María Rut Kristinsdóttir leiðir lista Viðreisnar í NV kjördæmi

Framboðslisti Viðreisnar í Norðvesturkjördæmi fyrir komandi alþingiskosningar var nýverið samþykktur. Oddviti listans er María Rut Kristinsdóttir, aðstoðarmaður formanns Viðreisnar og er frá Flateyri. Annað sætið skipar Edit Ómarsdóttir kerfisfræðingur og deildarstjóri viðskiptaþróunar hjá Advanía, búsett á Akranesi. María Rut kom nýverið við á ritstjórn Skessuhorns. Hún segist stolt af því að hafa verið valin til að leiða lista Viðreisnar í kjördæminu og hlakkar til komandi kosningabaráttu.

„Við teflum fram glæsilegum lista. Hann er stútfullur af reynslumiklu og björtu fólki sem þekkir hvern krók og kima í kjördæminu. Hjarta mitt slær fyrir Norðvesturkjördæmi og ég hlakka til að hitta fólk og heyra hvað það er sem því liggur á hjarta.“ María Rut segist hafa hitt margt reynslumikið fólk á síðustu árum í störfum sínum bæði sem aðstoðarmaður formanns Viðreisnar og sem varaþingmaður. „Stóra verkefnið fram undan er að létta fólki róðurinn. Bæði hvað varðar efnahaginn en einnig þegar kemur að andlegri líðan. Í Norðvesturkjördæmi er einnig mikið ákall um bættar samgöngur, atvinnuuppbyggingu og betri heilbrigðisþjónustu. Þar er verk að vinna og við erum svo sannarlega tilbúin að hefjast handa,“ segir María Rut.

Flateyringur

Aðspurð um upprunann segist María Rut vera fædd og uppalin á Flateyri við Öndunarfjörð þar sem hún bjó, allt þar til hún fór suður í háskólanám. „Ég var barn þegar snjóflóðin mannskæðu féllu á byggðina á Flateyri. Slíkir viðburðir marka mann auðvitað fyrir lífstíð. Mér er mjög minnisstætt að okkur börnunum á Flateyri var boðið að koma í heimsókn á Akranes og dvelja þar í boði ÍA sumarið eftir flóðin. Það hjálpaði okkur mikið enda var einstaklega vel tekið á móti okkur.“ Allar götur síðan segist hún bera hlýjan hug til Akraness og fólksins þar. Því kveðst hún ætla nú í nóvember að koma sér upp skrifstofu á Akranesi og stýra baráttunni meðal annars þaðan.

„Ég fór 16 ára gömul suður og settist á skólabekk í MR. Bjó þá þá hjá Brynhildi Einarsdóttur frænku minni frá Sólbakka og Illuga Gunnarssyni manni hennar og fv. þingmanni og ráðherra. Ég kláraði ekki stúdentsprófþar, því ég varð ólétt sem setti smá strik í reikninginn, en gerði það fyrir vestan í Menntaskólanum á Ísafirði. „Ég á því sautján ára son í dag, en tvö yngri börn með eiginkonu minni Ingileif Friðriksdóttur. Þau eru 18 mánaða og fimm ára. Við erum búsettar í Reykjavík en eigum aðstöðu heima á Flateyri þar sem við dveljum öllum stundum þegar tími gefst,“ segir María Rut.

Ræða við fólk

Hún segist sem aðstoðarmaður Þorgerðar Katrínar Gunnarsdóttur á þingi hafa náð að vera með puttann á púlsinum í mörgum þeirra mála sem brenna á þjóðinni. „Ég hlakka til að hitta fólk í þessari stuttu en vonandi snörpu kosningabaráttu sem framundan er. Stóru málin verða efnahagsmál, atvinnumál ogsamgöngumál . Það eru flestir Íslendingar að kljást við afleiðingar efnahagsástandsins sem endurspeglast í háum vöxtum og verðbólgu. Svo er andleg líðan fólks sérstakt áhyggjuefni. Margir sem glíma við einangrun og fylgikvilla hennar. Það er því hollt fyrir okkur sem gefum kost á okkur í stjórnmálin að tala meira við fólk til að vita hvar skóinn kreppir til að geta bætt ástandið.“

Spyrja þjóðina hvað hún vill

Efnhagslega segir María Rut að kyrrstaða hafi ríkt um nokkurn tíma í efnahagsmálunum. „Það er ákall eftir að hér taki við ríkisstjórn eftir kosningar sem kemur til móts við þarfir almennings. Við í Viðreisn viljum beina sjónum okkar að ástæðum þess að hér erum við með þrisvar sinnum hærri vexti en í nágrannaríkjunum og mjög háa verðbólgu að auki. Samhliða erum við með veikan gjaldmiðil. Allt eru þetta atriði sem tvinnast saman og það er okkar markmið að leita úrræða. Það er kominn tími til að hlustað verði á raddir yngri kynslóðarinnar, unga fjölskyldufólksins sem ber byrðarnar af ástandinu. Þessi kynslóð er að kalla eftir breytingum og þess vegna eru kannanir að sýna mikla færslu fylgis milli flokka. Viðreisn hefur frá 2016 verið með á sinni stefnuskrá að spyrja þjóðina um hvort hún vilji breytingar. Þær breytingar gætu snúið að umsókn í ESB og annað hvort upptöku nýs gjaldmiðils eða tengingu hans við stærri mynt/ir. Við viljum gefa þjóðinni kost á að taka afstöðu í þessu máli, hvort hún vilji óbreytta efnahagsstjórn eða breytingar.“

María Rut segist vona að á Alþingi veljist nú ungt fólk í bland við það reynslumeira. „Það vantar ungt fjölskyldufólk á Alþingi sem veit hvernig þeytivindan er um þessar mundir; fólk sem þekkir brauðstritið og hvernig það er að ná endum saman um hver mánaðamót. Ef ekkert breytist til dæmis í kjörum skuldsettra húseigenda mun fólk óhjákvæmilega kjósa með fótunum, hverfa úr landi og setjast að þar sem kjörin eru betri. Það væri það versta sem komið gæti fyrir þjóðina að unga fólkið sjái ekki fram á að geta keypt sér fasteign og velji búsetu í öðrum löndum.“

Nú á Viðreisn ekki þingmann í kjördæminu þótt óneitanlega hafi það legið nærri við síðustu kosningar. Hvert er markmiðið 30. nóvember? „Viðreisn ætlar sér sigur í næstu kosningum. Auðvitað vonast ég til að komast á þing og klárlega er það markmið okkar að Edit komist einnig. Hún er öflug manneskja, býr á Akranesi en þekkir ekki síður vel til í Borgarnesi. Við erum búin að reima á okkur hlaupaskóna og erum að taka á rás, til sigurs,“ segir María Rut að endingu.

Hjartað slær fyrir kjördæmið

María Rut Kristinsdóttir leiðir lista Viðreisnar í NV kjördæmi

María Rut Kristinsdóttir leiðir lista Viðreisnar í NV kjördæmi