Árlegur og alþjóðlegur minningardagur um fórnarlömb umferðarslysa var í gær. Að þessu sinni var athygli vakin á þeirri hættu sem getur skapast við að sofna eða dotta undir stýri. Rannsóknir Rannsóknarnefndar samgönguslysa hafa sýnt að svefn og þreyta eru meðal helstu orsaka banaslysa í umferðinni.

Minningarathafnir voru haldnar um allt land af þessu tilefni þar sem fórnarlamba umferðaslysa var minnst með einnar mínútu þögn. Viðbragðsaðilar í Borgarbyggð komu saman síðdegis í gær og fóru hópakstur um Hvanneyri með blá blikkandi ljós. Eftir aksturinn var einnar mínútu þögn þar sem viðbragðsaðilar vottuðu látnum í umferðinni virðingu sína.

Að baki minningardeginum stóðu Samgöngustofa, innviðaráðuneytið, Sjálfsbjörg, Landsbjörg, Neyðarlínan, Lögreglan og Vegagerðin.