Rætt við Ólaf Karl Sigurðarson aðstoðarforstjóra KAPP

Skiptastjóri í þrotabúi Skagans 3X á Akranesi gekk frá samningi um sölu á búnaði og lausafé þrotabúsins í síðustu viku. Hópur fjárfesta náði samkomulagi um kaupin og auk þess munu kaupendurnir taka á leigu mikið af þeim húsakosti sem Skaginn 3X hafði starfsemi sína í og hyggjast hefja þar aftur rekstur. Það var nýstofnað félag, KAPP Skaginn ehf., sem keypti eignir félagsins en félagið er að meirihluta í eigu KAPP ehf., sem er rótgróið tæknifyrirtæki. Aðrir hluthafar í KAPP Skaganum ehf. eru m.a. eignarhaldsfélagið VGJ og TECTRU S/A, auk lykilstarfsmanna hins nýja félags.

KAPP ehf. stofnað árið 2007

Ef farið er aðeins yfir sögu fyrirtækisins KAPP ehf. þá á það uppruna sinn að rekja til vélaverkstæðis Egils Vilhjálmssonar hf sem stofnað var árið 1929. Fyrirtækið hóf að gera við knastása og sveifarása árið 1960 og varð eitt stærsta fyrirtækið í bílaiðnaði á Íslandi. Árið 1984 skiptist fyrirtækið í tvennt þegar véla- og renniverkstæðið var keypt af sjö starfsmönnum fyrirtækisins og endurnefnt Egill vélaverkstæði. Árið 1999 varð Freyr Friðriksson framkvæmdastjóri vélaverkstæðis Egils og árið 2007 stofnaði Freyr fyrirtækið KAPP ehf. en markmið þess var að verða leiðandi í kælilausnum fyrir smásölu- og iðnaðargeirann. Árið 2013 keypti KAPP, Egil vélaverkstæði og véla- og renniverkstæðið sameinaðist rekstri KAPP. Tveimur árum síðar festi KAPP kaup á Optimar Ísland sem er þekkt fyrir að hanna og framleiða hið þekkta OPTIMICE krapakerfi. KAPP keypti síðan fyrirtækið Stáltech árið 2018 sem hefur þjónustað fiskvinnslur, kjötvinnslur og aðrar greinar matvælaiðnaðarins frá stofnun þess árið 2003. Árið 2020 keypti KAPP fyrirtækið Kistufell sem er rótgróið vélaverkstæði, bifreiðaverkstæði og varahlutasala og var það stofnað árið 1952. Á síðasta ári keypti KAPP síðan hátæknifyrirtækið RAF sem sérhæfir sig í vélasmíði, innflutningi og þjónustu á tækjabúnaði fyrir sjávarútveg, fiskeldi og annan iðnað.

Í dag er KAPP tæknifyrirtæki sem sérhæfir sig í kæliþjónustu, vélasmíði, innflutningi og þjónustu á tækjabúnaði fyrir sjávarútveg, fiskeldi og annan iðnað. Fyrirtækið hefur vaxið hratt síðastliðin ár og heldur úti söluskrifstofum og sölufulltrúum í sjö löndum. Höfuðstöðvar fyrirtækisins eru í Turnahvarfi 8 í Kópavogi ásamt því að vera með starfsstöðvar í Þorlákshöfn, Grundarfirði og Vestmannaeyjum. Ólafur Karl Sigurðarson er aðstoðarforstjóri KAPP og tók við því starfi nú í haust. Hann hafði áður starfað hjá Marel í níu ár þar sem hann hafði meðal annars leitt þjónustusvið og vöruþróun fiskiðnaðar og síðustu tvö ár starfað sem framkvæmdastjóri Marel á Íslandi og framkvæmdastjóri fiskiðnaðar Marel. Blaðamaður Skessuhorns heyrði hljóðið í Ólafi Karli og spurði hann út í hið nýja fyrirtæki og annað tengt því.

Vel heppnaðar yfirtökur geta hraðað vexti

Það er ljóst að frá stofnun KAPP árið 2007 hefur fyrirtækið reynt að styrkja stoðir þess með kaupum á hinum ýmsu fyrirtækjum. Þið virðist alltaf vera með augun opin varðandi þetta, hver er aðalástæðan og hvernig hefur þetta gengið til þessa? „Það hefur verið yfirlýst stefna KAPP í gegnum árin að vaxa bæði með innri vexti sem og með yfirtökum á fyrirtækjum sem samræmast stefnu KAPP. Aðal ástæða þess er að vel heppnaðar yfirtökur geta hraðað vexti og verið hagkvæmari en innri vöxtur, þó það eigi ekki alltaf við. Vöxtur KAPP hefur í gegnum tíðina verið góður og fyrirtækið vaxið úr því að vera þjónustu- og viðgerðafyrirtæki yfir í að vera í dag þjónustu-, viðgerða- og framleiðslufyrirtæki.“

Nú hafið þið ásamt hópi fjárfesta í nafni KAPP Skaginn ehf. náð samkomulagi um kaup á öllum búnaði og lausafé þrotabúsins Skaginn 3X. Hver hafa fyrstu skrefin verið hjá nýjum eigendum eftir að þeir tóku við? „Það hefur verið í mörg horn að líta en fyrstu skrefin hafa verið að taka við félaginu sjálfu og stilla upp núverandi stöðu ásamt næstu skrefum. Þau atriði eru allt frá stofnun á nýju félagi sem kaupir eignir úr þrotabúinu yfir í það að koma því á ný í framleiðsluhæft form, ræða við birgja, hluthafa og fyrrum starfsmenn svo eitthvað sé nefnt. Við erum afar ánægð með það að í hópi hluthafa eru margir reynsluboltar úr greininni, sem klárlega hjálpar vegferðinni sem við erum mjög spennt fyrir.“

„Húsakosturinn er sömuleiðis góður, ég er því fullviss um að þekking og reynsla meðal starfsmanna félagsins og tengsl við viðskiptavini muni gera það að verkum að fyrirtækin sem við horfum til bæði á Íslandi og erlendis, sjái KAPP Skagann sem traustan viðskiptavin,“ segir Ólafur Karl. Hér er horft yfir mannvirkin við Krókalón. Ljósm. mm

Þurfum að byggja upp reksturinn að nýju

Fram kom í tilkynningu frá ykkur að markmiðið sé að byggja upp starfsemi KAPP Skagans á Akranesi og tryggja áfram sérhæfð störf á sviði tækniþjónustu við sjávarútveg á Akranesi. Hvað má búast við að þau störf verði mörg til að byrja með og sjáið þið fram á að þeim muni fjölga mikið á næstu misserum? „Það er eitt af því sem við erum að vinna í þessa dagana, að átta okkur á hve mikið af starfsfólki við þurfum nákvæmlega í upphafi. Við þurfum að byggja upp reksturinn að nýju og byrja á því að geta gengið áður en við förum að hlaupa. Svo það er ljóst að við munum byrja smátt með ábyrgðarfullum skrefum.“ En hvernig viðbrögð hafið þið fengið eftir kaupin? „Fyrstu viðbrögð og samtöl við viðskiptavini og markaðinn lofa góðu, svo við erum vongóð um að þörf eftir starfsfólki muni aukast með tíð og tíma. Svo það er klárt að stefnan er að stækka starfsemina og byggja upp starfsemi sem getur orðið miðstöð þekkingar í sjávarútvegi á Akranesi.“

Ólafur Karl segir þegar hann er spurður um hverju eigi að breyta í rekstrinum til að tryggja betri afkomu og betri árangur en áður að það sé klárt að reksturinn muni taka miklum breytingum. „Við munum byggja reksturinn á sömu gildum og hafa reynst vel í vegferð KAPP, ásamt því að byggja á þeim góða grunni sem var hjá Skaganum 3X en þá er ég að vísa í reynslumikið starfsfólk og góðar lausnir. Í upphafi munum við einbeita okkur að stöðluðum vörum og þjónustu, en með tímanum færa okkur í stærri lausnir.“

Öllu óskylt fyrra félagi

En hefur gjaldþrot Skagans 3X einhver áhrif á ímynd fyrirtækisins og viðskiptaáskoranir? „Núverandi félag KAPP Skaginn er með öllu óskylt fyrra félagi og eignarhaldi Skagans 3X. Um er að ræða nýtt félag sem er í eigu og rekið af nýjum aðilum, sem sjá tækifæri í þeim lausnum sem Skaginn 3X átti. Húsakosturinn er sömuleiðis góður, ég er því fullviss um að þekking og reynsla meðal starfsmanna félagsins og tengsl við viðskiptavini muni gera það að verkum að fyrirtækin sem við horfum til bæði á Íslandi og erlendis, sjái KAPP Skagann sem traustan viðskiptavin.“

Nú er stefnan að hefja starfsemi 1. nóvember næstkomandi. Hvernig gengur undirbúningurinn og verður allt tilbúið í lok þessa mánaðar? „Undirbúningur er í fullum gangi og óhætt að segja að þeir sem koma að verkefninu hafi ekki setið auðum höndum. Ég er mjög ánægður með þá miklu samvinnu sem er milli manna, það er hugur í mönnum svo ég á von á því að við getum verið framleiðsluhæf snemma í nóvember.“

Að lokum, eruð þið bjartsýnir að starfsemin á Akranesi muni ganga vel og hver er ykkar framtíðarsýn og helstu væntingar til starfseminnar á næstu árum? „Já, við erum mjög bjartsýn á starfsemi fyrirtækisins á Akranesi. Öll aðstaða er til fyrirmyndar og ég hef fundið það í veru minni uppi á Skaga undanfarið að þar ríkir alvöru keppnisskap í fólki og almenn jákvæðni í garð verkefnisins. Stefnan er að byggja upp öflugan rekstur og félag sem er sterkt á alþjóðavísu. Ég er því sannfærður að hér munum við byggja upp arðbæra starfsemi til frambúðar,“ segir Ólafur Karl Sigurðarson, aðstoðarforstjóri KAPP.

„Stefnan er að byggja upp öflugan rekstur“

Rætt við Ólaf Karl Sigurðarson aðstoðarforstjóra KAPP

Rætt við Ólaf Karl Sigurðarson aðstoðarforstjóra KAPP