Spjallað við Örnu Láru Jónsdóttur oddvita Samfylkingarinnar

Arna Lára Jónsdóttir bæjarstjóri á Ísafirði skipar efsta sætið á lista Samfylkingarinnar í Norðvesturkjördæmi fyrir kosningarnar í lok mánðarins. Hún hefur lengi verið viðloðandi stjórnmálin og er nú ritari flokksins á landsvísu. Skessuhorn heyrði í Örnu Láru. Fyrst er einfaldlega spurt; hver er oddvitinn og bakgrunnurinn?

„Ég er fædd og uppalin á Ísafirði þar sem ég hef búið mestan hluta af mínu lífi, fyrir utan námsárin í Reykjavík og Kaupamannahöfn. Sambýlismaðurinn minn, Ingi Björn Guðnason, kemur frá Selfossi. Hann ætlaði að dvelja tímabundið á Ísafirði áður en hann lenti í klónum á mér. Ég á þrjú börn; Hafdísi sem stundar doktorsnám í efnafræði í Bretlandi, Helena er í Stýrimannaskólanum og Dagur býr enn í foreldrahúsum. Ég hef starfað lengst af í atvinnuþróunar- og nýsköpunarmálum og ýmsum byggðaþróunarverkefnum. Ég átti mjög góð ár hjá Eimskip á Ísafirði en síðustu árin hef ég verið bæjarstjóri Ísafjarðarbæjar.“

Arna Lára segist lengi hafa verið viðloðandi í pólitík. „Ég var í sveitarstjórnarmálum síðan 2006 og hef boðið mig fram nokkrum sinnum fram til Alþingis. Ég var í framboði með Gutta heitnum og Ólínu og síðar með Guðjóni Brjánssyni og fékk þá tækifæri til að koma nokkrum sinnum inn sem varaþingmaður.“

Málefnastarf undanfarin tvö ár

En hver verða helstu stefnumál Samfylkingarinnar á landsvísu – og svo í Norðvesturkjördæmi sérstaklega? „Samfylkingin hefur verið í miklu málefnastarfi síðastliðin tvö ár. Við höfum átt fjölmarga fundi og samtal við þjóðina og erum komin með skýra sýn sem birtist í útspilum okkar í Öruggum skrefum í heilbrigðis- og öldrunarmálum, kröfu um árangur í atvinnu- og samgöngumálum og því nýjasta um húsnæðis- og kjaramál. Þetta verða okkar helstu stefnumál sem ríma vel við þau stóru mál sem snerta Noðrvesturkjördæmið. Við erum að horfa upp á gríðarlega innviðaskuld í samgöngu- og orkumálum og auk þess eru fjölmörg tækifæri til að gera betur í heilbrigðismálum. Stóra málið er auðvitað efnahagsmálin og nauðsyn þess að ná niður vöxtum og verðbólgu.“

Stutt og snarpt

Hvernig munuð þið hátta kosningabaráttunni á þessum fjórum vikum sem eru til kosninga? „Kosningabaráttan verður stutt og snörp. Við munum reyna að hitta sem flesta kjósendur og sannfæra þá um mikilvægi þess um að ná samstöðu um breytingar og til að þær verða þarf Samfylkingin að ná góðri kosningu.“

Hverjar eru væntingar ykkar til úrslita á landsvísu og hér í kjördæminu? „Við finnum fyrir góðum meðbyr en það þarf að vinna fyrir hverju einasta atkvæði. Samfylkingin er með góðan málefnagrunn og skýrt plan til næstu ára. Nú þurfum við að ávinna okkur traust þjóðarinnar og að við séum til þjónustu reiðubúin. Það erum við vissulega,“ sagði Arna Lára að endingu.

Þurfum að vinna fyrir hverju einasta atkvæði

Spjallað við Örnu Láru Jónsdóttur oddvita Samfylkingarinnar

Spjallað við Örnu Láru Jónsdóttur oddvita Samfylkingarinnar