medium

large

thumbnail

1536x1536

2048x2048

small

custom-size

Segja veiðisögur annað kvöld í Halldórsfjósi

Rennibrautin í sundlauginni á Hlöðum fjarlægð á næstunni

Vel sóttur Fræðsludagur Reiðmannsins

Nokkuð mikið um hraðakstur í umdæminu

Drög að sóknaráætlun í Samráðsgátt – umsagnarfrestur að renna út

Önnur prentun af bókinni um Fornahvamm

core/paragraph

Högni Bæringsson var gerður að heiðursborgara Stykkishólms við hátíðlega athöfn sl. laugardag. Tilkynnt var um valið á afmælistónleikum kórs Stykkishólmskirkju, að viðstöddu fjölmenni. Jakob Björgvin S. Jakobsson, bæjarstjóri ávarpaði salinn og stiklaði á stóru á langri og merkilegri ævi Högna, en óhætt er að segja að hann hafi sett svip sinn á samfélagið í Hólminum.

Högni fæddist 22. september 1935. Hann er sonur hjónanna Bærings Elíssonar, fæddur 9. maí 1899, látinn 30. maí 1991, og Árþóru Friðriksdóttur, fædd 23. desember 1904, látin 17. mars 1990. Högni kvæntist Sigurbjörgu Hönsu árið 1957. Hansa fæddist 23. janúar 1936, en hún lést 2. september 2011. Börn Högna og Hönsu eru: Ragnheiður, fædd 24. nóvember 1956, Helga Kristín fædd 27. febrúar 1961 og Högni Friðrik, fæddur 28. janúar 1970.

Högni ólst upp í Bjarnarhöfn, en foreldrar hans keyptu Bjarnarhöfn árið 1932. „Hann ólst upp hjá stórhuga foreldrum sem byggðu upp Bjarnarhöfn af miklum myndarskap. Á bænum var mikil vinna sem allir urðu að sinna. Bæring, faðir Högna, keypti fyrsta bílinn í sveitinni og vegur var lagður með handafli til Bjarnarhafnar. Eftir 19 ár í sveitinni var jörðin seld  og fjölskyldan flutti til Stykkishólms. Borg varð þá að miðstöð fjölskyldunnar,“ sagði Jakob í erindi sínu.

Bæjarverkstjóri í 30 ár

Lengst af sinnti Högni starfi bæjarverkstjóra fyrir Stykkishólmsbæ, en hann tók við því starfi vorið 1974 og lét ekki af því fyrr en um áramótin 2003-2004. Verkefni bæjarverkstjóra voru ærin á þessum árum, enda urðu miklar breytingar á bænum á þessum árum, fjöldi nýrra íbúðasvæða var tekinn í notkun og mikið að gera í áhaldahúsinu. Jakob gat þess að þrátt fyrir allar þessar annir hefði það aldrei komuð niður á skjótum viðbrögðum verkstjórans að sinna þeim fjölmörgu beiðnum sem daglega koma frá íbúum bæjarins, enda væru þjónustulund og hjálpsemi honum einfaldlega eðlislæg.

Ekki tími til að sofa

Fjallað var um Högna í Morgunblaðinu við það tilefni að hann lét af störfum sem bæjarverkstjóri. Þar var hann spurður út í það hvaða verk væri honum minnisstæðast á ferlinum og nefndi þá garðinn út í Súgandisey. Það hefði verið skemmtilegur tími, en um leið hefði verið svo mikið að gera að varla hefði gefist tími til að sofa.

Hann minntist einnig álagsins sem fannfergið í febrúar árið 1995 hafði í för með sér, en þá féll mesti snjórinn á hans starfsferli. Unnið var allan sólarhringinn til að bregðast við aðstæðum og Jakob sagði það einkennandi fyrir Högna. „Þetta þekkja Hólmarar vel í fari Högna, hann gerir það sem þarf að gera og gott betur. Það var ekki spurt um vinnutíma, Högni var alltaf til reiðu ef þörf var á. Þegar aðrir íbúar í Stykkishólmi fóru á fætur og héldu til vinnu var Högni iðulega búinn að taka rúnt, tína rusl í vegköntum og tryggja að allt væri eins og það ætti að vera, langt umfram það sem ætlast var til af honum í starfi.“

Hestar og slökkvistarf

Högni var ekki maður einhamur og hann gengdi stöðu slökkviliðsstjóra í Stykkishólmi um tíu ára skeið. Fyrir það fékk hann viðurkenningu fyrr á þessu ári, í tilefni af 110 ára afmæli slökkviliðs í Stykkishólmi.

Viðurkenningarnar sem Högna hafa hlotnast eru ekki þar með upp taldar, því hann fékk árið 2009 viðurkenningu frá öllum hestamannafélögum á Vesturlandi fyrir ómetanleg störf við fjórðungsmót og gullmerki Hestamannafélagsins Snæfellings árið 2013 fyrir sín störf fyrir félagið. Högni var í starfi Snæfellings og fór í fylkingarbrjósti þeirra sem báru uppi starfið á Kaldármelum og byggðu upp aðstöðu þar til hestaíþrótta þar sem ófá hestamannamótin voru haldin.

Þakklætisvottur

Jakob bæjarstjóri sagði, í erindi sínu, að Högni væri verðugur fulltrúi þeirrar kynslóðar sem með eljusemi vann að uppbyggingu í Stykkishólmi á 20. öldinni og spor hans sæjust víða. Hann hefði alltaf verið maður framkvæmda, gæddur bjartsýni og jákvæðni fyrir uppbyggingu í samfélaginu og störf hans og framganga væru til fyrirmyndar og til eftirbreytni.

„Þessi viðurkenning, kæri Högni, er þakklætisvottur frá okkur öllum. Hún er heiðursmerki fyrir framúrskarandi starf, en umfram allt fyrir þann heiðarlega og trausta mann sem þú hefur að geyma. Fyrir hönd bæjarbúa vil ég þakka þér fyrir allar þær óteljandi stundir sem þú unnið fyrir bæinn og bæjarbúa. Þú verður ávallt stór hluti af sögu Stykkishólms og sögu okkar Hólmara,“ sagði Jakob að lokum.

core/image

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2024/11/Hogni-Baeringsson-heidursborgari-i-Stykkisholmi_2-1200x800.jpg" alt="" class="wp-image-84971"/><figcaption>Kór Stykkishólmskirkju hélt tónleika á laugardaginn í tilefni af 80 ára afmæli sínu.</figcaption></figure>

Útnefning Högna sem heiðursborgara fór fram á 80 ára afmæli Kórs Stykkishólmskirkju. Af því tilefni var blásið til afmælistónleika, þar sem flutt var fjölbreytt dagskrá með tilvísun í kirkjuárið, ásamt veraldlegum lögum. Stjórnandi kórsins er Láslo Petö og meðleikarar á tónleikunum voru feðginin Þórhildur Hólmgeirsdóttir á píanó og Hólmgeir Sturla Þórsteinsson á bassa.

Fréttaveita Vesturlands

Högni Bæringsson gerður að heiðursborgara í Stykkishólmi