medium

large

thumbnail

1536x1536

2048x2048

small

custom-size

Segja veiðisögur annað kvöld í Halldórsfjósi

Rennibrautin í sundlauginni á Hlöðum fjarlægð á næstunni

Vel sóttur Fræðsludagur Reiðmannsins

Nokkuð mikið um hraðakstur í umdæminu

Drög að sóknaráætlun í Samráðsgátt – umsagnarfrestur að renna út

Önnur prentun af bókinni um Fornahvamm

core/heading

<h2>Rætt við Ingibjörgu Davíðsdóttur oddvita Miðflokksins í NV kjördæmi</h2>

core/paragraph

Skessuhorn hefur á síðustu vikum birt viðtöl við oddvita þeirra flokka sem bjóða fram í Norðvesturkjördæmi. Alls eru tíu listar í kjöri. Næst í röðinni er Ingibjörg Davíðsdóttir oddviti Miðflokksins. Fyrst er hún spurð um bakgrunn og uppvöxt, skólagöngu og fjölskyldu.

Sveitastelpa og mikið á heimavist

„Ég er frá Arnbjargarlæk í Þverárhlíð í Borgarfirði, fædd árið 1970 á Akranesi, næstelst fimm systkina og sennilega mesti grallarinn í hópnum. Foreldrar mínir eru Davíð Aðalsteinsson og Guðrún Jónsdóttir sem búa á Arnbjargarlæk. Ég á eina yndislega uppkomna dóttur. Svo eigum við mæðgur hundinn Zorba, sem er ægilega sætur tæplega tveggja ára pug. Mamma er frá Akranesi, af heimafólki þar kölluð Gunna í Guðnabæ, og á ég talsverðan frændgarð á Akranesi í móðurætt. Pabbi er frá Arnbjargarlæk en við eigum líka ættir til Breiðafjarðareyja, Reykhóla og Múla á Barðaströnd. Þannig að ég á ættir víða um kjördæmið,“ segir Ingibjörg.

Hún kveðst búa að talsverðri reynslu af veru í heimavistarskólum. „Ég byrjaði sex ára gömul í heimavist í Varmalandsskóla í Borgarfirði. Í framhaldi fór ég svo einn vetur í Héraðsskólann í Reykholti til að ljúka grunnskólaprófinu þar sem ekki var hægt að ljúka því frá Varmalandi. Eftir það fór ég í Menntaskólann að Laugarvatni þar sem líka var heimavist. Samantekið var ég því í heimavist frá sex ára til tvítugs. Ég segi stundum í gríni að ég hafi flutt að heiman sex ára. Að loknu stúdentsprófi frá ML fór ég í stjórnmálafræði í Háskóla Íslands (BA) og svo í framhaldi til Bretlands í Háskólann í Kent í Kantaraborg og tók meistaragráðu (MA) í alþjóðasamskiptum. Ég var síðan ráðin til starfa í utanríkisþjónustunni árið 1999 og síðan hafa liðið ríflega 25 ár! Þá var ég einnig ráðgjafi forsætisráðherra í utanríkismálum um þriggja ára skeið.“

Í utanríkisþjónustunni

Ingibjörg segir að í utanríkisþjónustunni undirgekkst hún flutningsskyldu eins og aðrir starfsmenn og hefur því flust á milli landa með reglulegu millibili eða sjö sinnum á liðnum 25 árum. „Ég hef m.a. verið staðsett í Genf, Vínarborg, London og Osló. Ég þekki það því vel á eigin skinni hvernig það er og hvað það er mikilvægt að tileinka sér t.a.m. tungumál og kynnast menningu landsins sem flutt er til.

Nú síðast var ég sendiherra Íslands í Noregi, fram til haustsins 2022, og þar stýrði ég starfsstöð utanríkisþjónustunnar frá 2019, yfir tíma covid heimsfaraldurs. Það tímabil var mér og dóttur minni mjög erfitt því hún hafði ekki flutt með mér til Noregs og fékk ekki heimild til að koma til Noregs á meðan faraldurinn gekk yfir vegna takmarkana á landamærunum. Á sama tíma gat ég ekki yfirgefið starfsstöðina sem ég var að stýra í gegnum þennan þunga tíma. Þetta var erfiður tími fyrir alla og þar var ég engin undantekning.“

Svaraði hvernig hún fann sitt „heima“

Aðspurð segist Ingibjörg hafa djúpar rætur í Norðvesturkjördæmi: „Rætur sem hafa togað í mig síðastliðin ár. Við heimkomu frá sendiherrastörfum í Noregi fór ég að vökva þessar rætur og er nú í tímabundnu leyfi frá utanríkisþjónustunni.“ En af hverju stjórnmálin nú? „Það sem ýtti þessum breytingum af stað má segja að hafi verið að ég var beðin um að svara því í sjónvarpsþættinum „Heima“ hvernig ég fyndi mitt heima á öllu þessu flakki um heiminn; þegar ég fæ litlu ráðið um hvar ég bý hverju sinni. Til að svara þurfti ég að fara í kjarnann minn; nefna eitthvað sem manneskja sem býr við flutningsskylduna gerir sem sjaldnast. Þá fann ég svo sterkt hvað íslensku rætur mínar eru sterkar, hvað landsbyggðin er mér kær og hvað mig langaði mikið til að leggja mitt af mörkum heima á Íslandi. Þannig að þá hófst næsta ævintýri – heima á Íslandi!“

Fæðutengd starfsemi og landbúnaður

Áherslumálin segir Ingibjörg m.a. verða þau að láta gott af sér leiða fyrir íslenskan landbúnað og aðra fæðutengda starfsemi. „Þegar ég uppgötvaði að það vantaði algjörlega stuðning og hvata fyrir frjóan jarðveg nýsköpunar í fæðutengdri starfsemi og landbúnaði, þá stofnaði ég Íslenska fæðuklasann sumarið 2024. Hann nær yfir hvers kyns fæðutengda starfsemi og landbúnað; ræktun, framleiðslu og vinnslu, en einnig sölu og neyslu. Klasinn er hvetjandi vettvangur samstarfs fyrirtækja, frumkvöðla og stofnana með verðmætaskapandi verkefni í fyrirrúmi og á einnig að stuðla að styrkingu byggða.“

Hallalaus fjárlög í fyrstu atrennu

En hvað telur Ingibjörg að brenni helst á kjósendum í NV kjördæmi, hver verða helstu baráttumálin og hvar ætlar hún að leggja áherslur? „Brýnustu málin á landsvísu eru efnahagsmálin og ríkisfjármálin. Verkefnið er að ná niður vöxtum hratt og örugglega með því að spara í ríkisrekstri og skila hallalausum fjárlögum í fyrstu atrennu. Á sama tíma ætlum við að lækka skatta. Það er hægt, við höfum gert það áður.

Þá eru bættar samgöngur í Norðvesturkjördæmi undirstaða áframhaldandi verðmætasköpunar og það er mikið áherslumál að hefja nauðsynlega uppbyggingu vegakerfisins. Þá skiptir miklu máli að tryggja fæðuöryggi þjóðarinnar og ég legg áherslu á innlenda landbúnaðar- og matvælaframleiðslu og mikilvægi aukinnar verðmætasköpunar á landi og á sjó. Við ætlum að hvetja og styðja við nýsköpun í íslenskri matvælaframleiðslu. Öflugur landbúnaður, matvælaframleiðsla og virðiskeðjan allt um kring – er lykillinn að kröftugri byggð.“

Við gerum það sem við segjum

En hvernig verður kosningabaráttunni háttað hjá ykkur í Miðflokki á þessum örfáu vikum sem til kosninga eru? „Þetta er snörp kosningabarátta og skipulagið tekur mið af því. Við verðum í stöðugu samtali við fólkið í kjördæminu og stefnum á að heimsækja sem flesta á sínum heimasvæðum. Við efnum til opinna funda til að ræða innihaldið - hvernig við förum áfram með Ísland. Þá verður einnig hægt að heyra í mér og öðrum frambjóðendum í viðtölum, hlaðvörpum og á öðrum öldum ljósvakans og samfélagsmiðlanna. Skilaboðin eru einföld; við gerum það sem við segjumst ætla að gera og það sýnir sagan.“

Að endingu; hverjar eru væntingar um árangur 30. nóvember? „Við finnum fyrir miklum stuðningi við okkar áherslur í Norðvesturkjördæmi og ég hef trú á því að sá stuðningur muni endurspeglast á kjördag.“

Fréttaveita Vesturlands

Skilaboðin eru einföld – við gerum það sem við segjum