Rætt við Ólaf Adolfsson nýkjörinn oddvita Sjálfstæðisflokksins í Norðvesturkjördæmi

„Ég er gríðarlega ánægður með þann ótvíræða stuðning sem ég hlaut hjá flokksfélögum mínum í dag. Framboð mitt hafði skamman aðdraganda, bara örfáa daga, og því kom það mér þægilega á óvart að finna hversu margir voru tilbúnir að trúa mér fyrir þessu ábyrgðar hlutverki. Reyndar náði sá stuðningur langt út fyrir raðir Sjálfstæðismanna og gefur það væntanlegum þingmanni byr undir báða vængi að vinna af heilhug fyrir hagsmunum okkar allra,“ segir Ólafur Adolfsson nýkjörinn oddviti Sjálfstæðisflokks í Norðvesturkjördæmi í samtali við Skessuhorn.

„Verkefnið sem blasir við mér er þannig að ef við ætlum að vinna þessar kosningar, þurfum við að endurvinna traust kjósenda. Við þurfum að sýna auðmýkt og hlusta á raddir fólks bæði hér í kjördæminu og um allt land. Ef við horfum til núverandi stöðu í pólitíkinni þá hefur Sjálstæðisflokkurinn glímt við innanmein í stjórnarsamstarfinu og átt á brattann að sækja í umræðunni allt þetta kjörtímabil. Skoðanakannanir hafa ítrekað sýnt þá þröngu stöðu sem flokkurinn hefur verið í um allt land. Því segi ég hiklaust að við þurfum að endurvinna traust kjósenda. Ég geri mér fulla grein fyrir því að það verður verk að vinna við að snúa taflinu við og tíminn til þess er knappur. En það var einmitt við þessar aðstæður sem leitað var til mín um að gefa kost á mér til að leiða lista Sjálfstæðisflokksins í Norðvesturkjördæmi.“

Snörp og skammvinn barátta

Ólafur segir augljóst að nýkjörinn framboðslisti muni starfa í krafti sjálfstæðisstefnunnar þar sem einstaklingurinn og frelsi hans verður í öndvegi. „Komandi kosningabarátta verður bæði snörp og skammvinn. Við fáum ekki mikinn tíma en munum nýta hann vel,“ sagði Ólafur sem var nýkominn af kjördæmaþinginu í Borgarnesi þegar þetta spjall fór fram. „Við kusum okkur öfluga forystu sem skynjar hjartslátt samfélagsins um allt kjördæmið. Forystu sem nýtur trausts og velvilja til að leysa ur erfiðum verkefnum, nýtir tækifæri sem gefast og vekur athygli á og stendur vörð um hagsmuni Norðvesturkjördæmis. Ég mun einbeita mér að atvinnumálum og verðmætasköpun á breiðum grunni. Ber þar fyrst að telja úrbætur í samgöngumálum, ekki síst til að auka samkeppnishæfni fyrirtækja sem hér starfa eða fyrir önnur sem kjósa að setja sig niður í Norðvesturkjördæmi.“ Aðspurður segir hann að áhugmálin séu einfaldlega pólitík en innan þess málaflokks eru eðli málsins samkvæmt heilbrigðismál ofarlega á baugi. „Heilbrigðismál tengjast ævistarfi mínu og þá ekki síst áskoranir í heilbrigðisþjónustu í dreifbýli,“ segir hann.

En, hver er maðurinn?

Þrátt fyrir að margir um vestanvert landið hafi lengi þekkt til Ólafs úr fótboltanum þá hefur hann verið áberandi sem eigandi Apóteks Vesturlands og sem slíkur verið óhræddur að taka slaginn við lyfsölurisana sem fyrir voru á markaði þegar hann stofnaði fyrirtæki sitt. En, það liggur beinast við að spyrja; hver er maðurinn? „Fyrir þau sem ekki þekkja mig þá heiti ég Ólafur Adolfsson og er 57 ára gamall lyfsali með lögheimili á Akranesi. Ég er lyfjafræðingur að mennt, á og rek þrjár lyfjabúðir undir heitinu Apótek Vesturlands en þær eru á Akranesi, í Borgarnesi og í Snæfellsbæ. Þá á ég einnig og rek lyfjabúð í Reykjavík undir heitinu Reykjavíkur Apótek. Mína fyrstu lyfjabúð opnaði ég árið 2007 og hefur reksturinn vaxið jafnt og þétt og síðasta ár var okkar allra stærsta ár með veltu yfir 1,6 milljarða króna og yfir 20 ársverk. Ég gæti tínt fleira til úr mínu persónulega lífi, en ég er oft nefndur „Gömul“ knattspyrnuhetja eftir farsælan feril í knattspyrnu með ÍA á árunum 1991-1996 og 21 landsleik með íslenska landsliðinu.

Ég hef alltaf haft mikinn áhuga á stjórnmálum og starfað nokkuð að sveitarstjórnarmálum. Sat í bæjarstjórn á Akranesi árin 2014 til 2022; leiddi lista Sjálfstæðismanna á Akranesi kjörtímabilið 2014-2018 þar sem Sjálfstæðisflokkurinn vann sögulegan sigur og fékk hreinan meirihluta í bæjarstjórn. Þá hef ég gegnt ýmsum trúnaðarstörfum í pólitík og má þar nefna að ég var varamaður í stjórn Sambands íslenskra sveitarfélaga 2014-2018, varaformaður í ráðgjafarnefnd Jöfnunarsjóðsins og formaður Þróunarfélagsins á Grundartanga. Þá sit ég í dag í verkefnisstjórn um Rammaáætlun vegna svokallaðs Ramma 5.“

Aðspurður segir Ólafur að nú blasi sú staðreynd við að hann sé á leið á þing og því muni hann ráða sér framkvæmdastjóra til að stýra apótekum sínum.

Verk að vinna að endurvekja traust kjósenda

Rætt við Ólaf Adolfsson nýkjörinn oddvita Sjálfstæðisflokksins í Norðvesturkjördæmi

Rætt við Ólaf Adolfsson nýkjörinn oddvita Sjálfstæðisflokksins í Norðvesturkjördæmi