Samband borgfirskra kvenna, SBK, var með kaffihúsakvöld fyrir allar kvenfélagskonur í héraði í Skemmunni á Hvanneyri síðastliðið þriðjudagskvöld. „Þetta var skemmtilegt kvöld og góð mæting,“ segir í tilkynningu. „Bjarni Guðmundsson sagði okkur frá sögu mjólkurskólanna á Hvanneyri og Hvítárvöllum sem konur fengu aðgang að rétt eftir aldamótin 1900. Bjarni hefur einmitt skrifað bók um þetta sem heitir Konur breyttu búháttum. Einnig kom Selma Ágústsdóttir og söng nokkur lög fyrir okkur. Þetta er í annað skipti sem við höldum kaffihúsakvöld, vorum einnig með í fyrravetur. Þetta er góður vettvangur fyrir okkur að hittast og kynnast betur í okkar stóra og dreifða héraði.“