Myndapistill Halla Bjarna – 1. hluti

Á heilli starfsævi leggst manni ýmislegt til af myndefni, ekki síst þegar blaðamennska hefur tekið mestallan tímann. Ég byrjaði snemma að taka ljósmyndir og var byrjaður að framkalla þær sjálfur um 10-12 ára aldur. Eftir ljósmyndanámskeið á vegum Æskulýðsráðs Akraness, sem Ingvar Ingvarsson leiddi sem æskulýðsfulltrúi, jókst ljósmyndaáhuginn. Leiðbeinendur á þessu námskeiði voru tveir öflugir áhugaljósmyndarar á Akranesi, þeir Sverre Valtýsson apótekari og Þorsteinn Þorvaldsson vélstjóri. Þeim á ég mikið að þakka fyrir að efla ljósmyndáhugann.

Ég tók mikið af myndum og peningarnir sem ég vann mér inn fóru að stórum hluta í að kaupa filmur, framköllunarvökva, fixer og pappír. Þeirra var aflað með fjölbreyttri vinnu í saltfiski, skreið og ekki síst síldarsöltun- og pæklun hjá Sigurði Hallbjarnarsyni hf, fyrirtæki frændfólks míns, í næsta nágrenni við æskuheimilið að Vesturgötu 123. Á vorin var ég háseti á grásleppubátnum hjá pabba og auk þess bar ég út Moggann og rukkaði áskrifendur frá 10 ára aldri. Hann var sóttur til umboðsmannsins Jóns í Garðbæ. Úr þessu öllu komu tekjurnar sem fjarmögnuðu m.a. ljósmyndadelluna.

Allar svart/hvítu filmurnar, sem ég tók á, framkallaði ég sjálfur en svo var tilviljanakennt hvaða myndir fengu áframhaldandi vinnslu. Mest af negativu filmunum (bæði í lit og svart/hvítu) og slidesmyndunum á ég ennþá en sumar hafa þó glatast, ekki síst vegna flutninga, fyrst austur á land en síðan til baka á Akranes, til Reykjavíkur og að lokum til Danmerkur þar sem ég bý núna. Filmurnar hafa þó fylgt mér flestar í kassa en einhverjar lentu á Ljósmyndasafni Akraness þar sem sumar þeirra hafa verið skannaðar í stafrænt form.

Nú er ætlunin að setja inn nokkra pistla með myndum í Skessuhorn. Við skulum byrja þessa yfirferð á myndum sem ég tók af bæjarstarfsmönnum á misjöfnum tímum. Talsvert tímaflakk verður í þessum pistlum mínum því elstu myndirnar sem ég á, geta verið um 60 ára gamlar og þær yngstu um 10 ára.

Þeir sem geta gefið frekari ábendingar um myndirnar, t.d. fólk eða ártöl, mega senda tölvupóst á undirritaðan; hallibjarna@simnet.is

Haraldur Bjarnason

*Flokksstjórar í unglingavinnu 1984. Pétur Björnsson, Ásta Jónsdóttir og Valgerður Kristjánsdóttir.*

*Flokksstjóri í unglingavinnu 1984. Hér er Elís Þór Sigurðsson.*

*Pétur Björnsson, Aðalsteinn Víglundsson og Steinunn Eva Þórðardóttir.*

*Gísli Gíslason bæjarstjóri og Daníel Árnason bæjartæknifræðingur virða fyrir sér gatnasteypu.*

*Bæjarstarfsmennirnir Sveinn Guðbjarnarson og Hannes Hjartarson.*

*Bæjarstarfsmenn. Sveinn, Hannes, Guðmundur garðaráðsmaður og Jóhannes Elíasson til hægri.*

*Vesturgata milli Merkigerðis og Háholts steypt. Bragi Magnússon og Þórður Árnason bæjarstarfsmenn.*

Bæjarstarfsmenn á ýmsum tímum

Myndapistill Halla Bjarna – 1. hluti

Myndapistill Halla Bjarna – 1. hluti