Rætt við Þóri Valdimar Indriðason smið um störf hans hjá leigufélaginu Bríeti

Þórir Indriðason hefur unnið sem smiður í 34 ár, hann fór beint úr grunnskóla í trésmíðanám og hefur að mestu starfað sem sjálfstæður smiður. Þórir var við tölvuna á skrifstofu leigufélagsins Bríetar, að Bjarnarbraut 8 í Borgarnesi, þegar Skessuhorn bankaði upp á en Þórir hóf störf í júlí á þessu ári sem viðhaldssmiður fyrirtækisins.

Bríet er að prófa þetta

Bríet er sjálfstætt starfandi leigufélag í eigu Húsnæðis- og mannvirkjastofnunar, stofnað að norrænni fyrirmynd og rekið án hagnaðarsjónarmiða. Bríet býður fjölbreytta húsnæðiskosti út um allt land og telur eignasafn félagsins um 460 fasteignir í 40 sveitarfélögum sem eru nú þegar í útleigu. „Það hefur aldrei verið neinn fastráðinn hjá fyrirtækinu sem sinnir eingöngu viðhaldi en fyrirtækið hefur verið með verktaka í hinum ýmsu verkum. Þar sem oftast þarf að fara í verkefni með skömmum fyrirvara, þá er Bríet að sjá hvort það sé ekki hentugra að vera með fastráðinn starfsmann sem getur keyrt af stað og farið í þau verkefni sem koma upp, strax. Það á eftir að koma í ljós hvort þessi ráðning bæti reksturinn en ég geri fastlega ráð fyrir því,“ segir Þórir.

Stórt svæði sem þarf að viðhalda

Þórir hefur umsjón með viðhaldi fasteigna á frekar stóru svæði. „Svæðið sem ég er að vinna á nær frá Reykhólum og að Hellu. Reyndar voru mín fyrstu verkefni að fara á Bolungarvík, til að mæla fyrir inni- og útihurðum á fimm íbúða raðhúsi og á Bíldudal til að setja upp ljós og gardínur í nýjum eignum til að fólk gæti flutt þar inn. Ég er reyndar bara búinn að sjá brot af öllum þeim eignum sem Bríet er með en ég ætla að reyna að vera duglegur í vetur og ná að skoða sem mest af eignum, svo að ég sjái hvernig allt lítur út,“ nefnir Þórir.

Koma upp óvænt verkefni

Þórir hefur með sér öll þau verkfæri sem þarf fyrir ákveðið verk en stundum geta komið upp óvænt verkefni og þarf hann að geta brugðist við því. „Ég er með allt með mér, allt frá því að mála einn vegg í að setja upp eldhúsinnréttingu. Ég var einmitt í verkefni þar sem ég átti að setja upp eldhúsinnréttingu og gólflista en þá kom í ljós raki inni á baðherbergi og þá þurfti ég að endurnýja alveg heilt baðherbergi. Það var ekki hugmyndin þegar ég kom á staðinn, þetta litla verkefni sem átti að taka nokkra daga endaði í um mánaðar vinnu við að laga rakaskemmdir og setja upp nýtt baðherbergi,“ nefnir Þórir. „Ég tek að mér verkefni sem eru mest áríðandi og reyni að klára þau. Það getur auðvitað tekið tíma að fá hluti pantaða eins og útidyrahurð til dæmis, en ég geng í verkið þangað til ég klára það. Engar vikur eru eins í þessu starfi og það er mjög skemmtilegt og gefandi að getað unnið við fjölbreytt störf,“ segir Þórir.

Skipulagning

Þórir er með stílabók við hlið sér og þar er að finna verkefnalistann. „Ég er með verkefni skrifuð hjá mér lauslega og þar liggur fyrir hvað er framundan. Í flestum stærri verkefnum reynum við að taka verktaka með okkur því það er hamlandi hvað einn maður getur gert í þessum stóru verkefnum, eins og til dæmis að skipta um þakklæðningu og slíkt. Þá þarf ég að ráða verktaka og það getur oft verið erfitt að ná einhverjum í vinnu í einn eða tvo daga en þá verð ég að vera vel skipulagður í slíkum verkefnum,“ nefnir Þórir. Mikil uppbygging er nú á Reykhólum og hefur Þórir verið mikið þar að undanförnu. „Ég er búinn að vera að verkefnastýra framkvæmd á Reykhólum en þar erum við að byggja raðhús. Raðhúsið kemur tilbúið innflutt og það koma starfsmenn Belkod á Íslandi sem sjá um að reisa húið og klára það að utan. Við tökum við því þegar það er klárt að utan og þá fer ég í verkið. Líklega fæ ég einhverja verktaka í ýmis verkefni eins og til dæmis málningarvinnu en ég geri það sem ég kemst yfir,“ segir Þórir.

Aðstaða

Þórir bíður nú eftir að fá aðstöðu, þar sem hann getur verið með sinn lager af blöndunartækjum, hurðarhúnum og fleiru. „Aðstaðan er ekki komin en hún er í vinnslu. Þar get ég verið með lager til að geyma ýmislegt tengt viðhaldinu en það verður mikill munur að þurfa ekki að vera að hendast eftir öllu og einnig verður aðstaðan hugsuð sem rými, ef þarf að smíða einhverja hluti. Ég veit til dæmis að ég þarf að smíða ruslatunnuskýli fyrir um 30% af eignum og ég stefni á að gera það í vetur, þegar ég get ekki verið að vinna mikið úti og þá get ég sett þessi skýli upp næsta sumar,“ segir Þórir en hvernig er aðstaðan á skrifstofunni? „Hérna er frábært fólk að vinna. Við erum níu starfsmenn sem erum að vinna hjá Bríeti en ég er nú oftast lítið á skrifstofunni. Þetta eru um tveir til þrír dagar í mánuði sem ég er hér og þegar ég er á skrifstofunni þá er ég að panta frá birgjum, taka á móti símtölum og svara tölvupósti. Nú er ég búinn að vera hér í dag, endalaust að leita eftir tilboðum í efni fyrir eignirnar, tala við undirverktaka og leggja inn tilboð í ýmis verk,“ bætir Þórir við.

Ég er ekki ungur ennþá

Eins og fyrr segir þá hefur Þórir starfað sjálfstætt, séð um sín mál sjálfur en segir að það sé annar hugur í honum í dag. „Ég ákvað að prófa þetta og þetta er svona öðruvísi vinna. Ég varð aðeins að breyta til. Að vera ekki lengur einn að vinna einhvers staðar, að vera að búa til reikninga og vera í stressi um að fá þá borgaða á hverjum mánaðamótum. Ég er ekki ungur ennþá, ég var að átta mig á því að ég er að eldast,“ segir Þórir og hlær. Á tölvuskjá Þóris er að finna ýmsar upplýsingar sem nýtist honum í vinnu. „Hér er ég með, inni í kerfinu okkar, yfirlit um hvaða framkvæmdir hafa verið á eignum okkar, hvenær var til dæmis skipt um blöndunartæki eða hvenær þak var lagað. Með þessum hætti ætti ég að hafa betri yfirsýn varðandi þá hluti sem hafa verið lagaðir eða betrumbættir og þannig haldið eignum leigufélagsins Bríetar í góðu ástandi,“ segir Þórir að lokum.

„Ég varð aðeins að breyta til“

Rætt við Þóri Valdimar Indriðason smið um störf hans hjá leigufélaginu Bríeti

Rætt við Þóri Valdimar Indriðason smið um störf hans hjá leigufélaginu Bríeti