Rætt við Sæþór Þorbergsson veitingamann og eiganda Narfeyrarstofu í Stykkishólmi um breytingar sem framundan eru

Narfeyrarstofa er einn þekktasti veitingastaður á Vesturlandi. Hjónin Sæþór Þorbergsson og Steinunn Helgadóttir hafa staðið vaktina síðan 2001, þegar þau opnuðu veitingastaðinn. Skessuhorn náði tali af Sæþóri þegar hann var að undirbúa kvöldvakt í síðustu viku. Framundan eru talverðar breytingar á fyrirtæki þeirra ef ekki næst að selja reksturinn áður.

Nýjasta verkefni nýbúið

Sæþór og Steinunn byrjuðu að breyta kaffihúsi í veitingastað en hafa frá upphafi verið að betrumbæta veitingastaðinn, hvort sem það er í formi matseðils eða húsnæðis. „Við byggðum við stigahúsið til að hafa aðgengi upp á efstu hæðina, við stækkuðum eldhúsið úr sjö fermetrum í 40 fm en einnig bættum við lager og kæla aðstöðu. Síðan datt Covid í gang og við tókum stóran séns á að fara í framkvæmd í kjallaranum. Mokuðu öllu út, brutum klappir, steyptum undir húsið og settum rennusteina til að grípa vatnið sem kæmi úr berginu. Við kláruðum það á sjö mánuðum og erum svakalega ánægð með hvað það var vel heppnað hjá okkur,“ segir Sæþór. „Við settum þetta á sölu fyrir nokkrum árum en hættum við þegar Covid skall á. Við fengum alveg að heyra að þetta væri nú ómögulegur tími til að gera eitthvað en við sjáum ekki eftir því. Hvenær er góður tími til að gera eitthvað? Við sáum að okkur vantaði rými því við vorum að vísa um 100 manns frá okkur á hverjum degi, en með því að koma þessu rými niðri í kjallara, þá geta viðskiptavinir sest niður og fengið sér drykk og snarl, meðan þeir bíða eftir borði og hefur þetta verið mjög góð rótering á húsinu,“ útskýrir Sæþór.

Skrokkurinn búin

„Við getum ekki haldið áfram, en skrokkurinn minn er búinn. Maður er bara búinn að standa vaktir alla daga í 14 tíma í senn. Ég er búinn að fara í fjórar hjartaþræðingar, er með slitnar sinar í báðum öxlum og búinn að slíta hásin. Ég er búinn að fara í liðskipti á mjöðm og er á leið í aðgerð á hinni mjöðminni. Maður er ekki búinn að fara vel með,“ segir Sæþór. Hann segist vona að einhverjir aðilar með eldmóð fyrir veitingabransanum séu þarna úti. „Mér finnst þetta bara sorglegt, en við erum búin að byggja upp mjög góðan orðstír, þetta er ekki þrotabú, við höfum haft sömu kennitöluna öll þessi ár og það er framundan spennandi tímar hér í Stykkishólmi og nágrenni. Húsið er í topp standi, við tókum allt í gegn um leið og við fórum í kjallarann og mun þetta hús standa hér næstu 150 árin,“ segir Sæþór.

Svítur á hverri hæð

Hjónin hafa verið í viðræðum við arkitekta ásamt ferðaskrifstofum. „Við höfum verið að ræða við ferðaskrifstofur um hvað sé vöntun fyrir hér á Snæfellsnesi og í Stykkishólmi, þegar kemur að gistingu. Við erum á fullu að hanna með arkitekt og erum búin að fá hugmyndir frá skrifstofunum um hvað fólk sækist eftir, hvað þarf að vera til staðar og svo framvegis,“ segir Sæþór. „Þetta rými hér verður ein svíta, efri hæð verður svíta og kjallarinn breytist í svítu. Við fækkum tækjum inn í eldhúsi, útbúum matsal þar inni og þar verður kokkur að elda, á meðan gestirnir fylgjast með. Hugmyndin er að gestirnir geta þá séð hvernig kokkurinn í eldhúsinu sé virkilega að standa sig,“ segir Sæþór og hlær.

Í stað þess að hafa 20 manns í vinnu, undirbúa kvöldmat fyrir 300 viðskiptavini alla daga, sér Sæþór fyrir sér rólegri kvöldstundir. „Okkar gestir verða ekki matarlausir. Þetta minnkar þá álagið á okkur en þá get ég verið að dúlla mér við að elda mat fyrir gestina okkar, sem verða þá sex til tíu manns. Það er allt annað umhverfi að vinna í en síðan ætlum við að vera með verktaka í þrifum hjá okkur. Einnig verður þá möguleiki á því að hópar geti leigt bæði miðhæð og efstu hæð hjá okkur en við höfum heyrt það frá ferðaskrifstofunum að það sé vöntun á slíkum svítum,“ segir Sæþór.

Ekki búin að setja í lás strax

Blaðamaður tekur eftir því að Sæþór er í kokkagallanum og matarilm leggur úr eldhúsinu. Þið eruð ekki búin að skella í lás? „Nei, nei við ætlum að opna núna klukkan 18.00 í kvöld og það er ágætlega bókað. Það hefur alveg verið rætt við okkur um kaup, en það hefur ekki komið tilboð, aldrei hitnað þannig,“ segir Sæþór. En hefur verið í umræðunni að leigja út reksturinn? „Við erum ekki til í að leigja reksturinn en við erum tilbúin að eiga fasteignina og selja reksturinn. Það er ekki heillandi að einhver komi hérna inn og skili þessu til okkar í misjöfnu ástandi. Annað hvort kemur fólk hérna inn og tekur reksturinn og við eigum þá fasteignina, eða við seljum allt. Við erum ekki að fara að leigja, það er alveg leið til glötunar,“ segir Sæþór með festu.

Styrkleik Stykkishólms

Stykkishólmur er gríðarlega vinsæll meðal ferðamanna og sjáum við ferðamenn fyrir utan vigtarskúrinn við Stykkishólmshöfn taka myndir af sér sjálfum, en vinsælt er að leika eftir atriði úr bíómyndinni The secret life of Walter Mitty sem tekin var þar upp að hluta. „Við byrjuðum um vorið 2001 með veitingastaðinn en það sama ár var flogið á tvíburaturnana í New York og við fengum að heyra að það væri enginn að fara að hoppa upp í flugvél í bráð. Það ár komu samtals 280 þúsund ferðamenn til Íslands og hafa breytingarnar verið svakalegar. Það hefur samt alltaf verið umferð hér í Stykkishólmi af ferðamönnum og er það styrkleiki hér í Stykkishólmi hvað það eru öflug fyrirtæki í gistiþjónustu hér. Með sumarbústöðum, hótelum og gistiheimilum eru hér um 1000 rúm fyrir ferðamenn sem er töluvert. Við erum svona endastaður, þar sem ferðamenn enda sinn dag, fara út, finna sér veitingastað og virða fyrir sér gamla bæinn. Þess vegna er Stykkishólmur svona ofboðslega verðmætur sem ferðamannastaður,“ segir Sæþór.

Samtal á milli veitingastaða

Fimm veitingastaðir eru í Stykkishólmi, í 1.400 manna samfélagi. „Það er alveg slegist um traffíkina en það er alveg magnað að það skuli allt vera opið hérna í bænum. Heimafólkið ásamt ferðamönnum hefur verið duglega að heimsækja þessa staði en við sem erum í þessum bransa erum í góðu samtali – og ef eitthvert af okkur ætlar að hafa lokað yfir helgi til dæmis, þá reynum við að láta vita af okkur, þannig að það komi ekki neinum á óvart. Við höfum verið í góðu sambandi við alla veitingaaðila hérna í Stykkishólmi og vonumst við til að halda því samstarfi áfram,“ segir Sæþór.

Erum að flýta okkur hægt

Sæþór segir að þau hjónin ætli að fara í breytingar á sínum forsendum. „Við ætlum að gera þetta rétt, vera með opið veitingahúsið, þangað til þetta verður tilbúið í framkvæmdir en þá verður þetta tekið með látum. Við erum ekki með neinn tímaramma, ætlum að gera þetta rétt frá upphafi en það eru þær forsendur til að svona hlutir gangi upp. Undirbúa allt vel en kannski breytist eitthvað, hver veit. Stýrivextir eru að lækka, verðbólga að lækka og kannski rankar einhver við sér. Þetta er ekki óskastaða hjá okkur að breyta þessu, því það er þörf fyrir þetta fyrirtæki og það yrði tjón ef þetta endar svona. Ég horfi allavegana á þetta þannig,“ segir Sæþór að lokum.

Það er ekki óskastaða hjá okkur að breyta þessu

Rætt við Sæþór Þorbergsson veitingamann og eiganda Narfeyrarstofu í Stykkishólmi um breytingar sem framundan eru

Rætt við Sæþór Þorbergsson veitingamann og eiganda Narfeyrarstofu í Stykkishólmi um breytingar sem framundan eru