West Side er íþróttakeppni og ball sem árlega er haldið af nemendafélögum allra framhaldsskóla á Vesturlandi; Menntaskóla Borgarfjarðar í Borgarnesi, Fjölbrautaskóla Vesturlands á Akranesi og Fjölbrautaskóla Snæfellinga í Grundarfirði. Í ár eru 15 ár síðan fyrsta West Side keppnin fór fram en keppnin í ár var haldin í Borgarnesi.

Nemendur hófu daginn á íþróttakeppni í íþróttahúsinu í Borgarnesi en keppt var þar í fjórum greinum; blaki, bandý, fótbolta og körfubolta. Ernir Daði Arnberg Sigurðsson, formaður nemendafélags MB, segir að keppnin hafi gengið mjög vel. „Í íþróttakeppninni kepptu fjöldi nemenda í hinum ýmsu íþróttagreinum og enn fleiri tóku þátt með því að hvetja bekkjarfélaga sína til dáða ofan úr stúkunni. Það er fallegt og gaman að sjá hvernig skólafólkið sameinast á þessum degi og hver og einn hvetur sinn skóla áfram til árangurs. Íþróttakeppnin gekk með eindæmum vel. Keppnisskapið var að sjálfsögðu áberandi en allir höfðu gaman af og báru virðingu fyrir andstæðingnum. Einnig var ánægjulegt að sjá hversu margir nemendur tóku þátt sem ekki eru vanir að taka þátt í keppnisgreinum. Það segir okkur að þetta er góður vettvangur fyrir nemendur til að stíga út fyrir þægindarammann, æfa hugrekkið og prófa að keppa,“ segir Ernir Daði í spjalli við Skessuhorn. Sara Egilsdóttir, forseti nemendafélags FSN, nefndi að íþróttakeppnin hafi verið vel skipulögð og heppnaðist vel.

Eftir íþróttakeppnina var komið að spurningakeppni sem fór fram í húsakynnum MB en síðar um kvöldið kom í ljós hvaða skóli fengi bikar til varðveislu í eitt ár. Bikarinn hefur verið á Akranesi síðastliðin þrjú ár en að þessu sinni bar MB sigur úr býtum og verður því bikarinn til varðveislu í Borgarnesi til haustsins 2025.

Um kvöldið var haldið ball í MB sem fór afar vel fram og voru nemendur til mikillar fyrirmyndar í hvívetna. Þarna voru saman komnir um tvö hundruð nemendur úr framhaldsskólunum þremur á Vesturlandi og skemmtu sér fallega saman. Enginn keppandi lét ósigur hafa áhrif á sig enda þurfa sannir íþróttamenn að kunna að tapa með sæmd. Þátttaka í edrúpotti var heilmikil, það voru engir pústrar á ballinu, bara dans og hopp og fjör.

*Leikur FSN og MB í bandý var mikil skemmtun.*

*Lið MB í spurningakeppni. F.v: Friðgeir Kári Aðalsteinsson, Jónas Reynisson og Ólöf Ösp Hjaltadóttir. Ljósm. bþs*

*Leikur MB og FVA í blaki var æsispennandi en endaði með sigri FVA.*

Vel heppnað Westside í Borgarnesi