Húsnæðis- og mannvirkjastofnun hefur staðfest stofnframlag til byggingar nýrra Nemendagarða við Menntaskóla Borgarfjarðar í Borgarnesi. „Þessi staðfesting þýðir að Nemendagarðar hafa fullfjármagnað sinn hluta byggingarinnar sem mun rísa við Borgarbraut 63,“ segir Bragi Þór Svavarsson skólameistari í samtali við Skessuhorn. „Fyrir MB og framtíðarnemendur eru þetta frábær tíðindi sem styrkja enn frekar fjölgun og fjölbreytileika nemenda hér í skólanum. Fram undan eru því spennandi tímar uppbyggingar í áframhaldandi góðu samstarfi Nemendagarða MB og Brákarhlíðar sem byggir á viljayfirlýsingu þessara stofnana frá því árið 2022,“ segir Bragi Þór.