Alþjóðadagur sykursjúkra er á morgun, 14. nóvember. Af því tilefni býður Lionsklúbburinn Agla í Borgarnesi fólki að mæla í því blóðsykurinn í dag og næstu tvo daga einnig. „Það er heilmikið fjör á Hyrnutorgi hjá okkur Lionskonum í Öglu en við bjóðum ókeypis blóðsykurmælingu til að greina áhættu sykursýki. Markmið blóðsykursmælinga er að greina hugsanlega sykursýki. Við viljum með þessu vekja athygli fólks á hættunni af því að ganga með dulda sykursýki. Sykursýki er hættulegur sjúkdómur. Hann er ólæknanlegur en með réttri meðhöndlun er hægt að halda honum í skefjum og forðast fylgikvilla. Mataræði og líkamshreyfing eru hornsteinar meðferðar við sykursýki,“ sögðu þær. Blóðsykurinn hjá blaðmanni Skessuhorns var í 6,0 sem vissulega er í skammt rétt neðan við neðri mörk þess að þurfi að láta skoða ástandið betur.