Undir lok síðustu viku var gengið frá ráðningu sr. Maríu Guðrúnar Ágústsdóttur í starf sóknarprests í Reykholti í Borgarfirði. Þrjár umsóknir bárust um starfið og var það niðurstaða valnefndar að ráða Maríu Guðrúnar Ágústsdóttur, sóknarprest í Fossvogsprestakalli, í starfið og hefur biskup Íslands staðfest ráðninguna.

María fagnar ráðningunni og segir á FB síðu sinni um prestakallið: „Það uppfyllir svo margt af því sem lætur mig blómstra: Nálægðin við náttúruna, að eiga þess kost að þekkja sitt nærsamfélag og taka þátt í því að efla starfið í fallegu sveitakirkjunum, alþjóðlega fræðasamfélagið í Snorrastofu, unga fólkið á Hvanneyri og í sveitunum, tónlistarlífið, alls kyns möguleikar á starfi í glæsilegu Reykholtskirkju og bara þjóna fólki í kærleika Guðs á hvern þann hátt sem aðstæður leyfa og krefjast. Vísan hans Höskuldar frá Hofsstöðum segir þetta vel:

Einhvern finn ég innri frið

þó æði vindar svalir

þegar blasa bjartir við

Borgarfjarðardalir.

PS. Svo er ég auðvitað afkomandi Snorra Sturlusonar í gegn um Þórdísi dóttur hans sem hann átti með Oddnýju. Þá er þetta gulltryggt, er það ekki?“

Uppruni og fyrri störf

María Ágústsdóttir er fædd 20. febrúar 1968 á Egilsstöðum. Faðir hennar var Ágúst Matthías Sigurðsson sem síðast var sóknarprestur á Prestbakka í Hrútafirði. Móðir hennar er Guðrún Lára Ásgeirsdóttir kennari og skólabókasafnsfræðingur. María varð stúdent frá Östre Borgerdydskole í Kaupmannahöfn árið 1986, en faðir hennar var um árabil sendiráðsprestur þar í borg. Hún sótti einkatíma í orgelleik og kórstjórn við Ordrup kirke í Kaupmannahöfn og hóf nám í guðfræði við Kaupmannahafnarháskóla 1987-1988 og lauk síðan cand. theol prófi frá Háskóla Íslands árið 1992. Hún lauk prófi í uppeldis- og kennslufræði frá sama skóla árið 1994. Þá hefur María sótt ýmis endurmenntunarnámskeið á sviði sálgæslu, stjórnunar, kennslufræði og helgihaldi frá árinu 1992.

María var vígð til að sinna aðstoðarprestsþjónustu við Dómkirkjuna í Reykjavík 3. janúar árið 1993. Hún var sett prestur við Háteigskirkju í Reykjavík 1997-1998 og aftur árið 2000. Hún var sett héraðsprestur í Reykjavíkurprófastsdæmi vestra 1998-1999 og var sett til prestsþjónustu við Landsspítalann 1999-2000. María var skipuð héraðsprestur í Reykjavíkurprófastsdæmi vestra frá 1. janúar árið 2000. Auk prestsstarfa hefur María sinnt kennslustörfum í Hagaskóla í Reykjavík 1993-1994 og við Leikmannaskóla þjóðkirkjunnar frá árinu 2000. 1. nóvember árið 2016 varði María doktorsritgerð sína í samstæðilegri guðfræði frá Háskóla Íslands. Rannsókn hennar beindist að tengslum á milli trúfélaga og á hvern hátt sé vænlegast að efla sátt og frið á milli ólíkra hópa. Haustið 2017 var Maríu falin þjónusta í Grensásprestakalli og gengdi hún sóknarprestsstöðu þar uns Bústaða- og Grensásprestaköll voru sameinuð haustið 2019. Þá var hún ráðin prestur við nýja prestakallið og sóknarprestur í sama prestakalli frá 1. október 2023. Frá 1. ágúst hefur hún sinnt prestsþjónustu í Glerárprestakalli á Akureyri en þar býr Kolbeinn sonur hennar ásamt tengdadóttur og ungum syni. Dætur Maríu eru fjórar; Ragnhildur, Guðný Lára, Guðrún María og Nína Björg. Eiginmaður Maríu er Bjarni Þór Bjarnason, sóknarprestur á Seltjarnarnesi.

Séra María ráðin sóknarprestur í Reykholti