Kvenfélög landsins gefa á hverju ári tugmilljónir króna til hinna ýmsu menningar- og líknarmála, auk annarra samfélagsverkefna. Á landsþingi Kvenfélagasambands Íslands (KÍ), sem fram fór á Ísafirði í október, kom fram að á árunum 2021-23, gáfu kvenfélög innan KÍ alls 165.017.547 krónur til samfélagsins og munar um minna.

Alls mættu 220 kvenfélagskonur, víðs vegar að af landinu, á þingið á Ísafirði, ræddu saman á vinnustofum, hlýddu á fyrirlestra, kusu fulltrúa í stjórn og ályktuðu um ýmis mál sem á þeim brenna. Þá var fyrrum forseti KÍ, Guðrún Þórðardóttir, síðan heiðruð fyrir störf sín fyrir sambandið, konur og kvenfélögin.

Á vinnustofu á sunnudagsmorgun voru tvö mál til umræðu: Hvernig kvenfélögin geti veitt konum af erlendum uppruna stuðning á sínum svæðum annars vegar og hins vegar hvað kvenfélögin geti gert til að styðja við fólk á sínum svæðum þegar kemur að einsemd og einmanaleika.

Fjöldi ályktana var samþykktur á landsþinginu. Þar var m.a. samþykkt að hvetja til notkunar á þjóðbúningum við sem flest tækifæri, stjórnvöld hvött til að efla og bæta heilbrigðisþjónustu í landinu og landsmenn hvattir til að huga vel að andlegri heilsu. Það sé m.a. hægt að gera með því að njóta gæðastunda með fjölskyldu og vinum.

Kvenfélagasamband Íslands (KÍ) var stofnað árið 1930 sem sameiningar og samstarfsvettvangur kvenfélaganna í landinu. Í KÍ starfa nú 17 héraðs- og svæðasambönd með um 4000 félaga.

Guðrún Þórðardóttir, fyrrum forseti KÍ, var heiðruð fyrir 30 ára starf í þágu sambandsins. Hér er hún á mynd með Evu Björk Harðardóttur varaforseta og Dagmar Elínu Sigurðardóttur, sem var endurkjörin forseti KÍ.

Kvenfélög hafa gefið 165 milljónir á þremur árum