Samtök sveitarfélaga á Vesturlandi voru í liðinni viku með íbúafundi á Vesturlandi um verkefnið Gott að eldast, vitundarvakning Félags- og vinnumarkaðsráðuneytisins um félagslega einangrun. Um var að ræða kynningu á þeirri þjónustu sem veitt er í sveitarfélaginu og stendur eldra fólki til boða. Það gengur út á að samþætta félags- og heilbrigðisþjónustu fyrir eldra fólk í heimahúsum og flétta vandlega saman þá þætti sem ríkið sér annars vegar um og sveitarfélögin hins vegar. Mánudaginn 4. nóvember voru fundir yfir daginn í Höfðaborg í Stykkishólmi, Samkomuhúsinu í Grundarfirði og í Félagsheimilinu Klifi í Snæfellsbæ. Daginn eftir voru fundir í Vínlandssetrinu í Búðardal og í Brákarhlíð í Borgarnesi og síðasta miðvikudag voru fundir í Miðgarði í Hvalfjarðarsveit og í FEBAN salnum á Akranesi.