Starfsmenn Faxaflóahafna, Sigurður Jökull Ólafsson og Jóhann Páll Guðnason, brugðu undir sig betri fætinum í gær og fóru á jólatrésveiðar alla leið að endimörkum Skorradals. „Eftir langa og mikla göngu um heiðar og skóga uppsveita Borgarfjarðar fundu þeir loks undursamlegt vel vaxið 14 metra sitka greni. Eftir mælingar og úttektir Viktors Steingrímssonar og Arons Snæs Fannarssonar skógarhöggsmanna hjá Landi og Skógi í Skorradal, voru allir sammála að þetta yrði Hamborgartréð sem ætti eftir að prýða Miðbakkann, öllum til gleði og yndisauka sem heimsækja Gömlu höfnina í höfuðborginni yfir hátíðarnar,“ segir í tilkynningu frá Faxaflóahöfnum.