Rætt við Berg Líndal Guðnason, einn skipuleggjanda Lilló harðkjarnapönkhátíðar á Akranesi

Núna um helgina, dagana 25-26. október, verður Lilló harðkjarnapönkhátíð haldin á Akranesi. Hátíðin hefur verið haldin frá árinu 2022 en upphaflega hugmyndin var að halda tónleika til að fagna 30 ára afmæli Skagarokks 1992 þar sem Jethro Tull og Black Sabbath spiluðu í íþróttahúsinu á Vesturgötu. Bergur Líndal er deildarstjóri frístundamiðstöðvar Akraneskaupstaðar og náði blaðamaður að króa hann af í smá spjall í íþróttahúsinu á Vesturgötu.

*Bergur Líndal Guðnason, einn skipuleggjanda hátíðarinnar.*

Ægisbraut records

Bergur ásamt fleirum voru saman í æfingahúsnæði á Akranesi, þar sem ýmsar hljómsveitir komu saman, spiluðu tónlist og ræddu heimsmálin. „Við fengum hugmyndina eftir mikið nostalgíu spjall um gamla, óútgefna tónlist héðan af Akranesi, eða efni sem var gefið út í takmörkuðu upplagi. Við stofnuðum félag í kringum þessa hugmynd og úr varð Ægisbraut records, þar sem við gefum út tónlist á kassettum,“ segir Bergur. Alls hefur Ægisbraut records gefið út 12 kassettur, tvær í viðbót koma út á næstunni en einnig stendur félagið fyrir stökum tónleikum. „Við vorum búnir að halda nokkra tónleika en þá kom þessi hugmynd um að búa til svona hátíð. Við vorum ákveðnir í að hafa þessa hátíð stóra í sniðum, sóttum um styrki og vorum með háleit markmið en svo fannst okkur þetta svolítið mikið umfang. Við vorum að þessu í sjálfboðavinnu og ákváðum að minnka hátíðina,“ segir Bergur.

Þakklát fyrir húsnæðið

Gamla Landsbankahúsið við Akratorg er staðurinn. Húsnæðið hefur staðið autt í nokkurn tíma og hefur Bergur fengið afnot af því. „Við fengum afnot árið 2022 og höfum haldið reglulega tónleika þarna. Þar er líka æfingaaðstaða fyrir ungmenni, þeim að kostnaðarlausu og getur því hver sem er haft samband og komist þar inn. Við höfum bara verið að fara inn í húsnæðið og svo skilað af okkur en nú í ár fékk ég leyfi til að fá salinn sem er þar inni og gera nokkrar endurbætur. Við settum upp hljóðkerfi, svið, ljósafestingar og ýmislegt fleira í salnum sem gerir þetta að flottum tónleikasal. Við erum gríðarlega þakklát Akraneskaupstað fyrir húsnæðið,“ nefnir Bergur.

*Áhorfendur fylgjast með hljómsveitum á hátíðinni árið 2022. Ljósm. blg*

Endurvekja gróskuna

Hugsunin á bak við fyrstu hátíðina var að halda jaðartónlist hátt á lofti. Að bjóða upp á harðkjarnarokk og pönktónlist. „Við erum allir í kringum hátíðina í pönki og harðkjarnatónlist. En nú er þetta orðið töluvert fjölbreyttari tónlist sem er á dagskrá hjá okkur. Það er til dæmis nýlega stofnuð ung hljómsveit héðan af Akranesi sem kemur fram á hátíðinni í ár en það band var stofnað fyrr á þessu ári og er að koma fram í þriðja sinn á hátíðinni í ár. Við erum einnig með eldri hljómsveitir sem eru að koma til baka og spila hér á hátíðinni. Okkur langar til að endurvekja þessa grósku sem var hér á Akranesi, það voru svo margar hljómsveitir hérna en þessi gróska datt niður eftir mína kynslóð,“ nefnir Bergur en heldur svo áfram. „Það hefur ekki verið mikið í gangi hérna á Akranesi í tónlist, þá meina ég jaðartónlist og þeim hljómsveitum sem eru kannski ekki tengdar tónlistarskólanum eða slíku. Okkur fannst við knúnir til að reyna að gera það sem við gætum til að endurvekja þessa grósku og þessa tilfinningu. Það er farið að tala aftur um Akranes sem stað þar sem einhver gróska er og við erum mjög ánægð með það umtal,“ segir Bergur.

Haldast í hendur við Vökudaga

Lilló harðkjarnapönkhátíðin var fyrst haldin í desember en skipuleggjendur ákváðu að breyta dagsetningunni. „Fyrsta árið fengum við mjög slæmt veður, enda var það í desember,“ segir Bergur og hlær. Skipuleggjendur tóku eftir hversu vel skipulagðir Vökudagar voru á Akranesi. „Það var mikið um að vera í bænum, íbúar og gestir að ganga um bæinn og okkur fannst tilvalið að hengja okkur á Vökudagana. Svo er Heima-Skaginn á laugardeginum og því býst ég við að það verði margt fólk á ferli hér á Akranesi um þessa helgi. Eins og ég nefndi áðan, þá erum við með hátíðina í Landsbankahúsinu og þar er opið ef fólk vill kíkja inn en aðgangseyri er núll krónur,“ nefnir Bergur.

Fjölbreyttar hljómsveitir

Alls verða 12 hljómsveitir sem koma fram á hátíðinni, fimm bönd spila á föstudag og sjö á laugardag. „Við erum með mjög góða dagskrá finnst mér. Okkur langar til að fá hljómsveitir sem eru í einhverjum bílskúrum að æfa en fá ekki tækifæri á að spila neins staðar. Það er hægt að telja á annarri hendinni, þá staði sem nýjar hljómsveitir geta komið saman og spilað opinberlega,“ nefnir Bergur. Á fyrri hátíðum hafa þetta verið mikið af böndum sem hafa beina tengingu við skipuleggjendur hátíðarinnar. En í ár eru þetta meira og minna utanaðkomandi bönd og þar á meðal frá Danmörku, Austfjörðum og Akureyri. „Svo er endurkoma hljómsveitarinnar Panil en sú hljómsveit var mikið að spila í kringum árin 2000-2005. Annars er flóran af hljómsveitum í ár mjög fjölbreytt og verður spennandi að horfa og hlusta,“ segir Bergur.

Gaman að vera í hljómsveit

Við endum spjall okkar á því að ræða ýmsar hljómsveitir, hvað það hefur mikil áhrif að vera í hljómsveit og hvort að þessi eining, hljómsveit, eigi einhvern möguleika í dag. „Það er svo auðvelt í dag að vera ein eða einn heima hjá sér, niðurhala forritum og byrja að búa til tónlist. Það kostar eiginlega ekki neitt og er auðvelt á margan hátt að vera heima og búa til tónlist. En þá vantar félagslega hlutann, að koma inn í hóp og læra af hvert öðru. Mér persónulega finnst ógeðslega gaman að vera í hljómsveit og okkur langar til að það verði sem auðveldast fyrir ungmenni að prófa, að koma saman í hljómsveit og sjá hvort að þetta sé eitthvað sem þau vilja, hvort að þau vilji búa eitthvað til, saman í hljómsveit,“ segir Bergur að lokum.

Við viljum hafa tónlist sem höfðar til sem flestra

Rætt við Berg Líndal Guðnason, einn skipuleggjanda Lilló harðkjarnapönkhátíðar á Akranesi

Rætt við Berg Líndal Guðnason, einn skipuleggjanda Lilló harðkjarnapönkhátíðar á Akranesi