Lítið hefur verið róið í síðustu viku í Snæfellsbæ þar sem veður hafa verið válynd en þó hafa bátar sem róið hafa fengið ágætis afla, þegar veður hefur gefið. Veðurspá í vikunni er heldur alls ekki góð til róðrar. Á föstudag, 8. nóvember, gaf til sjósóknar fyrri part dags, en aflinn hjá dragnótabátum var þó ekkert til þess að hrópa húrra yfir.

„Þetta var með eindæmum lélegt,“ sagði Oddur Brynjarssonar, skipstjóri á dragnótabátnum Steinunni SH. „Það sem reddaði okkur var að við fengum eitt kast þar sem við fengum tvö tonn af kola en hin köstin voru varla upp í nös á ketti. Við náðum þó fjórum tonnum yfir daginn,“ sagði Oddur léttur í bragði þrátt fyrir að vera ekki ánægður með aflabrögðin og sagði bara að lokum: „Þetta kemur allt saman.“

Línubáturinn Kvika SH fór einnig á sjó og fór stutt út og náði fjórum tonnum og voru menn þar um borð bara ánægðir með þau aflabrögð.

*Víðir Herbertsson og Jóhann Stefánsson á Kviku SH að koma að landi. Ljósm. af*

Válynd veður hamla veiðum