Tónlistarhátíðin Heima-Skagi fór fram í gærkvöldi í gamla bænum á Akranesi og mátti sjá fólk á ferðinni út um allan neðri Skagann langt fram á kvöld. Veðrið var kyrrt og stillt og voru fjölmargir sem tóku röltið þetta kvöld til að hlusta á tónlistarfólk spila á hinum ýmsu stöðum. Undirritaður tók þá ákvörðun að þessu sinni að hlaupa hægar en oft áður í þetta skiptið og valdi sér tónleika sem vöktu hvað mestan áhuga hjá honum.

Klukkan átta var ferðinni heitið á Rakarastofu Hinriks þar sem Skagamaðurinn Jónfrí átti að vera að spila en hann var ekki mættur svo þá var farið í Akraneskirkju til að hlusta á Ylju. Söngkonurnar Gígja Skjaldardóttir og Bjartey Sveinsdóttir skipa dúettinn Ylju sem hefur verið starfandi frá árinu 2008 og hefur vakið athygli fyrir nýstárlega þjóðlagatónlist. Stöllurnar voru í essinu sínu og sungu meðal annars lögin Á rauðum sandi, Vikivaki, Ómissandi fólk og Grafskrift. Samhljómur þeirra var hreint með ágætum og þetta var notaleg stund sem kirkjugestir voru afar ánægðir með. Það er óhætt að segja að nafnið á dúettinum sé viðeigandi því þær ylja manni um hjartarætur með tónlist sinni.

Næst var ferðinni heitið á Vesturgötu 45 heima hjá Kristjáni og Grétu þar sem tónlistarkonan Elín Hall tróð upp. Þrátt fyrir tæknilega byrjunarörðugleika lét hún það sig ekki á fá og spilaði mest lög af nýjustu plötu sinni, heyrist í mér?, sem kom út í fyrra. Þar mátti heyra lög eins og Heim, Bankastræti, Júpíter, Manndráp af gáleysi og Blóðsugan. Hún flutti einnig fyrsta lagið sem hún samdi þegar hún var 16 ára gömul og sendi í Eurovision árið 2015 en það heitir Í kvöld. Þá flutti hún nýtt lag sem heitir Grimmhildur Grámann og endaði á laginu Vinir af nýju plötunni sem er eitt af hennar bestu og vinsælustu lögum. Elín er með hlýlega sviðsframkomu og góða rödd og sagði gestum frá tilurð laganna sem og aðrar skemmtilegar sögur enda hlaut hún góðar viðtökur þeirra fjölmörgu sem hlýddu á hana þetta kvöld.

Sigurður Guðmundsson hélt seinni tónleika sína í Akraneskirkju rúmlega tíu og þangað var arkað til að hlýða á einn af okkar bestu söngvurum. Hann sló vart feilnótu og flutti mörg af sínum bestu lögum og fór létt með, vopnaður rafmagnsgítar. Af plötunni Þetta líf er allt í læ sem er nýkomin út flutti hann titillagið og eitt til tvö lög til og lagið Kappróður af samnefndri plötu spilaði hann tvisvar, í byrjun og sem uppklappslag. Sigurður kom einnig fólki í smá jólagír með því að flytja lögin Notalegt og Það snjóar og þar var hann virkilega á heimavelli.

Á leið minni í Bíóhöllina var komið við í Búkollu þar sem mikil stemning var í gangi með suður-amerískum tónlistarmönnum undir nafninu Asi es Bolivia og var fólk að dansa af miklum móð við fjöruga tónlist. Í Bíóhöllinni voru lokatónleikar kvöldsins þar sem Fjallabræður stigu á stokk ásamt hljómsveit undir styrkri stjórn Halldórs Gunnars Pálssonar sem spilaði á gítar af sinni alkunnu snilld og stjórnaði með miklum myndarskap. Á dagskránni voru flest lög Fjallabræðra ásamt nokkrum tökulögum og tóku áhorfendur vel undir í öllum lögum. Hljómsveitin var kröftug þar sem fiðluleikarinn Unnur Birna Björnsdóttir og Skagamaðurinn Sveinbjörn Hafsteinsson úr kór Fjallabræðra gripu í hljóðnemann þegar til þess þurfti og gerðu ansi vel. Troðfullt var í Bíóhöllinni og áhorfendur vel með á nótunum í þennan rúmlega klukkutíma sem tónleikarnir stóðu yfir og virkilega góður lokahnykkur á Heima-Skaga hátíðinni í ár.

Niðurstaðan er sú að Heima-Skagi 2024 var afar vel heppnaður þetta árið þar sem tónlistaráhugamenn og aðrir gerðu sér glaðan dag í góðu veðri og í enn betri félagsskap. Tónlistin var fjölbreytt og úr ýmsum  áttum og sýndi enn og aftur hvað íslenskir tónlistarmenn eru framarlega á sínu sviði. Takk kærlega fyrir mig og sjáumst vonandi að ári.

vaks