Fjölnir og Snæfell mættust í fyrstu deild kvenna í körfuknattleik í gærkvöldi og var viðureignin í Dalhúsum í Grafarvogi. Leikurinn byrjaði alls ekki vel fyrir gestina því þær skoruðu ekki stig á fyrstu þremur mínútunum og misstu boltann frá sér fimm sinnum á meðan Fjölnir setti niður fyrstu níu stigin. Carlotta Ellenrieder kom þeim síðan loks á blað en svo var það sama sagan, lítil sem engin hittni og staðan var 23:7 Fjölni í vil eftir sjö mínútna leik. Þegar fyrsta leikhluta lauk var staðan 28:14 og Snæfell í ekki mjög góðum málum.