Rætt við Guðmund Hrafn oddvita Sósíalistaflokksins í NV kjördæmi

Sósílistaflokkur Íslands býður fram í öllum kjördæmum fyrir alþingiskosningarnar í lok mánaðarins. Oddviti listans í Norðvesturkjördæmi er Guðmundur Hrafn Arngrímsson. Ég er sonur Arngríms Kristinssonar og Margrétar S. Hannesdóttur Gunnarsdóttur. Í föðurætt liggur ættleggurinn norður í Skjaldabjarnavík og Eyri við Ingólfsfjörð í Árneshreppi á Ströndum. Ég er skírður í höfuðið á ættföður Eyrarmanna, Guðmundi Arngrímssyni. Í móðurætt liggja ættir í Hnífsdal og Reykhólasveit. Ég ólst upp og bjó í Bolungarvík fram á þrítugsaldur og búa foreldrarnir mínir enn þar. Ég fór í Fjölbrautaskóla Vesturlands á Akranesi þar sem ég var fóstraður af föðurbróðir mínum. Ég lærði að sama skapi grjót- og torfhleðslur hjá öðrum föðurbróðir mínum, en ég er þeirra einstöku gæfu aðnjótandi að eiga sjö föðurbræður og hafa átt sex föðursystur.“

Sérhæfður í útikennslu

Guðmundur Hrafn segir að eftir nokkuð brokkgenga skólagöngu hafi hann flutt til Danmerkur 28 ára gamall og farið í háskólanám. „Ég stundaði nám í orkuverkfræði í eitt ár en fór strax í nám í landslagsarkitektúr. Eftir að ég flutti heim síðla árs 2007 vann ég við landslagshönnun og skipulag, en um það bil ári seinna eða haustið 2008 missti ég þá vinnu. Í kjölfarið hóf ég að skipuleggja ýmis ungmennaverkefni í Grafarholti, en þar bjuggum við fjölskyldan. Úr þessu brölti leiddist ég inn í að kenna ungmennum á náttúruna og umhverfið. Ég stundaði útikennslu með börnum á öllum skólastigum í nokkur ár og var fenginn til að þjálfa aðra kennara í því sama. Yfir átta ára tímabil þjálfaði ég um 700 kennara frá yfir 50 löndum í að nýta sér umhverfi skólanna í kennslu á námskrársfögum. Síðustu ár hef ég unnið mikið inni á hálendinu við stígagerð fyrir Umhverfisstofnun ásamt því að sinna hagsmunabaráttu fyrir leigjendur sem formaður Leigjendasamtakanna.“

Afbraskvæða húsnæðismarkaðinn

Guðmundur Hrafn segir að helstu stefnumál Sósíalistaflokksins á landsvísu séu að breyta starfsháttum á Alþingi í þá veru að öll ákvarðanataka taki fyrst og fremst mið af hagsmunum almennings, en ekki fjármagns. „Að auðlindir lands og hafs verði nýttar í innviðauppbyggingu og til að standa undir uppbyggingu og rekstri á grunnkerfum landsins. Eitt af aðaláherslum sósíalista er að af-braskvæða húsnæðismarkaðinn, setja hömlur á uppkaup stóreignafólks og fjárfesta á íbúðum, setja viðmið og hámark fyrir húsaleigu.“

Vegakerfið þjóni atvinnuvegum

Helstu stefnumál Sósíalstaflokksins sem varða Norðvesturkjördæmi eru að handfæraveiðar verði gefnar frjálsar og að allur landaður bolfiskur í höfnum landsins verði seldur á markaði. „Sósíalistar leggja höfuðáherslu á að samgönguinnviðir í kjördæminu stuðli að bættu umferðaöryggi og greiðari samgöngum innan kjördæmisins. Það er sérstaklega mikilvægt að vegakefið þjóni atvinnnuvegum og þörf íbúa til þess að sækja sér þjónustu, menntun, frístundir og afþreyingu innan og á milli héraða. Vegakerfið á Vestfjörðum þarf sérstaka athygli og mikilvægt að íbúar þar búi við sömu gæði og öryggi og íbúar annarsstaðar á landinu. Í allri stefnumörkun hjá Sósíalistaflokknum eru hagsmunir almennings í forgrunni, að arður af verðmætasköpun verkafólks verði til þess að bæta lífsgæði þess sem og að arður af nýtingu auðlinda í þjóðareign fari mikið meiri mæli til fólksins en ekki fjárfesta.“

Hafa skilað árangri án þingsetu

„Sósíalistaflokkurinn er fjöldahreyfing,“ segir Guðmundur Hrafn; „þar sem hagsmunir almennings eru í fyrirrúmi, þar sem stóra verkefnið er að minnka tangarhald auðstéttarinnar á stjórnvöldum. Sósíalistar hafa nú þegar haft mikil áhrif á samfélagið án þess þó að eiga fulltrúa á þingi. Það höfum við gert með því að taka þátt í því að styrkja og byggja upp Samstöðina, sem er orðin mikilvægasti fjölmiðill landsins fyrir samfélagsumræðu, með endurreisn Leigjendasamtakanna, með því að hafa mikil áhrif innan borgarstjórnar Reykjavíkur og með því að endurlífga alvöru verkalýðsbaráttu með tilkomu Sólveigar Önnu í formennsku Eflingar.

Við finnum fyrir miklum meðbyr og hversu ólík við erum öðrum framboðum með einföldum skilaboðum um hversu mikilvægt er að breyta starfsháttum á Alþingi, að arður af auðlindum fari í innviðauppbyggingu, stöðva einkavæðingu og markaðsvæðingu á innviðum, svo sem á húsnæði, heilbrigðisþjónustu og menntun,“ segir Guðmundur Hrafn að endingu.

Höfuðáhersla á að samgönguinnviðir í kjördæminu stuðli að bættu umferðaöryggi“

Rætt við Guðmund Hrafn oddvita Sósíalistaflokksins í NV kjördæmi

Rætt við Guðmund Hrafn oddvita Sósíalistaflokksins í NV kjördæmi