Rætt við Álfheiði Leifsdóttur oddvita VG í Norðvesturkjördæmi

Álfheiður Leifsdóttir kennari á Sauðárkróki skipar efsta sæti á lista VG fyrir komandi þingkosningar. Tekur hún við keflinu af Bjarna Jónssyni alþingismanni sem sagði sig úr flokknum eftir að slitnaði upp úr samstarfi ríkisstjórnarinnar. Annað sæti á lista flokksins skipar nú Bjarki Hjörleifsson í Stykkishólmi. Blaðamaður Skessuhorns heyrði í Álfheiði hljóðið. Hún er fyrst spurð um upprunann.

„Ég er Skagfirðingur í húð og hár, uppalin í Keldudal þar sem ég sinnti sveitastörfum með foreldrum mínum og systkinum þar til ég fluttist suður í háskólanám. Ég nam kerfisfræði við Háskólann í Reykjavík og grunnskólakennaranám við Háskóla Íslands þar syðra. Í dag bý ég á Sauðárkróki og er kennari og verkefnastjóri í tækni í Árskóla. Mestum hluta af tíma mínum utan vinnu ver ég í sveitarstjórnar- og samfélagsmál, prjóna mér til dægrastyttingar, sinni fjölskyldunni minni og MBA námi. Ég er einstæð móðir þriggja barna en til okkar fjölskyldu teljast nú líka tveir hundar, tveir kettir og stöku hross jafnvel líka.“

Góð reynsla úr öðrum félagsstörfum

Nú er þetta í fyrsta skipti sem þú ert ofarlega á lista fyrir alþingiskosningar, hvað kom til að þú gafst kost á þér? „Undanfarin sex ár hef ég fengið gríðarlega mikilvæg tækifæri á sveitarstjórnarstiginu til að setja mig inn í fjölmörg mál og stuðla að jákvæðum breytingum fyrir íbúa Skagafjarðar og Norðurlands vestra, eða frá því að ég tók sæti í sveitarstjórn Skagafjarðar sem og í stjórn SSNV. Fyrir það er ég þakklát, reynslunni ríkari og tel mig hafa öðlast breiða þekkingu á málefnum landsbyggðarinnar á þessum tíma en líka góða innsýn á hvað skortir sárlega í byggðamálum. Ég hef sinnt félagsmálum kennara, verið formaður Kennarasambands Norðurlands vestra undanfarin ár og lagt mitt af mörkum í kjarabaráttu kennara. Með þessa fjölbreyttu reynslu úr bæði sveitarstjórnarmálum og skólaumhverfinu er ég fullviss um að ég geti lagt mitt af mörkum á landsvísu til að bæta samfélagið og styðja við landsbyggðina, efla félagslegt réttlæti og stuðla að öflugri menntun fyrir alla.“

Val á milli hægri og vinstri

Aðspurð um helstu baráttumál komist Álfheiður á þing, segist hún vilja berjast fyrir fjölskyldum á landsbyggðinni, kvenfrelsi og leggja áherslu á fjölbreyttar lausnir í atvinnu-, mennta- og umhverfismálum. „Þessar kosningar snúast um skýrt val á milli hægri og vinstri. Á síðustu árum höfum við séð hvernig öfl á hægri vængnum daðra við rasisma og innfluttan áróður sem vinnur gegn innflytjendum og jaðarsettum hópum, á meðan mikilvæg mál eins og húsnæðismál, efnahagsmál og félagslegt réttlæti mæta afgangi. Ég vil að Norðvesturkjördæmi hafi sterka rödd sem berst fyrir samfélagslegri framþróun, réttlæti og umhverfisvernd. Rödd sem þekkir hversdagslegt landsbyggðabasl af eigin reynslu. Félagslegt réttlæti er mér mikilvægt og þá ekki síst staða kvenna og staða einstæðra foreldra, enda þekki ég það vel af eigin reynslu. Það er mikilvægt að öll börn eigi jafnan rétt, en staða einstæðra foreldra sýnir svart á hvítu annað – og því verður að breyta.

Það er mín skoðun að þetta kjördæmi hefur að mörgu leyti dregist aftur í samgöngumálum, aðgengi að þjónustu og öðrum mikilvægum byggðamálum en á sama tíma er ég óendanlega stolt af því fjölmarga sem vel er gert, stolt af einstöku náttúrunni okkar og veit að tækifærin til frekari uppbyggingar eru fjölmörg.“

Þekkjum vel til í kjördæminu

Hvernig mun VG haga sinni kosningabaráttu í ljósi þess að einungis er tæpur mánuður í kjördag? „Nú verðum við að spóla af stað og fara víða því Norðvesturkjördæmi er vissulega víðfeðmt. Það er áskorun að kynna sig í svona stóru kjördæmi á stuttum tíma en við á lista VG í Norðvesturkjördæmi erum sérdeilis heimabökuð og lítið fræg en þekkjum kjördæmið eins og lófana á okkur. Ég fagna því tækifæri að hafa áhrif á breiðari vettvangi með það að leiðarljósi að bæta samfélagið okkar fyrir komandi kynslóðir og hlakka til að hitta sem flest á næstu vikum, hlusta á íbúa og eiga við þá samtal. Ég hvet íbúa, hagsmunasamtök og fyrirtæki til að hafa samband í síma 692-5666. Það er ekki verra ef kaffibolli fylgir spjallinu,“ segir Álfheiður að lokum.

„Við erum sérdeilis heimabökuð og lítið fræg“

Rætt við Álfheiði Leifsdóttur oddvita VG í Norðvesturkjördæmi

Rætt við Álfheiði Leifsdóttur oddvita VG í Norðvesturkjördæmi