Frostbiter fór fram á Akranesi um helgina

Hryllingsmyndahátíðin Frostbiter var haldin á Akranesi í níunda skiptið um liðna helgi. Hún hófst á Vesturgötu 48 (gamla Kiwanis salnum), með sýningu á myndinni Clownie & The Satanic Cult. Leikstjóri myndarinnar, Bjarni Gautur, sat svo fyrir svörum eftir sýningu myndarinnar. Um kvöldið var uppistand og hryllings barsvar (pubquiz) á Lighthouse Restaurant við Kirkjubraut. Í barsvarinu var hart barist og endaði með því að aðeins munaði hálfu stigi á fyrsta og öðru sætinu.

Að sögn Ársæls Rafns Erlingssonar skipuleggjanda voru alls sýndar 30 stuttmyndir alls staðar að úr heiminum en þar má nefna lönd eins og Indland, Spán, Bandaríkin, Bretland og auðvitað Ísland ásamt fleirum. Myndirnar voru sýndar í Tónbergi, sal tónlistarskólans, á laugardaginn. Síðar á laugardagskvöldinu var förinni heitið í keilusalinn á Vesturgötu þar sem tilkynntur var um sigurvegara stuttmyndahlutans og afhentir verðlaunagripir sem Brynjar Mar hannaði og smíðaði. Hátíðin endaði svo á því að Bergur Líndal eldaði kjötsúpu ofan í gesti og gangandi og spjall tekið um myndir dagsins.

Besta íslenska myndin var valin Gústi sterki og hefnd hafsins í leikstjórn Gunnjóns Gestssonar. Sú besta erlenda var kanadíska myndin Blood Line eftir Richard Rotter. Ársæll Rafn segir að hátíðin hafi gengið vel fyrir sig og voru gestir ánægðir með útkomuna og gæði mynda. „Við fengum gesti frá Þýskalandi og Bandaríkjunum sem komu í heimsókn vegna hátíðarinnar og þá mættu tveir íslenskir leikstjórar og einn framleiðandi. Gestum gafst síðan færi á að spyrja kvikmyndagerðarfólkið um myndirnar eftir sýningar og sköpuðust oft skemmtilegar umræður. Við gátum ekki annað heyrt á okkar gestum en að þeir væru mjög sáttir og við erum strax farin að hlakka til þeirrar næstu. Sú verður númer tíu í röðinni og vonandi verður hún skemmtilegasta og stærsta hátíðin frá upphafi,“ segir Ársæll Rafn.

Gústi sterki og hefnd hafsins bar sigur úr býtum

Frostbiter fór fram á Akranesi um helgina

Frostbiter fór fram á Akranesi um helgina