Fræðsludagur Reiðmannsins var haldinn laugardaginn 9. nóvember í Hjálmakletti í Borgarnesi, en síðari hluti dagskrár var í reiðhöll LbhÍ á Mið-Fossum. Reiðmaðurinn er nám sem í boði er hjá Endurmenntun LbhÍ og notið hefur mikilla vinsælda.

„Í Hjálmaklett mættu um 120 nemendur, þó fleiri hefðu skráð sig, en vegna veðurs var einhverjum nemendum ómögulegt að mæta. Fyrir þá sem ekki komust, var streymi í beinni útsendingu með frábærum mynd- og hljóðgæðum. Dagskrá fræðsludagsins var hin glæsilegasta,“ segir Randi Holaker verkefnastjóri Reiðmannsins, en hún lýsir deginum þannig:

„Einar Ásgeirsson fóðurfræðingur hélt mjög fræðandi erindi um vetrarfóðrun reiðhesta fyrir 1. árs nemendur. Sigurður Torfi Sigurðsson járningameistari fjallaði um járningar og hófhirðu á fræðandi hátt fyrir 2. árs nemendur. Susanna Braun dýralæknir flutti erindi sem hét „Á bak við skekkjuna“ og fjallaði um mikilvægi þess að þjálfarar hafi góða innsýn í heilsu og lífshætti hesta. Eftir það komu allir saman í stóra hátíðarsalnum þar sem Bergrún Ingólfsdóttir flutti frábæran fyrirlestur um knapaþjálfun, sem er afar mikilvægt og áhugavert efni fyrir alla hestamenn.

Eftir hádegi var Benedikt Líndal tamningameistari með fyrirlestur sem hann nefndi „Þjálfun á víðavangi“, sem er afar mikilvægt efni fyrir okkur hestamenn. Lagði m.a. áherslu á kyrrð, traust og vellíðan hestsins sem voru atriði sem hann talaði um og hversu mikilvægt það væri fyrir okkur öll. Í seinni hluta dagsins voru þrír reiðkennarar Reiðmannsins með sýnikennslu í glæsilegri reiðhöll á Mið-Fossum. Þeir voru eftirfarandi:

Haukur Bjarnason útskýrði og sýndi mikilvægi stjórnunar á spennustigi og vinnuformi í upphafi vetrarþjálfunar, hvernig hesturinn á að vera slakur, mjúkur og spennulaus með nánast ósýnilegar ábendingar. Aðaláherslan var á að bæta gangtegundir, líkamsbeitingu og burðargetu hestsins.

Árný Oddsdóttir tók síðan við og fjallaði um og sýndi notkun ábendinga og tímasetningar þeirra. Hún útskýrði mjög nákvæmlega hvernig hún notaði ábendingar og hvaða tímasetning væri mikilvæg. Árný gerði það þannig að allir áhorfendur áttu auðvelt með að skilja og fylgja því sem hún var að útskýra.

Bjarki Þór Gunnarson kom með fjögurra vetra meri og ræddi um hvernig sköpulag hefur áhrif á vetrarþjálfun, hvernig þjálfunar áætlun fyrir hestinn er sett með hliðsjón á byggingu hestsins. Með léttum tóni og húmor útskýrði Bjarki efnið og sýndi okkur hvernig þau unnu saman sem par. Fyrirlestrarnir og sýnikennslur voru einnig í streymi til þeirra nemenda sem ekki gátu mætt á staðinn.“

Randi segist ánægð með þátttökuna sem var stórkostleg. „Fræðsludagurinn er í stöðugri þróun ár frá ári og gaman að sjá hvað hann nýtur góðrar viðtöku hjá nemendum. Reiðmaðurinn/endurmenntun er í stöðugri sókn með þjónustu fyrir nemendur sýna, opnað hefur verið fyrir skráningu í keppnisnám sem fór af stað síðast liðinn vetur og naut góðrar hylli nemenda,“ segir Randi.

Vel sóttur Fræðsludagur Reiðmannsins