Valur og ÍA mættust í síðasta leik tímabilsins í Bestu deild karla í knattspyrnu á laugardaginn og var leikurinn á N1-vellinum á Hlíðarenda. Valsmönnum nægði jafntefli í leiknum til að hreppa Evrópusæti á meðan Skagamenn voru líklegast enn að jafna sig eftir viðureignina gegn Víkingi í síðustu umferð. Heimamenn í Val komust í tveggja marka forystu eftir rúmar tíu mínútur með mörkum frá Sigurði Agli Lárussyni og Patrick Pedersen áður en Guðfinnur Þór Leósson minnkaði muninn í 2-1 fyrir gestina eftir hálftíma leik. Valsmenn bættu síðan við tveimur mörkum fyrir hálfleik, fyrst skoraði Tryggvi Hrafn Haraldsson og síðan Albin Skoglund og staðan 4-1 Val í vil.