Viðbragðsaðilar í Borgarbyggð munu klukkan 16 í dag fara hópakstur um Hvanneyri með blá blikkandi ljós. „Eftir aksturinn verður minningarstund hjá viðbragðsaðilum og þá er kjörið tækifæri fyrir áhugasama að kíkja á tækin. Þeim verður að öllum líkindum stillt upp á gömlu Torfunni. Tilvalið fyrir upprennandi björgunarsveitar, slökkviliðs, lögreglu eða sjúkraflutningafólk að skoða spennandi dót,“ segir í tilkynningu frá björgunarsveitinni Ok.
Minningardagur um fórnarlömb umferðarslysa er í dag
Árlegur alþjóðlegur minningardagur um fórnarlömb umferðarslysa er í dag. Að þessu sinni er vakin athygli á þeirri hættu sem getur skapast við að sofna eða dotta undir stýri. Rannsóknir Rannsóknarnefndar samgönguslysa hafa sýnt að svefn og þreyta eru meðal helstu orsaka banaslysa í umferðinni.
Minningarathafnir verða haldnar um allt land af þessu tilefni þar sem fórnarlamba umferðaslysa verður minnst með einnar mínútu þögn. Tilgangurinn með deginum er að minnast þeirra sem látist hafa í umferðinni; leiða hugann að ábyrgð hvers og eins í umferðinni. Að baki minningardeginum standa Samgöngustofa, innviðaráðuneytið, Sjálfsbjörg, Landsbjörg, Neyðarlínan, Lögreglan og Vegagerðin.