Á ellefta tímanum í gærkvöldi hófst eldgos við Sundhnúksgígaröðina á Reykjanesi. Í aðdraganda þess hafði aukin skjálftavirkni mælst á svæðinu og merkja mátti breytingu á þrýstingi við borholur í Svartsengi. Neyðarstig almannavarna var virkjað sem og samhæfingarmiðstöð. Staðsetning eldgossins er á svipuðum slóðum og í eldgosinu þegar síðast gaus í ágúst. Lengd gossprungunnar er um þrír kílómetrar og er syðri endi hennar við Sýlingarfell. Lögregla og almannavarnir hófu strax að rýma Grindavík og Bláa lónið, en talið er að gist hafi verið í um fimmtíu húsum í Grindavík undanfarnar nætur.

Strax í nótt fór að draga úr virkni gossins en hún var mest um miðja sprunguna. Hraunflæði er til vesturs og norðurs. Vestari hrauntungan, sú sem rennur milli Sýlingafells og Stóra Skógfells, rann yfir Grindavíkurveg síðla í nótt og nálgast Njarðvíkuræð. Áætlað hraunrennsli í morgun á þeirri hrauntungu var um 300 metrar á klukkustund. Nyrðri hrauntungan rennur ekki í átt að neinum innviðum. Samkvæmt nýjustu fréttum hefur heldur dregið úr virkni eldgossins.