Snæfell og Ármann áttust við í 1. deild kvenna í körfuknattleik í gærkvöldi og var viðureignin í íþróttahúsinu í Stykkishólmi. Fyrir leik voru bæði lið ósigruð, Snæfell hafði unnið fyrstu tvo leikina í deildinni og gestirnir fyrstu þrjá og ljóst að það myndi breytast í leikslok.

Heimakonur byrjuðu af krafti og komust í 8:0 og tók þá Karl Guðlaugsson, þjálfari Ármanns, leikhlé. Hann kveikti í sínum leikmönnum því þær skoruðu tólf stig í röð eftir leikhléið og voru síðan komnar með góða forystu eftir fyrsta leikhluta, staðan 16:27. Snæfellskonur gáfust ekki upp og sýndu hvað þær gátu í öðrum leikhluta. Þær spiluðu af miklum krafti og náðu að komast yfir um miðjan leikhlutann eftir tvö vítaskot frá Danielle Shafer og staðan 33:32. Leikurinn var nokkuð jafn það sem eftir var fyrri hálfleiks en Aníka Linda Hjálmarsdóttir kom Ármanni sjö stigum yfir með glæsilegri körfu þar sem hún sneri af sér varnarmenn Snæfells og skoraði rétt áður en flautan gall. Staðan í hálfleik 41:48 fyrir Ármann og útlit fyrir spennandi seinni hálfleik sem ekki varð þó raunin.

Það var greinilegt að lið Ármanns fór vel yfir málin í hálfleik því þær komu af miklum krafti inn í seinni hálfleikinn og gerðu út um leikinn í þriðja leikhluta. Þegar honum lauk var staðan 52:82 þar sem heimakonur skoruðu aðeins ellefu stig á móti 34 stigum gestanna. Þar með var ljóst að Snæfell næði ekki að koma til baka og leikurinn endaði með ansi öruggum sigri Ármanns, lokatölur 66:102.

Danielle Shafer var stigahæst hjá Snæfelli með 23 stig, Carlotta Ellenrieder skoraði 13 stig og tók 23 fráköst og Valdís Helga Alexandersdóttir var með 10 stig. Hjá Ármanni var Fanney Ragnarsdóttir með 23 stig, Hulda Ósk Bergsteinsdóttir var með 21 stig, Alarie Mayze með 17 stig og Aníka Linda Hjálmarsdóttir með 16 stig.

Næsti leikur Snæfells verður á móti Selfossi laugardaginn 9. nóvember í Vallaskóla og hefst klukkan 16.

Snæfellskonur töpuðu stórt á móti Ármanni