Jón Þór Hauksson þjálfari ÍA tekinn tali um tímabilið í sumar

Skagamenn léku í sumar í Bestu deild karla í knattspyrnu eftir að hafa komist upp úr Lengjudeildinni á síðasta ári eftir eins árs dvöl. ÍA lauk leik í sumar í 5. sæti sem er besti árangur liðins í efstu deild síðan árið 2007 þegar liðið endaði í 3. sæti á eftir Val og FH. Jón Þór Hauksson var þjálfari ÍA á þessu tímabili eins og árin tvö á undan og blaðamaður Skessuhorns kom við hjá honum í síðustu viku til að fara yfir tímabilið með honum. Fyrsta spurning var einföld: Þegar þú horfir yfir tímabilið, ertu sáttur við niðurstöðuna? „Ég er ekki bara sáttur, ég er í skýjunum. Þetta er besti árangur ÍA í tólf liða deild frá upphafi og besti árangur liðsins í efstu deild síðan 2007. Miðað við að vera nýliði í deildinni og á hvaða stað við vorum fyrir tveimur árum síðan þegar við féllum úr deildinni síðast get ég ekki annað en verið ánægður með það sem hefur gerst síðan, bæði hvað varðar uppbygginguna á leikmannahópnum og mörgu fleiru sem gerir það að verkum að við eigum frábært tímabil. Auðvitað er maður ekkert búinn að jafna sig á því að hafa ekki fengið tækifæri til þess að keppa um Evrópusætið allt til enda. Það skilur eftir sig pínu vont bragð í munninum en þegar það ryk sest og maður jafnar sig á því, sem ég vona að maður geri einhvern tímann, þá held ég að það væri stórskrýtin greining á þessu tímabili að segja eitthvað annað en að það hafi verið frábært tímabil.“

Skrekkur í mönnum

Ef við förum yfir tímabilið í heild sinni þá hófst það í byrjun apríl þar sem þið tapið í fyrsta leik á móti Val á útivelli, vinnið síðan stórsigra á HK og Fylki en tapið síðan í Akraneshöllinni fyrir FH. Sex stig úr fjórum leikjum, var þetta ekki ágætis byrjun fyrir ykkur sem nýliða í deildinni? „Jú, ég held það. Byrjunin var erfið, það varð svolítið spennufall því okkur hafði gengið bara nokkuð vel á undirbúningstímabilinu. Við fórum í úrslitaleik á móti Breiðabliki í Lengjubikarnum meðal annars þannig að við fórum nokkuð brattir inn í tímabilið. Við fórum í frábæra æfingaferð til Tenerife svo að undirbúningurinn gekk að mörgu leyti virkilega vel og fórum á fleygiferð inn í mótið. Síðan lentum við á pínu vegg í fyrsta leik á móti Val þar sem var skrekkur í mönnum. Þetta var fyrsti leikur í úrvalsdeild eftir nokkurn tíma og menn urðu bara pínulitlir í sér sem voru mikil vonbrigði miðað við hversu vel liðið hafði spilað á köflum í aðdraganda mótsins. En sem betur fer þá náðum við að losa þann skrekk á móti HK í Kórnum, skoruðum mörg mörk og náðum Viktori í gang. Það tikkuðu ansi margir hlutir með okkur í þeim leik og við fylgdum því svo eftir með sama hætti á móti Fylki. Þannig að að mörgu leyti var það hrikalega öflug byrjun á mótinu þó að Valsleikurinn skildi mann eftir með smá áhyggjur af hvað væri að gerast fyrir liðið því við vorum þar mjög hikandi og nánast eins og í handbremsu í fyrsta leik mótsins. Það var mjög kærkomið að ná í sex stig og einnig það að við vorum að vinna alla réttu leikina í upphafi móts ef svo má segja.“

Maí hefst með slæmu tapi gegn Stjörnunni, þið vinnið síðan Vestra heima, gerið jafntefli við Fram og tapið heima fyrir Víkingi þar sem vafasamt víti ræður úrslitum. Þarna eruð þið í 8. sæti eftir átta umferðir með tíu stig, hvernig var staðan á liðinu þarna? „Hún var bara nokkuð góð, við vorum að vísu frekar óheppnir með meiðsli á þessum tímapunkti. Við misstum Marko Vardic sem hafði byrjað mótið alveg frábærlega og auk þess voru Albert Hafsteins og Rúnar Már nánast alveg frá fram að þessu. Ég held að tapleikurinn við Víking hafi sýnt okkur að við gátum farið með kassann úti gegn nánast hvaða liði sem er og það að vera flautaður út úr þeim leik setti blóð á tennurnar á mönnum og tvíefldi menn fyrir framhaldið. Sjálfstraustið var gott og trúin innan liðsins á þessum tíma var orðin mjög góð sem sýndi sig í næstu leikjum.“

Í byrjun júní náið þið góðum útisigri á móti KA, vinnið KR heima, gerið svo jafntefli við Breiðablik og júní lýkur með dramatískum sigri á Val með sigurmarki á lokamínútunni. Þarna eruð þið komnir upp í fjórða sætið með 20 stig og kominn mjög góður taktur í liðið en hver var ástæðan? „Ég held að þetta tap á móti Víkingi hafi svolítið sýnt mönnum það að við gætum farið í hvaða leik sem er og hvar sem er og unnið hann. Tapið gerði okkur fúla, við vorum bara klárlega rændir þar. Ekki bara með vítaspyrnudómi heldur heldur fylgdi rautt spjald í kjölfarið og gerði erfitt verkefni nánast ómögulegt. Þarna var liðið í frábæru standi, sjálfstraustið gott og trúin og andinn í hópnum alveg frábær. Liðið var á hrikalega góðum stað og leikmenn höfðu virkilega trú á því að geta unnið alla leiki og gerðu það næstum því.“

*Lið Skagamanna tímabilið 2024. Ljósm. kfía*

Hæðir og lægðir á löngu og ströngu tímabili

Stærsti sigur ÍA í langan tíma kom svo í byrjun júlí með sigri á HK, 8-0, en ykkur er síðan skellt harkalega niður á jörðina með tapi gegn Fylki. Jafntefli á móti FH fylgir í kjölfarið og júlí endar á slæmu tapi heima gegn Stjörnunni. Skrýtin úrslit og alls konar, hvernig er hægt að útskýra svona? „Ég held við höfum náð ákveðnum hápunkti eftir frábæran júnímánuð og vorum komnir á þann stað að trúa því að það væri nánast ekkert lið í deildinni sem gæti stoppað okkur. Það kom svo með þessari flugeldasýningu á Írskum dögum á móti HK og þetta var ekkert ósvipað og gerðist í fyrra. Eftir að hafa átt frábæran kafla í Lengjudeildinni töpuðum við 0-5 á heimavelli gegn Leikni í kjölfarið á frábærum sigri á móti Aftureldingu þannig að það er sambærilegur skellur. Það eru hæðir og lægðir á löngu og ströngu tímabili og úrslitin geta verið alls konar.“ Jón Þór bætir við að hver leikur hafi sitt eigið líf og það séu fullt af hlutum sem gerast í einum fótboltaleik þannig að oft geti þetta orðið niðurstaðan. „Í leiknum á móti Fylki náðum við okkur ekki á strik og Fylkir spilaði leikinn allt öðruvísi heldur en þeir gerðu í fyrri leiknum á móti okkur. Þeir komu okkur í opna skjöldu, komu okkur á óvart og þeir kláruðu leikinn með skyndisóknum. Á móti kemur að við vorum ekki alveg nógu þolinmóðir í þeim leik og hefðum átt að stjórna okkar eigin tilfinningum betur. Við urðum óþolinmóðir, ætluðum að skora í hverri sókn og spila leiftrandi geggjaðan sóknarbolta eins og einhverjir kóngar. Við gleymdum að gera einföldu hlutina rétt og vel sem var einkennandi fyrir okkur í sumar en það klikkaði rækilega í þessum leik. Ég veit ekki hvort menn voru bara einfaldlega farnir að líta of stórt á sig og liðið í heild sinni og þar á meðal ég. Ég hefði átt að undirbúa liðið betur gagnvart þessu en við vorum allir meðvitaðir um það að við vorum ekkert orðnir heimsmeistarar þrátt fyrir 8-0 sigur á móti HK. Síðan þegar á hólminn er komið er eitthvað sem gerist á ákveðnu augnabliki í leiknum, þú finnur það en nærð ekki að snúa því við. Ég held að leikmenn geti einnig alveg verið sammála þeirri tilfinningu að þetta er einhver bolti sem fer af stað sem þú veist að þú þarft að stoppa en þú nærð því ekki innan þessara níutíu mínútna. Eins og ég segi, það eru bara hlutir sem gerast í fótboltaleikjum sem gera það að verkum að úrslitin geta verið alls konar.“

Þið gerið jafntefli við Vestra í fyrsta leik í ágúst, svo koma tveir naumir sigrar gegn Fram og Víkingi en tap gegn Breiðabliki heima í hörkuleik með sigurmarki úr víti í uppbótartíma. Þið eruð í fimmta sæti með 31 stig þegar tvær umferðir eru eftir, var það ekki góð staða á þessum tímapunkti? „Það var virkilega flott frammistaða í þessum leikjum og við áttum auðvitað að vinna leikinn á móti Vestra á Ísafirði. Við skoruðum löglegt mark í fyrri hálfleik sem var ekki dæmt mark og síðan var tekið af okkur annað mark í seinni hálfleik þar sem við vorum ranglega dæmdir rangstæðir. Þetta var svekkjandi en við vorum á góðum stað og virkilega öflug spilamennska hjá liðinu á löngum köflum í þessum mánuði. Sex stig á móti Fram og Víkingi voru virkilega öflug og nauðsynleg en það var virkilega svekkjandi að tapa á móti Blikunum á síðustu mínútunni.“

Síðustu tveir leikir mótsins voru á móti KR sem tapast og þið vinnið síðan nauman en mikilvægan sigur á KA og sæti tryggt í efri hluta úrslitakeppninnar. Þið hljótið að hafa verið ánægðir með það? „Algjörlega, lokaleikurinn á móti KA var frábær sigur því það var á þessum tíma eitt heitasta lið deildarinnar, var búið að vera á miklu flugi og vann síðan Mjólkurbikarinn skömmu síðar. Það var virkilega sterkur sigur og strákarnir áttu það skilið. Mér fannst liðið verðskulda það að enda í efri hluta deildarinnar og frábær árangur að ná því hjá nýliðum í deildinni.“

*Úr leiknum örlagaríka við Víking. Ljósm. G. Bjarki Halldórsson*

Ansi stór biti að kyngja

Í úrslitakeppni efri hlutans tapið þið fyrstu tveimur leikjunum gegn Breiðabliki og Stjörnunni en vinnið síðan 4-1 sigur heima á móti FH. Þá eigið þið möguleika á sæti í Evrópu og mætið Víkingi á heimavelli í ótrúlegum leik sem, eins og alþjóð veit, ræðst á margra mati á dómaramistökum. Ertu búinn að jafna þig og hvað gerðist þarna eiginlega? „Stutta svarið er nei en ég hef góðan tíma til að jafna mig,“ segir Jón Þór og dæsir. „Þetta var ótrúlega svekkjandi niðurstaða, Víkingur er með frábært lið og leikir þessa liða hafa verið ótrúlegir undanfarin ár. Við höfum verið að ná frábærum úrslitum á móti Víkingi og þessi leikur var þvílíkur rússibani. Við skoruðum sigurmark sem var tekið af okkur, Víkingur fór í sókn og skoraði sigurmarkið sitt og þú einhvern veginn vissir hvorki í þennan heim né annan. Einhvern veginn var atburðarásin svo hröð og ótrúleg og grátlega ósanngjörn. Þarna var náttúrulega stolið af okkur úrslitaleik um Evrópusæti sem ÍA hefur ekki náð í síðan 2007. Ég á engin orð til að lýsa þessu, þetta var ótrúleg niðurstaða og mikið högg af því mér fannst liðið verðskulda það að vera í þessari stöðu. Þetta var ósanngjarnt gagnvart strákunum sem áttu það skilið að fá úrslitaleik í lok móts. Eins með Breka Þór sem skoraði markið og var búinn að vera mikið meiddur í sumar og á sínum ferli. Hversu geggjað hefði það verið fyrir hann að ná að skora sigurmarkið í þessum leik? En svona getur gerst því miður og ansi stór biti að kyngja og ég get alveg viðurkennt það að það er ótrúlega erfitt bara að hugsa um þetta.“

Sprungin blaðra

Síðasti leikur ykkar er á móti Val í lok október sem þið tapið stórt, 6-1. Var andlega hliðin á þrotum eftir Víkingsleikinn? „Já, þetta var sprungin blaðra. Allir sem komu að félaginu reyndu að gera sitt allra besta til að koma í veg fyrir það og ekki síst leikmenn. Mér fannst menn vel gíraðir fyrir þennan leik, ég hafði fína tilfinningu fyrir leiknum en auðvitað óttaðist maður það sem raungerðist að slæm byrjun í leiknum myndi mögulega slá okkur út af laginu á þennan hátt. Svo kom einnig inn í þetta að menn voru staðráðnir í því að skila okkur markakóngstitli en Viktor var í bílstjórasætinu fyrir þessa umferð hvað það varðar. Benóný Breki skoraði svo fimm mörk áður en okkar leikur hófst sem var högg fyrir stemninguna í liðinu okkar. Við vorum allir staðráðnir í því að gera allt sem við mögulega gætum til þess að Viktor fengi gullskóinn sem hann átti skilið og við myndum gera það með góðri frammistöðu. Ég viðurkenni það alveg að það var einn af stóru punktunum í uppbyggingu leiksins en fyrir leikinn á móti Val var ljóst að Viktor þurfti að skora fjögur mörk til að tryggja sér markakóngstitilinn sem var ansi stór veggur að klífa.“

Ef við horfum aðeins yfir liðið og spilamennsku leikmanna í sumar þá er hægt að nefna leikmenn eins og varnarmennina Erik Tobias Sandberg og Johannes Vall sem stóðu sig mjög vel og sóknarmanninn Viktor Jónsson sem skoraði grimmt. Það hlýtur að vera styrkur að hafa svona menn í sínu liði? „Ef við byrjum á Erik Tobias þá var hann ótrúlega vaxandi á þessu tímabili og að mínu mati besti hafsent deildarinnar. Hann smellpassaði inn í okkar lið, inn í okkar leikstíl og leikaðferð. Eðlilega þá tók það nokkra leiki fyrir hann að virkilega ná sér á flug og ef þú skoðar hans feril þá hefur hann verið mikið meiddur. En á góðum degi var það ekki nokkur spurning að hann var besti varnarmaðurinn í þessari deild og stóð sig einstaklega vel. Johannes Vall var á sínu þriðja tímabili með okkur og er frábær leikmaður. Það hentaði honum mjög vel að við breyttum um leikaðferð frá því í Lengjudeildinni í fyrra og þessi leikaðferð byggir mikið á því að vængbakverðirnir séu öflugir sóknarlega. Hann var það svo sannarlega, hann naut sín virkilega vel hérna í sumar og átti frábært tímabil. Viktor er magnaður sóknarmaður og elskar að spila í þessu liði. Hann sýndi það aftur í sumar hvers hann er megnugur og að hann er framherji í fremstu röð á íslenskan mælikvarða.“

Vonandi að sigla inn í stöðugleika

Hvernig er staðan á leikmannamálum? Eru einhverjir á förum og á að styrkja liðið fyrir næsta tímabil? Eins og staðan er í dag þá verða mjög litlar breytingar á leikmannahópnum milli ára. Við höfum gert miklar breytingar á leikmannahópnum síðustu þrjú ár og mögulega lengur aftur í tímann en það. Frá því ég tók við liðinu fyrir þremur árum síðan þá hafa orðið gríðarlegar breytingar milli ára. Við erum vonandi að sigla inn í stöðugleika í leikmannahópnum hvað það varðar þannig að ég á ekki von á miklum breytingum. Við fengum nýlega Ómar Björn Stefánsson frá Fylki sem er mjög kraftmikill og fljótur framherji sem ég hlakka mikið til að vinna með og við teljum að styrki okkar lið. Það verða ekki umfangsmiklar breytingar á leikmannahópnum en mögulega yfirgefa liðið leikmenn sem þurfa fleiri verkefni til þess að vaxa og dafna og þroskast sem leikmenn. Fá stærra hlutverk í öðrum liðum, til að bæta þá sem leikmenn og fá þá sterkari til baka sem er stór partur af okkar leikmannastefnu. Við höfum tekið marga þannig leikmenn á undanförnum árum sem hafa gegnt stóru hlutverki í hópnum hjá okkur og það hefur gengið mjög vel.“

Gríðarlega ánægðir með leikmannahópinn

Þú gerðir nýlega þriggja ára samning við ÍA. Hvernig sérðu fyrir þér næstu ár og hver er stefnan? „Það er ekkert launungarmál að við stóðum á pínu krossgötum fyrir tveimur árum síðan þegar við féllum úr úrvalsdeildinni og liðið var töluvert langt frá því eða leikmannahópurinn sem ég tel að samræmist stefnu eða gildum ÍA. Við erum gríðarlega ánægðir með núverandi leikmannahóp og hvernig hann er uppbyggður. Það hefur gengið mjög vel og hann er að stórum hluta byggður upp af uppöldum leikmönnum félagsins. Síðan höfum við náð að styrkja liðið með öflugum leikmönnum. Sú vinna varðandi uppbyggingu á leikmannahópnum er í mjög góðum farvegi. Það sem við auðvitað stefnum á er árangur, að ná stöðugleika bæði í deildinni og í þessum leikmannahóp. Til þess að ná því þá þurfum við áfram að taka réttu skrefin í því hvernig við byggjum upp okkar lið, hvernig við horfum á okkar sögu og hvert ÍA stefnir. Þetta hefur verið mikið jójó á þessari öld og nú reynir á að halda áfram að taka réttu skrefin. Við þurfum að læra af mistökum okkar á þessari öld, þau hafa verið mörg og eflaust höldum við áfram að gera mistök en við verðum að læra af þeim sem við höfum gert í gegnum tíðina. Það er mitt hlutverk og mitt markmið að ná að festa ÍA í sessi í efstu deild.“ Er langt í næsta titil? „Ég held að félagið hafi allt til alls til þess að koma sér í fremstu röð á ný í íslenskum fótbolta. Við munum hins vegar aldrei keppa fjárhagslega á félagaskiptamarkaðnum við stærstu liðin, það er bara staðreynd. Það hefur aldrei gerst í sögu félagsins, ekki einu sinni á gullaldartímabilum liðsins. Þá höfum við aldrei verið í þeirri stöðu að keppa um stærstu bitana, við höfum alltaf þurft að fara aðrar leiðir. Finna leikmenn sem styrkja okkar lið og falla að því sem við viljum gera og oftar en ekki verið frábærir í því. En til þess að vera góður í því þá þarftu að gera þér grein fyrir því hvað þú ert. Við þurfum að vera glerharðir á því að fylgja stefnu og gildum ÍA í þeim málum og stefnum að því á næstu árum,“ segir Jón Þór að lokum.

„Nú reynir á að halda áfram að taka réttu skrefin“

Jón Þór Hauksson þjálfari ÍA tekinn tali um tímabilið í sumar

Jón Þór Hauksson þjálfari ÍA tekinn tali um tímabilið í sumar