Í dag, föstudag, er alþjóðlegur baráttudagur gegn einelti. Af því tilefni komu allir nemendur Brekkubæjarskóla og Grundaskóla á Akranesi saman í morgun fyrir framan stjórnsýsluhúsið við Stillholt. Þar trommuðu krakkarnir í alls sjö mínútur, sem er táknrænt fyrir hvern dag vikunnar sem við viljum öll hafa eineltislausan.

Nemendur skólanna mynduðu saman hring og inn í honum var trommusveit sem sá um taktinn. Nemendur voru mættir til þess að fagna fjölbreytileikanum og hvetja til umburðarlyndis því allir mega vera þeir sjálfir og enginn hefur rétt á að leggja aðra í einelti. Nemendur tóku með sér dollur, dósir, box og prik eða skeiðar til að tromma. Blaðamaður Skessuhorns var á staðnum, fangaði stemninguna og tók nokkrar myndir.