Snæfell og ÍR tókust á í 1. deild kvenna í körfuknattleik í gær og var leikurinn í Stykkishólmi. Snæfell hafði tapað síðustu tveimur leikjum í deildinni eftir að hafa unnið fyrstu tvo á meðan ÍR vann sinn fyrsta sigur í síðustu umferð eftir þrjá tapleiki þar á undan.

Liðin voru ekki að finna fjölina í byrjun leiks, þau hittu illa og staðan 5:6 fyrir ÍR eftir fimm mínútna leik. Leikmenn liðanna fóru síðan aðeins að hitna seinni hlutann og staðan eftir fyrsta leikhluta var 16:18, gestunum í vil. Þeir byrjuðu betur í öðrum leikhluta og voru komnir með tíu stiga forystu, 27:37, þegar fimm mínútur voru liðnar. Heimakonur reyndu að klóra í bakkann og Danielle Shafer setti fimm stig niður í röð fyrir þær en ÍR svaraði á móti með átta stigum í röð og leiddu með 13 stigum þegar flautað var til hálfleiks, staðan 37:50.

Snæfell náði að minnka muninn niður í fimm stig um miðjan þriðja leikhluta, 49:54, með góðu 12-4 áhlaupi en náði ekki að fylgja því eftir og munurinn á milli liðanna var kominn í tólf stig fyrir síðasta fjórðunginn, staðan 57:69 fyrir ÍR. Hittni liðanna var ekki til fyrirmyndar fyrstu mínúturnar í fjórða leikhluta og staðan var 63:74 eftir sex mínútur. Snæfell náði að minnka muninn í sex stig, 70:76, þegar innan við þrjár mínútur voru eftir og smá spenna komin í leikinn en gestirnir úr Breiðholtinu gáfu ekki fleiri færi á sér og unnu að lokum sjö stiga sigur, 73:80.

Ef tölfræðin er skoðuð úr leiknum er athyglisvert að af 73 stigum Snæfells komu aðeins tvö þeirra af bekknum á móti 45 stigum af 80 frá varamönnum ÍR. Útlendingarnir tveir hjá Snæfelli eru 25 og 29 ára en meðalaldur hinna leikmannanna sjö í þessum leik var tæp 18 ár. Reynsluleysi er því líklegasta skýringin en þess má geta að meðalaldur leikmanna ÍR í leiknum var 20 ár og því ekki mikill munur þar á. Það tekur eflaust tíma hjá ungu liði Snæfells að fóta sig í deildinni en framtíðin er björt hjá þessum ungu og efnilegu stúlkum úr Hólminum.

Danielle Shafer var stigahæst hjá Snæfelli með 30 stig, Carlotta Ellenrieder skoraði 22 stig og tók 20 fráköst og Valdís Helga Alexandersdóttir var með 11 stig. Hjá ÍR skoraði Thea Ólafía Jónsdóttir 25 stig, Stefanía Tera Hansen 21 stig og Victoría Lind Kolbrúnardóttir 10 stig.

Næsti leikur Snæfells er gegn Fjölni á morgun, þriðjudag, í Dalhúsum í Grafarvogi og hefst klukkan 19.15.

Snæfellskonur lutu í lægra haldi fyrir ÍR