Veðurútlitið í dag hefur versnað á Vestfjörðum og Norðurlandi. Fyrir utan almenna spá um mikla veðurhæð kemur krappa lægðin við Vestfirði til með að slengja inn suðvestan-vindröst yfir norðanverða Vestfirði og Strandir. Allt að 28-32 m/s síðdegis, ofsaveður eða fárviðri og hviður um og yfir 50 m/s.  Í vestanverðum Skagafirði og Eyjafirði eru einnig horfur á mjög hvössum og byljóttum vindi, einkum síðdegis eða 23-28 m/s. Það er því ekkert ferðaveður um þessar slóðir síðdegis í dag.