en án húsnæðisliðarins er hún um 3,6%. Ríkisstjórnin hefur brugðist í baráttunni gegn verðbólgunni og ríkissjóður er rekinn með halla, sem ýtir undir verðbólgu. Helsta áskorunin er að tryggja nægt framboð á húsnæði. Það hefur núverandi ríkisstjórn ekki gert. Hér þarf stórátak með sterkri aðkomu ríkisins í að byggja húsnæði fyrir. Markaðsbrestur er á húsnæðismarkaði og ríkið þarf að stuðla að byggingu félagslegra íbúða. Við þurfum að brjóta land og byggja.“

Ná fótfestu sem ábyrgur flokkur

Hvert er markmið flokksins í kosningunum 30. nóvember, á landsvísu og hér í kjördæminu? „Markmið flokksins nú í kosningunum er að halda áfram að stækka og ná frekari fótfestu sem ábyrgur stjórnmálaflokkur sem berst fyrir því að útræma fátækt í okkar ríka landi, vera málsvari þeirra tekjuminni, öryrkja og aldraðra, og sérstaklega að vera málsvari sjávarbyggðanna, einkum í Norðvesturkjördæmi og landsbyggðarinnar í heild með baráttu fyrir jöfnun búsetuskilyrða og atvinnufrelsi í landinu. Það gerum við með nútímainnviðum og bættum samgöngum. Gerum við það er framtíðin björt fyrir landsbyggðina og Akranes sem er stærsti byggðakjarni í kjördæminu,“ segir Eyjólfur að endingu.

Fréttaveita Vesturlands

„Ríkisstjórnin hefur brugðist í baráttunni gegn verðbólgunni“