Á vegum Vegagerðarinnar er nú í gangi heildar endurskoðun á leiðakerfi landsbyggðarvagna sem aka með fólk milli byggðarlaga. Vegagerðin er ábyrgðaraðili á rekstri landsbyggðarstrætó en býður aksturinn út. Í endurskoðun á núverandi leiðakerfi felst að allar akstursleiðir eru skoðaðar út frá gæðum, nýtni og gagnsemi. Hluti undirbúningsvinnu var að halda samráðsfundi með hagaðilum landsbyggðarstrætó síðastliðið vor, en þá fundi sátu meðal annars fulltrúar sveitarfélaga, landshlutasamtaka, framhalds- og háskóla, íþróttafélaga og þeir sem sinna akstrinum nú. Í bréfi Vegagerðarinnar til sveitarfélaga dags. 14. október sl. kemur m.a. fram að niðurstaða þessara samráðsfunda hafi skilað nokkrum áskorunum sem verða leiðandi í endurhönnun á leiðakerfinu. Meðal annars snúa þær áskoranir að daglegri ferðahegðun vegna skóla- og atvinnusóknar, lengd akstursleggja, landfræðilegra og veðurfarslegra farartálma, íbúafjölda í byggðakjörnum, hagsmunum ferðafólks vs. heimafólks, kostnaði per farþega, akstur innan og utan sveitarfélaga og orkuskipta.