Á fundi skóla- og fræðslunefndar Stykkishólms 12. nóvember sl. fór umsjónarmaður yfir starfsemi frístundar grunnskólans, Regnbogalands, þar sem kom fram að tekist hefur að ráða inn nýtt starfsfólk og að mikil ánægja væri með starf Regnbogalands meðal barna og foreldra. Næst á fundinn kom Þóra Margrét Birgisdóttir, skólastjóri grunnskólans, sem fór yfir starfsemi skólans og rætt var um hvort endurskoða ætti fyrirkomulag danskennslu. Einnig var rætt um þrif á húsnæði skólans og þar kom fram að Þóra Margrét mun skoða verklagsramma um þrif stofnana varðandi stærð og umfang. Umræða skapaðist um eineltismál og hvernig væri best að bregðast við þeim og mikilvægt væri að allt samfélagið tæki þátt í að koma í veg fyrir einelti.