Það eru ýmsar hindranirnar sem mætt geta frambjóðendum stjórnmálaflokkanna nú þegar kosningar eru skyndilega framundan. Eyjólfur Ármannsson þingmaður Flokks fólksins í Norðvesturkjördæmi var í dag að safna meðmælendum fyrir framboðið í verslanamiðstöðinni við Smiðjuvelli á Akranesi, þar sem Bónus er til húsa. „Ég var búinn að vera þarna í sameign verslanamiðstöðvarinnar í rúman klukkutíma þegar starfsmaður Bónus kemur fram og tilkynnir mér að Bónus leyfi ekki að safna meðmælendum í sameign hússins. Þetta sé ákvörðun stjórnenda Bónus í Reykjavík. Ég einfaldlega sá mína sæng út reidda og hætti því sem ég var að gera,“ segir Eyjólfur í samtali við Skessuhorn.